Ölkə futbolu
Duzlu diyarın duzsuz klubu
Muxtar Respublika olan Naxçıvan bir sıra “ən”lə…
Muxtar Respublika olan Naxçıvan bir sıra “ən”ləri ilə tanınır. Deyilənə görə, ölkədə ən yaxşı duzlardan biri də Naxçıvan duzudu. Ən yaxşı su da burdadı. Ən yaxşı lavaş da Naxçıvandadı. Ölkənin ən sadə toyları, yasları da burada reallaşır. Elə ən duzsuz futbol komandası da Naxçıvandadı.
“Bakı” – “Araz Naxçıvan” qarşılaşması xalq deyimi ilə dağdan gəlib, bağdakıları qovmaq istəyənlərin oyunu idi. Yoxsul “Bakı” ilə matça qələbə istəyi ilə çıxan “Araz Naxçıvan” buna nail ola bilmədi. Ev sahibinin komanda şəkilində oyunu, əzmkarlığı nəticəsində qazandığı 2:1 hesablı qələbə Naxçıvan komandasını gəldiyi yerə göndərdi.
Belə getsə, elitaya hayla gələn Əsgər Abdullayevin komandası Premyer Liqanı vayla tərk edəcək. Naxçıvan təsmilçisinin hazırkı durumu bunu deməyə əsas verir. İlk turda “Neftçi” üzərində 3:0-lıq qələbədən sonra prezidenti Orxan Cabbarov olan komanda çempionluq havasına girmişdi. Amma həmin qələbədən sonra imkan olsa da, heyəti gücləndirmək üçün elə də ciddi bir iş görülmədi. İndi “Araz Naxçıvan” klub rəhbərliyin gördüyü “işin” nəticəsində layiq olduğu yerdə – birinci pillədədi. Təbii ki, bunun üçün Cabbarov turnir cədvəlinə tərsinə baxmalıdı.
Şənbə günü baş tutan qarşılaşmada ciddi bir taktiki gedişlə, nizamlı, komanda oyunu ilə yadda qalmayan naxçıvanlılar nəticə qazanmağın yolunu səs-küy salmaqda görürdü. Həmişəcsvan Ramal Hüseynovun da meydanda futboldan başqa bütün idman növlərindən istifadə etməsini xüsusi qeyd etmək lazımdı. Yəqin ki, AFFA İntizam Komitəsi Hüseynovun ilk hissəsin sonlarında, laysmanın üzərinə şığıyaraq, ona barmaq silkələyib, hədələməsini cəzasız qoymayacaq. Amma bununla hakimləri süddən çıxmış ağ qaşıq hesab etmək olmaz. Ümumi götürsək, qarşılaşmada hakimlərin işi sıfıra bərabər idi. Premyer Liqa oyununu idarə edə bilməyəcək səviyyədə olan İnqilab Məmmədov çox həyəcanlı olduğu üçün düzgün qərarlar verə bilmirdi. Yəqin ki, qarşılaşmanı canlı izləyən Hakimlər Komitəsinin sədri Xaqani Məmmədov da bizimlə eyni fikirdə olar. Ədalət təmsilçisi sanki qarşılaşmanın tez bir zamanda bitməsini arzulayırdı.
Amma bu, “Araz Naxçıvan”ın məğlub olmasının səbəbləri deyil. Çünki hakim hər iki komandaya qarşı düzgün qərarlar verə bilmirdi. Məğlubiyyətdən sonra “Araz Naxçıvan”ın düşərgəsində elə bir sükut yaranmışdı ki, istefa verdiyini açıqlayan Əsgər Abdullayev və bir neçə futbolçu komandanın avtobusuna minməkdən imtina edərək, əsas yola qədər piyada getdilər.
Indi klubda matəm ab-havası var. Qarşılaşmadan sonra futbolçularla azarkeşlərin bir-birini açıq şəkildə təhqir etməsi, baş məşqçiyə qarşı olan sərt fikirlər komandanın özünə gəlməsinə mane olacaq. Növbəti məğlubiyyət isə zəncirvari uğursuzluqların ardını gətirəcək. Futbolçularına yemək verməyən klub prezidenti Orxan Cabbarov indiki durumda onların heç olmasa, şorbasına bir qədər Naxçıvan duzu əlavə etsə, daha yaxşı olar. Yoxsa bu duzsuzluğun çox fəsadları olacaq…
EMİN SƏFƏROV