Müsahibə
Reynaldo: "Qarabağ” fərdi oyunçulardan asılı komanda deyil"
Azərbaycan çempionu "Qarabağ"ın futbolçusu …
Azərbaycan çempionu "Qarabağ"ın futbolçusu Reynaldo UEFA Çempionlar Liqasının üçüncü təsnifat mərhələsi çərçivəsində Avsriya "Zalsburq"una qarşı keçirdikləri ilk oyundan (2:1) sonra futbolinfo.az saytının suallarını cavablandırıb:
– Oyun haqda nə deyə bilərsiz?
– Bizim üçün ağır oyun oldu. Əsasən, müdafiədən oynamalı olduq. Əks-hücumlara bel bağlayırdıq. Sevinirəm ki, belə güclü komandaya iki qol vura bildik və vacib qələbə qazandıq.
– Hücumda tək oynayırdız. Bu, sizin üçün çətin deyildi ki?
– Heç bir hücumçu üçün tək oynamaq asan deyil. Özü də bu cür komandaya qarşı. Ancaq ümumilikdə komandamız yaxşı oynadı. Baş məşqçimizin verdiyi tapşırıqların öhdəsindən gəldik.
– Oyunun son dəqiqələrində qırmızı vərəqə ilə cəzalandırılaraq, meydandan qovulduz. Hakimin həmin epizoddakı qərarı ilə razısız?
– Əvvəlcə, həmin epizodun videosuna baxmalıyam. İndi bu barədə bir şey deyə bilmərəm. Hakimin qərarının düzgün və ya səhv olmasını da bilmirəm. Əlbəttə ki, çox təəssüflənirəm ki, növbəti oyunda komandama kömək edə bilməyəcəm.
– Reynaldosuz “Qarabağ” “Zalsburq” səddini keçə biləcəkmi?
– Məni əvəzləyə biləcək futbolçularımız var. Mənim oynayıb-oynamayacağımdan asılı olmayaraq, mərhələni keçməliyik. Hazırlaşmaq üçün qarşıda bir həftə vaxtımız var. Məncə, bu vaxt ərzində yaxşı hazırlaşsaq, “Zalsburq” səddini keçə bilərik.
– Sənin və Admir Telinin yoxluğu komandaya çətinlik yaratmayacaq?
– “Qarabağ” fərdi oyunçulardan asılı komanda deyil. Bizim uğurumuz kollektiv oyunumuzun nəticəsində olur. Əvvəlki qarşılaşmalarda da gördük ki, hər birimizi əvəzləyə biləcək futbolçumuz var.