(+994) 050 678 37 80
(+994) 070 534 65 52

qaynar xətt

Vüsal Mahmudov
Tahir Süleymanov
Rumınlarla 6-cı sınaq

Rumınlarla 6-cı sınaq

Türkiyədə təlim-məşq toplanışında olan “Zirə” bu gün Bakı vaxtı ilə saat 17:00-da ilk yoxlama oyununu keçirəcək. Yanvarın 15-də baş tutmalı olan Qazaxıstanın “Taraz” klubu ilə görüş əlverişsiz hava şəraiti üzündən ləğv edildiyi üçün “Voluntari” ilə qarşılaşma ilk xarakteri daşıyacaq.
 
Bu gün oynanılacaq görüş rəqiblər arasında 2-ci matç olacaq. Belə ki, 1 il əvvəl – 2018-ci il yanvarın 27-də də "qartallar" “Voluntari”ni sınağa çəkib. Həmin vaxt Bakıətrafı qəsəbə klubu 2 cavabsız qolla qələbə qazanıb. Rəqib qapısına Elşən Abdullayevlə Vüsal İsgəndərli yol tapıb.
 
Bu matç “Zirə”nin Rumıniya klubları ilə ümumilikdə 6-cı, yoxlama oyunlarında 4-cü sınağı olacaq. İndiyədək “Zirə” bu ölkədən olan komandalarla 2 avrokubok və 3 hazırlıq matçı keçirib.
 
2017/18 mövsümündə UEFA Avropa Liqasının II təsnifat mərhələsində “Astra” ilə görüşən klub bu iki rəsmi qarşılaşmadan sonra mübarizəni dayandırıb – 1:3, 0:0. Rumıniyalılarla səfərdəki ilk görüşdə "Zirə"dən Rəşad Sadiqov fərqlənib.
 
Rumıniyalılarla ilk yoxlama görüşü isə 2016-cı il yanvarın 22-də baş tutub. “Zirə” “Tırqu Mureş”i 1:0 hesabı ilə məğlub edib. Yeganə qola Luis Alberto Dies (Tato) imza atıb.
 
2017-ci il iyunun 20-də isə rəqib “Vitorul” olub. Bu dəfə 1 qol “Zirə”yə kifayət etməyib. Orxan Əliyevin qol vurduğu matçda rumıniyalılar 2:1 hesabı ilə qalib gəlib.
 
Xatırladaq, “Voluntari” ilə matç “Zirə”nin ümumilikdə Türkiyədəki toplanışlar çərçivəsindəki 20-ci yoxlama oyunu olacaq. Azərbaycan təmsilçisi “İnter”lə (indiki “Keşlə”) matçı saymasaq, 18 beynəlxalaq yoxlama görüşündə 7 qələbə qazanan “qartallar” eyni sayda məğlubiyyət alıb və 4 heç-heçə edib. 23 qol vuran zirəlilər 18 top buraxıb.

 
tarix: 18-01-2019 12:57


 
Bütün hüquqlar qorunur. Məlumat internet səhifələrində istifadə edildikdə müvafiq keçidin qoyulması mütləqdir. 2013 © futbolinfo.az