14 il unudulan, indi təbliğat alətinə çevrilən uşaqlar

Elxan Məmmədov gəzməyə davam edir. Postunu, özünü qorumaq, saxta işgüzar imic formalaşdırmaq istəyən AFFA-nın icraçı vitse-prezidenti rayon-rayon dolaşıb forma paylayır, uşaqlarla görüşür.

Təbii ki, bölgələrə səfərlər, uşaqların diqqətdə saxlanması müsbət məqamdı. Amma bunu hakimiyyətdə olduğu 14 ildə yox, indi etməsi “vitse”nin alt niyyətindən şübhələnməyə əsas verir. Bunu etmək olardısa, vacib idisə, 14 il harada yatmışdı bu cənab? Karyerası boyu etmədiyini bir aya sığışdırırsa, deməli, mümkün imiş, sadəcə, istəmirmiş.

Bölgələrə səfərlər, görüşlər yaxşıdı, lakin bu da yalançı görüntüdü. Uşaqlara forma paylamaqla onları futbolçu etmək olmaz. Gələcək nəslin düzgün inkişafı üçün onlara şərait yaradılmalıdı, formayla, topla təmin etməklə hər şey bitmir. Bu balalar meydanla, savadlı müəllimlərlə təmin olunmalı, qruplar, komandalar halında birləşdirilməli, səviyyəli yarışlarda iştirakları reallaşdırılmalı, xarici turnirlərə göndərilməlidi. Elxan Məmmədov isə bu gün onlardan öz məqsədi üçün istifadə edir, şəkil çəkdirir, rayonların icra başçılarını əhatəsinə yığıb, önəmli şəxs imici qazanmağa cəhd edir.

İcraçı vitse-prezidentin niyyəti aydındır. O, AFFA-da mümkün dəyişikliklərdən sağ çıxmaq, hətta mövqelərini möhkəmləndirmək niyyətindədi. Şəxsi televiziyasına çevirdiyi “CBC Sport”un təbliğatından da çox şeyi anlamaq olur. Guya bu uşaqlara indi qayğı göstərilir ki, bir neçə ildən sonra onlar milli komandalarımıza yüksəlsinlər.

Əvvəla, top, forma paylamaqla uşaq futbolunu inkişaf etdirmək olmaz, bunun üçün sistemli iş lazımdı. Məmmədov isə səriştəsizliyini illərdi sübut edir, onun mənasız layihələrindən fayda görməmişik.

İkincisi, əgər futbolu bu formada inkişaf etdirmək mümkündüsə, 14 il niyə boşa verilib? Məmmədov vəzifəyə gəldiyi gündən eyni addımları atsaydı, indi mili komandamızda misilsiz rəqabət yaşanardı, o vaxt 7-8 yaşı olan uşaqlar hazırda karyerasının pikində olardı. Milli komandamızın son 4 ildəki 2 seçmə mərhələdə cəmi 2 xal toplaması isə belə olmadığını göstərir.

Üçüncüsü, Məmmədov uşaqlarla bağlı təbliğata başlamaqla vaxt istəyir. O, göstərmək istəyir ki, bu uşaqların yetişməsi üçün zaman lazımdı və güvənilsə, çox şeyə nail ola bilər.

Kəsəsi, yeni nağıllar danışmağa başlayıblar. Amma bu nağıllara inanmaqdansa, “Tülkü Həccə gedir”ə baxmaq daha məsləhətlidi. İnanın ki, dərs çıxarmaq, reallıqları görmək üçün həmin cizgi filmi daha məqsədəuyğundu. Nağıllara aldanmaq vaxtı çoxdan bitib, yalançı, yalvarış tipli addımlar futbolun qatilinə mərhəmətə səbəb olmamalıdı. Eddi İsrafilova, almaniyalı türklərə, dağıstanlılara, ukraynalılara qurban verilmiş, gələcəyi oğurlanmış gəncliyimiz unudulmamalıdı.

VÜSAL MAHMUDOV