(+994) 050 626 86 70
(+994) 055 673 68 09
(+994) 070 534 65 52

qaynar xətt

Vüsal Mahmudov
"Şura höküməti"nin ayağı meydana dəydisə…

"Şura höküməti"nin ayağı meydana dəydisə…

Tahir Süleymanov email:

"Qarabağ" Çempionlar Liqasının ilk qrup oyununa çıxdı. Nəticədən asılı olmayaraq, Azərbaycan futbolu adına tarixi bir gün idi...

Görüşdən öncə fikirlərimi bölüşmüşdüm. "Qarabağ"ı qalib kimi təqdim edib qısaca real durumu bildirmişdim.

Yanlış ictimai fikir formalaşmışdı. Daha doğrusu, formalaşdırılmışdı. "Qarabağ"ın tarixi qrupa vəsiqəni təmin etdikdən sonra qrupdan çıxmaq şansları müzakirə olunur, mövcud vəziyyətdən uzaq "təhlil"lər aparılır, azarkeşlər ümidləndirilir, Londonda qələbədən danışılır, heç-heçə minimum nəticə hesab olunurdu. Sanki qarşıda dünya nəhəngi "Çelsi" deyil, "Çernomorets" idi...

Dəfələrlə bildirmişəm, böyük futbol elmdir, eyforiyaya qapılmamalıdır. Azarkeş hər zaman qələbə istəyir. Başadüşüləndi. Təəssüf ki, ictimaiyyətdə yanlış fikirlər formalaşdıranlar arasında üzün illərdi futbolda olanlar da var. Bizlərin vəzifəsi bu deyil. İnsanları vaxtında maarifləndirmək, real durumu izah etmək, doğru təhlilləri xalqa çatdırmaqdı. Azarkeşlərin Azərbaycan futbolundan, stadionlardan uzaq düşməməsi üçün mütləq bu yol seçilməlidir.

Onsuz da futbolumuzda olan bərbad durum çoxlarına bəllidi. Təkrarçılığa yol verib sadalamağa ehtiyac da yoxdu. İllərdi bu mövzuda yazılar yazılır, danışılır. Futbolun açınacaqlı vəziyyətdə olmasına baxmayaraq, "Qarabağ"ın tarixi uğuruna layiqli qiymət verməklə yanaşı elə etməliyik ki, möhtəşəm nailiyyət ictimaiyyətin "eyfo"laşdırılması nəticəsində bumeranq rolunu oynamasın.

Eyforiyaya qapanmaq məşqçi, futbolçulara da psixoloji baxımdan çox mənfi təsir edir. İctimai rəy çox böyük önəm daşıyır. Klub rəhbərliyi, məşqçilər, futbolçular da ictimaiyyətin bir parçasıdı. Oxuyurlar, təsir altına düşürlər, hətta uğursuzluğu göz önünə gətirib buna uyğun addım atmağa məcbur olurlar. 

Böyükhesablı məğlubiyyət alındı...

"Şura höküməti" nümayəndələrinin ayağı yaşıl meydana dəydisə, başqa nəticə də gözlənilmirdi. Dağıtdıqları klubların ölmüş ruhunu Londona aparmışdılar.

Obyektiv, subyektiv səbəblər təhlil olunmalıdır.

İndi nə baş verir? Ağır məğlubiyyətdən sonra "geri dönüş", futbolun obyektiv durumu ortaya qoyulur, səbəblər göstərilir, bundan artığının olmayacağı ictimaiyyətə çatdırılır. Bir ay öncə durum fərqli idi? İctimaiyyətə psixoloji dopinq verib göylərə qaldıraraq bir günün içində yerə enməyin nə mənası var?! Bu fikirlər vaxtında deyilə bilməzdimi?! Yanlış fikirlər o qədər çoxalıb ki, zamanında deyilən ağıllı söz, təhlillər çoxluq tərəfindən qəbul olunmaq istənilmirdi. İctimaiyyət, azarkeşlər günahkar deyil. Günahkar "futbol biliciləri"nin xalqa verdiyi yanlış "dopinq"idi...

Oyundan öncə deyilənlərlə indi səsləndirilənlər arasında Ərəbistanın 50 dərəcə istisi ilə Antarktidanının 60 dərəcə şaxtasına qədər böyük fərq, uçurum var. Belə ürək döyüntüsü, yanaşma ola bilməz. "Qarabağ" Azərbaycan futbolu üçün tarix yazıb artıq. Ağır məğlubiyyətdən sonra onların ifrat dərəcədə müdafiə olunmasına elə bir ehtiyac yoxdur.

Qurban Qurbanovun oyundan sonra "səhvlərimiz üzərində çalışmalıyıq" açıqlamasından sonra məğlubiyyəti millətin ruhuna yeritməyin yeri yoxdu. Azərbaycan futbolu nə qədər acınacaqlı durumda olsa da, "Qarabağ" qarşısında "Çelsi"nin olmasından asılı olmayaraq, 0:6-lıq komanda deyil.

Bayağı təriflərin "Qarabağ"a faydası olmaz.

Futbolda dərin, uyğun təhlillərlə komandaya dəstək olmalıyıq. Yeni legionerlərin kluba transferindən çox danışıldı. Dərk etməliyik, Azərbaycana gələn futbolçuların heç biri "Çelsi", "Atletiko, "Roma"nın nəinki 18-yə, 25-yə, heç transfer siyahısına yaxın düşə bilməzlər.

Legioner adı o demək deyil ki, onlarla oynanılsa, rəqiblər darmadağın ediləcək. Kluba olan ictimai təzyiq, Azərbaycan səviyyəsində legionerlərə ödənilən pullar onların start heyətində olmasını şərtləndirir.

Bədnam düşmənlərimizin futbolçusunun böyük klubda çıxış etməsi gündəmi zəbt edib, nümunə göstərilir. Yüz faiz əminəm, ictimaiyyətin doğru olmayan yanaşması nəticəsində Mahir Mədətov start heyətində olmadı. Məğlubiyyət öncədən bilindiyi halda legionerlərin Mahirin əvəzinə meydana buraxılmasının nə əhəmiyyəti var idi, Azərbaycan futboluna nə xeyri dəydi?!

Klub səviyyəsində böyük təcrübəsi olan şəxs kimi birmənalı bildirirəm, doğru təhlillərlə Qurban Qurbanov bu baxımdan lazımı dəstək görsəydi, fərqli addım ata bilərdi. Onu çox gözəl başa düşürəm. Mahiri start heyətinə salıb ağır məğlubiyyət fonunda klub rəhbərliyi, futbol ictimaiyyətinin qınağından qurtara bilməyəcəkdi. “Legionerləri almısan, niyə oynatmırsan” düşüncəsilə. Sanki gətirilən legionerləri görüb rəqibin sayseçmə futbolçularının dizləri əsəcəkdi. Mahirin oynaması nə demək idi? Yenə də məğlubiyyət qaçılmaz olacaqdı. Bununla yanaşı gənc futbolçumuz 90 dəqiqə meydanda olaraq fərdi keyfiyyətlərini nümayiş etdirə, Avropa klublarının diqqətini cəlb edə bilərdi. Qrupa qədərki oyunu, baş məşqçinin dəstəyilə bunu haqq etmişdi. Oynadığı dəqiqələrdə də qeyd etdiklərimi qismən sübuta yetirdi.

Çempionlar Liqası eyni zamanda futbolçuların yarmarkasıdır. "Qarabağ" bu səviyyəyə gəlib çatıbsa, hədəflər qrupdan çıxmaq deyil, heyətdə olan istedadlı 1-2 futbolçumuzun adlı-sanlı klublara transfer olunmaq şansını artırır. Belə olarsa, Azərbaycan futbolu adına daha bir möhtəşəm uğur olar, "Qarabağ" isə büdcəsinə milyonlar qazandıra bilər. Ehtiyatda oturmaqla Mahir və digərlərinin potensialını "Mançester Yunayted" görə bilməz. "Çelsi" kimi klublarla görüşlərdə bacarıq göstərilirsə, deməli, nəhəng klublarda oynamaq şansları çoxalır.

İndiki məqamda "Qarabağ"a dəstək bu cür olmalıdır. Qurban Qurbanov bilməlidir ki, bu addımları atsa, qınaq obyektinə çevrilməyəcək.

Bilirəm, ağır yazılar çox da diqqəti cəlb etmir. Nizami, Nəsimi, Sabirlərdən çox başqa "şair"lər gündəmdədi. Müzakirə olunur, xalqın ruhu əlindən alınır. Elə futbolda da yazıçı, aktyor, marketoloq dönəmidi. Üzdən yanaşma, yüngül mövzular ictimaiyyətdə daha çox diqqəti cəlb edir. 
Bunun davam etməməsi üçün dərin təhlillərə, hər sahədə işini bilən insanlara önəm verilməli, onların fikirləri aparıcı qüvvə rolunu oynamalıdır. Əks halda, digər klubları, layiqli mütəxəssisləri, uğurları itirdiyimiz kimi "Qarabağ"ı, Qurban Qurbanovu da futbolda itirə bilərik.

Qarşıdakı 5 oyunda uğurlar, "Qarabağ"!


 
tarix: 14-09-2017 20:11


 
Xəbər lenti
17.12.2017

10:06   Araz Abdullayevdən qol ötürməsi - VİDEO

02:19   “Valensiya” uduzdu, “Atletiko” qalib gəldi - VİDEOLAR

02:11   “İnter” ilk məğlubiyyətini aldı, “Napoli” və “Roma” qalib gəldi - VİDEOLAR

01:44   PSJ 3 xalı 4 qolla qazandı - VİDEO

01:26   “Borussiya” və “Bavariya”dan çətin qələbə - VİDEOLAR

00:52   MS “Tottenhem”i böyük hesabla yendi, “Çelsi” və “Arsenal” qalib gəldi - VİDEOLAR

00:30   “Trabzonspor” tək qolla güldü

16.12.2017

23:27  “Real” dünya çempionu oldu - VİDEO

22:55  Dəniz Yılmaz “Bursaspor”a lazım olmadı

21:27  Yunis Hüseynov istədi, “Kəpəz”də yeni məşqçi təyinatları gerçəkləşdi

20:56  Nəsirov ehtiyatda qaldı, komandası qalib gəldi

19:53  Araz Abdullayev oynadı, “Anortosis” qalib gəldi

18:00  Nazarov yenə fərqləndi, komandası qələbəni əldən verdi

16:37  “Neftçi”nin göndərəcəyi oyunçuların siyahısı

16:36  Fransa klubu baş məşqçisini qovdu

15:28  FİFA İspaniyanı DÇ-dən qovmaqla hədələdi

14:36  “Qəbələ”nin qış hazırlıq planı açıqlandı

13:59  “Qəbələ”də yeni müqavilə

13:42  “Kəpəz”də baş məşqçi istefaları

13:39  “Neftçi” legioneri ilə yolları ayırdı

13:16  Yubiley təxirə salındı - qərarı İcraiyyə Komitəsi verəcək

13:02  Adil Şükürov Türkiyə millisi və “Traktorsazi” rəhbərliyi ilə görüşdü

12:01  BOM-da təqdimat - FOTOLAR

11:46  “eTopaz”da günün canlı oyunları

11:22  “TOPAZ”DA BU GÜN

11:08  Nazim Süleymanov yenidən “Alaniya”da

10:05  Ziya Əzizov oynamadı, komandası uduzdu

02:08  “Monako” “Sent-Etyen”i 4 cavabsız qolla yendi - VİDEO

01:56  La Liqada 16-cı tura qolsuz start - VİDEO

01:30  “Borussiya”dan inamlı qələbə - VİDEO

bütün xəbərlər >>>

Bütün hüquqlar qorunur. Məlumat internet səhifələrində istifadə edildikdə müvafiq keçidin qoyulması mütləqdir. 2013 © futbolinfo.az