(+994) 050 678 37 80
(+994) 070 534 65 52

qaynar xətt

Tahir Süleymanov
Qış yuxusuna gedən AFFA: məşqçi yox, Avro-2020 üçün bəhanə axtarırlar!

Qış yuxusuna gedən AFFA: məşqçi yox, Avro-2020 üçün bəhanə axtarırlar!

Milli komandamızın Avro-2020-nin çeçmə mərhələsində ilk oyununa 61 gün qalıb. Deməli, 53-54 gündən sonra Xorvatiya ilə səfər matçı üçün toplanış olmalıdı.
 
Hələ bundan əvvəl hansısa sınaq matçı, həmin matç üçün toplanış, hazırlıq. 1 aydan da az vaxt qaldı, deyilmi?
 
Amma hələ də əsas milli komandamız başsızdı. Qurban Qurbanovun xələfi müəyyənləşməyib, AFFA ötən il, dekabrın sonuna kimi namizədləri müəyyənləşdirməli olsa da, sakitçilikdi. Bu missiyanı yerinə yetirməli olan katibliyin nə iş gördüyü, necə işlədiyi müəmmadı.
 
Təbii ki, yeni gələcək baş məşqçi üçün bundan gözəl fürsət ola bilməz. Vaxt azlığını bəhanə edəcək, sudan səbəb göstərəcək və haqlı olacaq. Tanımadığı komandayla hədəf müəyyənləşdirmək, yerinə yetirmək asan deyil. AFFA isə bu yolla məsuliyyətdən qaçmağa çalışacaq.
 
Əslində, necə olmalıydı? AFFA rəhbərliyi Qurbanovu təyin etdiyi gün özü üçün onu qovacağı zamanı da müəyyənləşdirmişdi. Onlara sərf etməyən birinə 1 ildən artıq şans verə bilməzdilər, vermədilər də. Bu səbəbdən B variantı hazır olmalı idi. Lakin görünən odu ki, hətta ötən 1 ay ərzində də namizədlərin müəyyənləşməsi üçün kifayət etməyib.
 
AFFA-nın baş katibi Elxan Məmmədov Qurbanovun istefaya göndərildiyi gün təkrar-təkrar bu tsiklin bizim üçün xüsusi olduğunu vurğulamışdı. Səbəb final mərhələsinin bir qrupunun oyunlarının, eləcə də 1 ¼ final matçının ölkəmizdə keçiriləcəyidi. Faktiki, ev sahiblərindənik, ölkə rəhbərliyi də bu yarışda olmağımızı tapşırıq kimi AFFA qarşısında qoyub. İşi buna uyğun qurmaq, daha operativ tərpənmək lazım ikən AFFA-nın qış yuxusuna getməsi maraqlıdı.
 
Təbii ki, Məmmədov final mərhələsinə yüksəlməyin mümkünsüz olduğunu bilir, bu səbəbdən vaxt uzadır, bu missiyanı heç kimin boynuna götürmədiyini bəhanə edib, guya namizəd tapılmadığını qabardır. Baş katib bununla həm gələcək yeni məşqçini, həm də özünü sığortalayır. Bu, hamıya bəlli reallıq idi, o zaman Qurbanovun qovulmasına nə gərək vardı?
 
Növbəti seçmə mərhələnin startına 61 gün, hazırlığa başlamaq üçün isə daha az zaman qalıb. Biz isə hələ də yeni baş məşqçinin yolunu gözləyirik. Plan, məqsəd özlərinə bəllidi, amma AFFA çox gecikdi.
 
FƏRİD

 
tarix: 18-01-2019 13:15


 
Bütün hüquqlar qorunur. Məlumat internet səhifələrində istifadə edildikdə müvafiq keçidin qoyulması mütləqdir. 2013 © futbolinfo.az