Ölkə futbolu
Əldən verilən tarixi şans: “Neftçi” daha yaxşı püşkü yalnız arzulaya bilərdi
“Neftçi” bu qədər uğurlu püşkü ancaq arzulaya bilərdi. Sıradan bir komanda olan “Aris”, tarixinin ən bərbad dönəmlərindən birini keçirən “Rapid” və keçilməsi mümkün rəqib olan “Vaduts”…
Konfrans Liqasına düşmək üçün çox əla imkan varkən, əvəzində nə baş verdi? “Aris” min əziyyətlə keçildi. Bu komandanı hər iki oyunda məğlub etmək lazım ikən təmsilçimiz Bakıda yalnız azarkeşlərin inanılmaz dəstəyi sayəsində işin öhdəsindən gəldi. Eyni ssenari “Rapid”lə görüşdə də yaşandı. Amma ev qələbəsi ümumi uğura kifayət etmədi. Son dəqiqələrdə buraxılan qol, fərqin azalması dünənki cavab görüşündə əhəmiyyətini göstərdi. Halbuki Avstriya təmsilçisi də keçilsəydi, pley-offdakı rəqib olan “Vaduts”u üstələmək daha rahat olacaqdı.
“Neftçi” şansını evdəki matçda əldən verdi. Səfərə 2:0 hesablı qələbəylə yollanmaq mümkün olsaydı, Vyanada ümumi uğuru təmin etmək olardı. O zaman “Rapid” daha riskli oynayacaq, müdafiəsində boşluqlar verəcəkdi. Lakin Bakıda son saniyələrdə vurduğu təsəlli qolu rəqibin işinə yaradı. Əsas vaxtda lazım olan qolu vurdular, əlavə vaxtda isə daha bir dəfə fərqləndilər.
Laurentsiu Regekampf pis məşqçi deyil, amma təcrübəsindən irəli gələn hiyləgərliyi daha çox inkişaf edib. Bakıda azarkeş dəstəyi sayəsində qazanılan qələbədən sonra fərqli danışan rumın, bu dəfə konkret oyunçuları hədəf aldı. Matçöncəsi mətbuat konfransında da məsələni futbolçuların həll etməli olduğunu, öz üzərinə düşəni etdiyini demişdi. Dünən yenə futbolçulara “yükləndi”, məsuliyyəti üzərinə götürmədi.
Tipik məşqçi hiyləsi, özünümüdafiə instinktidir. Sözlərində həqiqət də var, amma bu şəkildə danışmaq komandasıyla yumruq olması gərəkən məşqçiyə yaraşmır. Bu, daha çox öz yaxasını kənara çəkməyə, tənqid hədəfi olmamağa yönəlmiş addımdı.
“Neftçi” Vyanada komanda kimi çox pis oynadı. Rəqib məşqçi aparıcı futbolçularımızın gücünü qiymətləndirib onlara qarşı tədbirlər almışdı, Regekampf isə ilk matçı həmkarından pis analiz etmişdi, bu səbəbdən də dueli məğlub bitirdi. “Rapid” qolları lazımi dəqiqələrdə vurub, pley-offa yüksəldi. Halbuki “Neftçi” də əks-plan hazırlamalıydı.
Hələ ilk oyundan sonra “Neftçi”nin heyətinin yetərsiz olduğunu yazmışdıq, dünən bu, bir daha sübut olundu. Əvəzetməyə layiqli ehtiyat qüvvə olmadığından start “11-liy”inə güvənən Rege yalnız qoldan sonra nəyisə dəyişməyə çalışdı, meydana çıxanlar isə potensialına uyğun çıxış edib məğlubiyyətə əngəl ola bilmədi.
Məşqçi təyinatının, oyunçu transferlərinin yubandığını yayboyu yazarkən məhz bugünləri düşünürdük və haqlı idik. Uğursuzluqda məşqçi və futbolçular qədər rəhbərliyin də günahı var. Xüsusilə püşkün nəticələrinə nəzərə alsaq, “Neftçi”nin tarixi şansı qaçırdığını deməliyik. Bu qədər zəif “Rapid” bir də ələ düşməyəcək.
Regekampf rahatdı – “Aris”i keçdi, “Rapid”lə ev oyununda qələbəyə nail oldu və minimum vəzifəni yerinə yetirdi. Təyinatından ötən zamanı nəzərə alsaq, onu çox qınamaq olmur. Rumın məşqçinin imtahanı ölkə çempionatında olacaq. O, yeni, daha güclü komanda qurmağa məcburdu. Elə bir komanda ki, gələn yay bəhanələrə ehtiyacı olmasın. Lakin bunun üçün heyət mütləq gücləndirilməlidi. İndiki komanda hətta başı Avropaya qarışacaq “Qarabağ”ın əvəzediciləriylə mübarizə aparmağa da yetərli deyil. Bəli, bir neçə yaxşı transfer edilib, amma komandada ciddi çatışmazlıqlar var, rəqabət yoxdu, bəzi mövqelərdə aşkar boşluqlar var.
AĞA