Ölkə futbolu
Əla bazarlıq sayəsində yenilənən rekord
İdman nəticələri ilə etalon yaradan, ölkə klubları üçün hədəfləri böyüdən “Qarabağ” daha bir uğura atdı. Hansısa Azərbaycan klubunun bir oyunçunun satışından 1,6 milyon avro qazanması sıradan hadisə deyil. Ağdamlılar bu rekordla daha bir qınağı üzərindən götürdü.
9 ildi avrokuboklarda qrup mərhələsində oynayan “Qarabağ” indiyədək ciddi satışa nail olmamış, əksər vaxtlarda futbolçularının azad agent kimi gedişini izləmişdi. Bu dəfə isə gözəl nümunəyə nal olmağı bacardı. Ötən il Sabir Buqrin və Mamadu Kanenin satışından yaxşı pul qazanan “Neftçi” kimi, ağdamlılar daha səs-küylü əməliyyatı reallaşdırdı. Məbləğ isə sözügedən iki futbolçunun satışının cəminin iki qatıdı.
Xatırladaq ki, əvvəlki rekord da “Qarabağ”a məxsus idi. Ağdamlılar 2010-cu ildə Vaqif Cavadovu 1 milyon avroya “Tvente”yə (Niderland) satmışdı. 2018-ci ildə isə Dino Ndlovunun Çinin “Çjetyan Qrintaun” klubuna satışından 800 min avro gəlir götürülüb.
Komandanın vacib oyunlar öncəsi əsas hücumçusunu yola salması tənqidlərə səbəb ola bilməz. İbrahima vazkeçilməz biri deyildi və daim azarkeşlərin, mətbuatın narazı olduğu futbolçulardan sayılırdı. “Qarabağ” zatən daha yaxşı forvard axtarışında idi və belədə Vadjinin əla qiymətə satılmasına yalnız sevinmək olar. “Sent-Etyen” gözləniləndən də çox pul ödəməklə hamını təəccübləndirdi və ağdamlılar əla fürsəti qaçırmadığı üçün alqışlanmalıdı.
Həm də nəzərə alaq ki, Vadji cəmi bir il öncə “Haqesund”dan 500 min avroya alınmış futbolçudu. Oynadığı müddətdə komandaya xeyir verən birinin 3 qat artıq məbləğə satılması çox gözəl bazarlıq nümunəsidi. Onun qiymətinin belə qalxmasında bu il Çempionlar Liqası matçlarında məhsuldar oynaması böyük rol oynadı.
“Qarabağ” peşəkar klub kimi özünü isbatlamağa davam edir. Ağdamlılar bu gedişlə sponsorlarını ciddi xərcə salmadan özünü dolandıracaq səviyyə gələcək. İllərdi avrokuboklardan milyonlar qazanan “atlılar” belə əməliyyatlarla daha da irəli gedir.
1,6 milyon avro sıradan məbləğ deyil. Bu, əksər Premyer Liqa klublarımızın illik büdcəsindən, ayrılan, amma hələ heç kimə gəlib çatmayan dövlət yardımından çoxdu…
CAVAD
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Ölkə kuboku2024-04-24 23:00
“Final iki dostun qarşılaşması olacaq” – Qurban Qurbanov
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə futbolu2024-04-25 08:00
Musa Qurbanlı: “Başımı dik tutmağa çalışıram”