(+994) 050 678 37 80
(+994) 070 534 65 52

qaynar xətt

Natiq Muxtarlı
Tahir Süleymanov
Etibar Cəbrayıloğlu
Foqts kimi danışma, Qurban!

Foqts kimi danışma, Qurban!

Bir gündə 3 məğlubiyyət, ümumi top fərqi – 0:11. 10 ildi ölkə futbolunda dağıdılan milyardların nəticəsi bu olmamalıydı. Hər il büdcəsi 30-35 milyon manat ətrafında fırlanan AFFA-nın inkişafına çalışdığı əsl futbol tam başqa olmalıydı.
 
Sual verən yox, dövlətin pulunun hesabını istəyən gözə dəymir. Futbol funksionerləri dövlətin xalqın boğazından kəsib bu idman növünə səxavətlə ayırdığı maliyyəni eyni acgözlüklə dağıdır. Və o qədər arxayındılar ki, dünya veclərinə deyil. Ölkədə klub sayı, futbolçu sayı ən minimum həddə çatıb, sabaha ümid qalmayıb, lakin kimsə pulların hara xərcləndiyinin hesabını soruşmur.
 
Dünən əvvəlcə 17 yaşadək qızlardan ibarət millimiz uduzdu. Avropa çempionatının elit-raundunda Almaniya ilə görüş 0:5 hesablı məğlubiyyətlə bitdi.
Daha sonra Bakıda təşkil olunmuş təlim-məşq toplanışı çərçivəsində 19 yaşadək futbolçulardan ibarət Azərbaycan yığması ruslarla görüşdü. Rusiya U-19-u “Dalğa Arena”da baş tutan yoldaşlıq görüşündə 4:0-a sevindi.
Və axşam 21 yaşadək futbolçulardan ibarət millimiz Avropa çempionatının seçmə mərhələsi çərçivəsində Kosovo ilə bacarmadı. 0:2 hesabı qrupumuzun ən zəifi sayılan Kosovonu 2-ci pilləyə şərik etdi, bizimkilərin sonuncu yeri tutacağını indidən dəqiqləşdirdi.
 
Bəhanələr var. Almanların əbədi favorit olduğunu deyənlər bəlkə də haqlıdı. Qadın futbolunda o səviyyədə deyilik. Bəs, ruslara evdə 4 top fərqiylə uduzmağın adı nədir? Adi yoxlama oyununda qonağa belə yenilginin bəhanəsi yoxdu. Sınaq matçındakı nəticə ciddi qəbul edilməyə bilər, lakin 0:4 nəticə deyil, biabırçılıqdı.
 
Bəs, U-21-lə bağlı nə deyək? Rəqib nə Almaniya, nə Rusiya deyildi. Sabiq Yuqoslaviyanın bir qəsəbəsi sayıla biləcək Kosovo bizimkilərə futbol dərsi keçdi. Baş məşqçi Rəşad Sadıqovun ilk rəsmi matçıyla bağlı hansısa açıqlamaya rast gəlməmişəm, bəlkə də deməyə sözü qalmayıb. Əvəzində statistika “danışır”. Kosovolular 2:0 bitən oyun ərzində qapıya 15 zərbəyə imkan tapıblarsa, Azərbaycan yığması cəmi 3 belə imkan əldə edib. Bunun da heç birində futbolçularımız “çərçivə”yə düşə bilməyib.
 
Ayrı-ayrı fərdləri, futbolçuları, məşqçiləri qınamaq olmur. Hə, məğlubiyyət varsa, tənqidlər olmalı, çatışmazlıqlar qeyd olunmalıdı. Lakin bütün ölkə futbolu xəstədirsə, bunun günahı 5-6 nəfərdə deyil, sistemdədi. Ölkə futbolu düzgün idarə olunmur, 10 ildi maliyyə dağıdılır, optimal strategiya seçilmədiyindən quyunun dibindəyik. Nə milli komandalar, nə klublar üçün istedadlı futbolçular yetişməyib. Və dünənki 3 məğlubiyyətin də başlıca günahkarı AFFA-dı.
 
U-21-in seçmə mərhələlərdəki qələbəsiz oyunlar seriyası 9-a çatıb. 2015-ci il noyabrın 17-də Rusiya ilə ev oyununda 3:0 hesablı qələbədən sonra yığmamız artıq 856 gündü 3 xal sevinci yaşamır. AVRO-2017-nin son üç görüşündə Rusiya (2:2), Farer adaları (1:1) və Finlandiya (0:0) heç-heçələrini sıralayan yığmamız yeni tsikldə daha acınacaqlı nəticələrə imza atıb. AVRO-2019-un 6-cı oyununda 5-ci məğlubiyyətini alan komandamız yalnız Kosovoyla Bakıdakı görüşdə xal görüb – 0:0. İsrail və İrlandiyaya eyni – 1:3 hesabı ilə uduzan futbolçularımız iki dəfə Almaniya önündə aciz qalıb – 1:6, 0:7. Bir sözlə, 9 oyunluq qələbə həsrəti 4 heç-heçə və 5 məğlubiyyətdən ibarətdi. Bu müddətdə 6 top vuran komandamız 4 dəfə çox – 24-nü buraxıb.
 
Rəşad Sadıqovu yalnız Kosovo ilə oyuna görə qınamaq olar, bəs, digər matçlar? Uğursuzluqlar sıralanır, məşqçilər əlcək kimi dəyişir, nəticələr daha da pisləşir. Və ümumi rəy belədi: oyunçu potensialı yoxdu. O zaman AFFA illərdi nə ilə məşğul olub? Millilərin uğursuzluğu fonunda klublar avrokuboklarda nəticələri yaxşılaşdırıbsa, deməli, potensial var, onu üzə çıxaracaq idarəçilik lazımdı. “Qarabağ”, “Qəbələ” nümunələri göstərir ki, sadəcə, AFFA düzgün işləmir. Bəlkə AFFA rəhbərliyinin, onların strategiyasının dəyişməsi vaxtı çatıb? 10 ilə milyardlar qarşısında futbolu inkişaf etdirmək əvəzinə, onun kökünə balta çalan rəhbərliyi deyirik...
 
İş o həddə çatıb ki, əsas millinin baş məşqçisi Qurban Qurbanov da AFFA-dakılar kimi danışır: “Hansı məşqçini dindirsən, deyəcək ki, istedadlı futbolçulara ehtiyacımız var. Xaricdə də legionelərin xidmətindən istifadə edilir. Əlbəttə, biz ilk növbədə azərbaycanlı futbolçuların xidmətindən yararlanmalı, yerli futbolçuların yetişdirilməsinə diqqət ayırmalıyıq. Ancaq biz futbol ölkəsi deyilik. Bunu nəzərə almalıyıq”.
 
Qurban bəy Berti Foqts kimi danışmağa başlayıb. Və bu, onun sözü deyil, AFFA-nın sözüdü. Qurbanov, illər öncə sən özün 16-20 komandanın elitada mübarizə apardığı bir çempionatda yetişmisən, Rusiyada oynamısan, qonşu ölkənin ilk bombardiri başqa bir azərbaycanlı olub və s. və i. Zaqatalada yeni qurbanovlar yetişmirsə, futbolçu fabriki olan Gəncədə, Tovuzda, Sumqayıtda, Mingəçevirdə yeni nəsil üzə çıxmırsa, bu, futbol ölkəsi olmamağın deyil, AFFA-nın bütöv bir təsərrüfatı məhv etməsinin nəticəsidi. Lütfən, nə danışdığımıza diqqət edək.
 
Bəlkə də bu açıqlama Belarusla bugünkü oyunqabağı özünü sığortalamaq cəhdidi. Amma biz millidən qələbə gözləmirik, Qurban bəy hələ yolun başındadı, onun komanda qurmasının intizarındayıq. Lazımi ehtiyat qüvvə yoxdusa, kadr çatışmırsa, bunu futbol ölkəsi olmamaqla əlaqələndirməməliyik, AFFA-nı, futbolu bu sahəni bilməyənlərin ələ keçirməsində axtarmalıyıq. Milyonlar dağıdılır, onu marketoloq çətəsi özünün və himayədarlarının ciblərinə ötürür, sabaha yönəlik işlər görülmür.
 
Və indi cavabı öz bacarığı hesabına buraya gəlib çıxan Rəşad Sadıqov, Qurban Qurbanov verməli olur. Siz ölkə futbolunda işlərin düzgün qurulmadığını, illərin boşuna verildiyini kimlərə görəsə deyə bilmirsizsə, “futbol ölkəsi deyilik” açıqlamasını da dilə gətirməyin. Bu, sizin sözünüz deyil. Gözüaçıq olun, İslandiya futbol ölkəsidimi?
 
Ölkədə futbolçu yetişmirsə, bu, dolların kursunun qalxması və ya iqlimin dəyişməsi ilə bağlı deyil. Heç Suriyadakı müharibənin də məsələyə dəxli yoxdu. Bir həqiqət var: AFFA ölkə futbol təsərrüfatını düzgün idarə etmir, onu çoxdan bataqlığa çevirib. İndi isə öz istedadı sayəsində gülüstan yaratmış Qurbanovu, Sadıqovu o bataqlığa atırlar. Öz mahnılarını oxuda-oxuda…
 
FƏRİD

 
tarix: 23-03-2018 09:35


 
Xəbər lenti
21.03.2019

02:10   Millimizin rəqibinə 1 qol bəs etdi

00:07   Millimiz Zaqrebdə son məşqə çıxdı - FOTOLAR

00:01   Maksim Medvedev: “Oyun səviyyəmiz nisbətən azdır”

20.03.2019

22:40  Azərbaycan – Litva: Hakim təyinatları açıqlandı

22:17  Nikola Yurçeviç: “13 futbolçu arasından seçim edəcəm”

21:22  Luka Modriç: “Azərbaycanı tam ciddiyə alırıq”

21:13  Daliç: “Azərbaycanın necə oynayacağını maraqla gözləyirik”

20:35  “Heç-heçəni qələbəyə bərabər hesab etmək olar”

20:10  Azərbaycan millisi ilk oyunda Rusiya ilə heç-heçəyə razılaşdı

19:15  Premyer Liqa klubunun baş məşqçisinə cəza

17:51  Patonun yeni klubu məlum oldu

16:07  Belçika millisində ciddi itki

15:12  Yurçeviç üçün daha iki köməkçi

14:25  Abramoviç “Çelsi”yə qiymət qoydu: 2,5 milyard!

13:17  “Səbail”in futbolçusu əfsanələrin oyununa dəvət aldı

12:32  Futbol tarixinin ən yaxşı 50 baş məşqçisi

11:31  Bundesliqa klubu yeni baş məşqçisini açıqladı

10:29  “Səbail” 6 futbolçunu qovdu

10:15  ECA, “Morethanfootball” və “Neftçi”

09:09  “Qəbələ”dən 2 oyuna 31 qol

01:11  “Neftçi” “Qaradağ Lökbatan”la “sülh bağladı”

00:42  “Sabah” Region Liqası klubu ilə qarşılaşacaq

bütün xəbərlər >>>

Bütün hüquqlar qorunur. Məlumat internet səhifələrində istifadə edildikdə müvafiq keçidin qoyulması mütləqdir. 2013 © futbolinfo.az