Dövlət Proqramı sayəsində tikilən stadionun son durumu

(+994) 050 678 37 80
(+994) 070 534 65 52

qaynar xətt

Dövlət Proqramı sayəsində tikilən stadionun son durumu - FOTOFAKTLAR

13 yaşlı İmişli stadionu ən rəzil günlərini yaşayır. 2006-cı il martın 23-də açılışı olan arena indi tanınmaz haldadı.

Ulu Öndər Heydər Əliyevin adını daşıyan və fəaliyyətini çoxdan dayandırmış “MKT-Araz” futbol klubunun yeni stadionu kimi istifadəyə verilən arena ölkənin ən yaxşı idman qurğuları sırasında idi. Açılışında ölkə başçısı İlham Əliyevin də iştirak etdiyi stadion cavabdeh şəxslərin məsuliyyətsizliyi üzündən indi üzə çıxarılası deyil.

Müasir Avropa standartlarına tam cavab verən 8500 yerlik stadion "2005-2015-ci illər Dövlət Proqramı"nın tərkib hissəsi, dövlətin qayğısı sayəsində tikilmişdi. Tribunaların hamısının üstü örtülüdü. Burada yeniyetmə futbolçuların təlim mərkəzi, güləş bölməsi də fəaliyyət göstərirdi. Rəsmi açıqlamaya görə, stadionun ərsəyə gəlməsi üçün 2,5 milyon dollar vəsait xərclənmişdi.

“MKT-Araz” İntertoto kubokunda bölgədə UEFA bayrağı altında rəsmi oyun keçirib və görüşü indi Avropada məşhur hakimlərdən olan Güneyt Çakır idarə edib.

Yuxarıdakı qeydlərimiz xoş günlərdən qalma təəssüratdı. Stadionun indiki durumu haqda isə təqdim etdiyimiz şəkillər “danışır”. İmişlidə peşəkar futbol klubu illərdi fəaliyyətini dayandırıb, amma sonradan birbaşa ölkə başçısının müdaxiləsi sayəsində rayonun “Mil-Muğan” komandası I diviziona qaytarılmışdı. Lakin bir il sonra cənab prezidentin tapşırığı da yaddan çıxarıldı, indi İmişlidə futbol adına heç nə yoxdu, yalnız xarabazara çevrilmiş, baxımsız stadion qalıb.

Vəziyyət o qədər nəzarətdən çıxıb ki, hətta stadiondan mərhum Heydər Əliyevin adının yazıldığı lövhələr də götürülüb. Arena baxımsız vəziyyətdə olduğundan, qazondan əsər-əlamət qalmadığından idarəçilər belə addım atıb. Onlar bu şəraiti yaraşdırmadıqlarından stadionun adını “ləğv ediblər”. Halbuki lövhəni götürmək yox, onun daimi olması üçün arenaya diqqət yetirilməli, göz bəbəyi kimi qorunmalı idi.

AFFA-da gecə-gündüz futbolun inkişafından danışırlar, kağız üzərində yalanlarla dolu raportlar verirlər. SOCAR-ın vasitəsilə dövlətin ayırdığı maliyyə AFFA-nın ayırdığı pullar kimi təqdim olunur. Milyonlar xərclənir, regionlarda futbolun inkişafı üçün heç bir iş görülmür, vaxtilə qurulmuş infrastrukturun məhv olmasına göz yumulur. Düzdü, İmişli stadionu assosiasiyanın nəzdində deyil. Lakin ölkədə futbol siyasətini məhz bu qurum müəyyənləşdirir, ona rəhbərlik edir. Bu səbəbdən belə bir arenanın futbolsuz qoyulması, məhvinə şərait yaradılması qəbuledilməzdi.

Elə belə münasibətə, milyonların havaya sovrulmasına görə ikinci dövlət proqramının qəbulu 4 ildi ləngiyir. Deməli, daha qəti addımların atılması zamanı çoxdan yetişib.

FƏRİD