Ölkə futbolu
Reynaldonun TELİnə QURBAN!
Malta "Valletta"sını həm səfərdə (1:0), həm də evdə…
Malta "Valletta"sını həm səfərdə (1:0), həm də evdə məğlub edən (4:0) "Qarabağ"ın UEFA Çempionlar Liqasının üçüncü təsnifat mərhələsində işi çətin görünürdü. Çünki püşkatma Avstriya çempionu, "Barselona" və "Bavariya" kimi dünya nəhənglərini devirən "Zalsburq"u Ağdam klubu ilə üz-üzə qoymuşdu. Çoxu "atlılar"ın "buğalar" qarşısında şansının yüksək olmadığını bildirirdi. Elə dünyanın məhşur bukmeker kontorları da təmsilçimizin evində oynamasına baxmayaraq, "Qarabağ"a hörmətsiz yanaşmışdı. Ancaq baş tutan qarşılaşmanın sonunda məlum oldu ki, Qurban Qurbanovun "atlılar"ı "buğalar"ı "cütə qoşmağı" bacardı.
Tofiq Bəhramov adına Respublika stadionuna toplaşmış 32 min azarkeş "Qarabağ"ın 2:1 hesablı qələbəsinin şahidi oldu. Matçın başlanğıcında, 2-ci dəqiqədə Danilo Diasın vurduğu qol rəqibdə şok effekti yaratdı. Bakıya "Red Bull" içib qanadlanaraq gələn komandanın Ağdam çaxırının təsirindən başı gicəlləndi. Ötən mövsümdə Premyer Liqada qol kralı olmuş Reynaldo bunun heç də təsadüf olmadığını dünənki oyunu ilə bir daha sübut etdi. Fərdi ustalığı hesabına rəqib futbolçularının başını gicəlləndirən, meydan boyu 3-4 oyunçunu onun dalınca qaçmağa, onları sözün əsl mənasında dolayaraq sarı və qırmızı vərəqə almağa məcbur edən sambaçı möhtəşəm gecənin ən yaxşısı idi. Və biz hələ də düşünürük: Reynaldonun Azərbaycanda nə işi var axı?
Azərbaycan futboluna və "Qarabağ"a Allahın bir lütfü olan Reynaldonun vurduğu qoldan sonra aldığı qırmızı vərəqənin səbəbi isə tamam başqadı: Qarşılaşmanın baş hakimi Sergey Boyko onun sürətinə çata bilmədiyi üçün, matça bütün diqqəti ilə köklənə bilmirdi. Ukraynalı referi təngnəfəs olmuşdu. Meydanın hər tərəfində braziliyalıya yaşıl işıq yanırdı. Ukraynalı referi də onu ancaq "qırmızıda" durdura biləcəyini anladı və bu yolu seçdi.
Bundan başqa qarşılaşmanın hakimi Admir Teliyə matçın ilk hissəsində sarını göstərərək, "hazıraş" demişdi. Albaniyalı müdafiəçi isə day-dayı olan cavanlar kimi uşaq səhvi edərək, Boykoya "məni cəzalandır" dedi. Onun ikinci sarıdan sonra meydandan qovulması Qurban Qurbanovun oyun planlarını alt-üst etdi. Əks halda Qurbanov rəqibin azlıqda qalmasından istifadə edib, yetirmələrini növbəti qola səsləyəcəkdi. Admirin qırmızı vərəqə almasına görə gənc çalışdırıcı ikinci hissədə daha çox müdafiəyə önəm verdi. O, Qara Qarayevin yerinə meydana İlqar Qurbanovu buraxdı. O, müdafiədə güclü oyun sərgiləməsə də, matçın sonlarında möhtəşəm reydi sayəsində Reynaldoya qol ötürməsini verərək, ötən illərdən qalan asistlik bacarığını və hansı mövqedə oynamağa layiq olduğunu nümayiş etdirdi.
Matçın ən yaxşılarından biri də bosniyalı qapıçı İbrahim Şehiç idi. Təcrübəli qapıçının ara-sıra özünəinam nümayiş etdirərək, topla sərbəst davranması stadiona toplaşanların ürəyini ağzına gətirsə də, bunu daha çox komanda yoldaşlarına əlavə ruh yüksəkliyi vermək üçün atılan addım hesab etmək olardı. Rəqibin dəfələrlə fərqlənməsinə imkan verməyən Şehiç uzun illərdən sonra "Qarabağ"ın transfer etdiyi ən yaxşı qapıçı olduğunu sübut etdi.
Dünən gecə meydanda ağıllını dəli, dəlini isə ağıllı edən bir "Qarabağ" var idi. ÇL-in üçüncü təsnifat mərhələsində hələ ki, qələbə qazanan yeganə komanda olan "atlılar" və onun azarkeşləri üçün bu qələbə çox vacib idi. Düzdü, cavab qarşılaşmasında təmsilçimizi həddindən artıq çətin oyun gözləyir. Qurbanovun yetirmələri səfərdən məğlub da qayıda bilər. Sözsüz ki, Admir Telinin, xüsusən də Reynaldonun yoxluğu komandaya baha başa gələcək. Yox əgər təmsilçimiz növbəti mərhələyə adlasa, dünənki oyunda alınan qırmızı vərəqələr Reynaldonun TELİnə QURBAN!
EMİN SƏFƏROV