Ölkə futbolu
19 xallıq fərqlə…
Azərbaycan Premyer Liqasında 30-cu mövsümə yekun vuruldu. Çempionluğunu daha öncədən rəsmiləşdirən “Qarabağ” son turda əsas rəqibi “Neftçi”ni darmadağın edib qızıl medalları boynundan asdı. 19 xallıq fərqlə birinci olan ağdamlılar hamıdan üstün olduğuna şübhə yeri qoymadı.
“Zirə” bürünc medalları son turda təmin etdi. “Qartallar” özü qələbə qazana bilməsə də, “Qəbələ”nin evdə xal itirməsi yerinə düşdü. “Sabah” avrokuboklara vəsiqəni uduzduğu rəqibindən son dəqiqələrdə qol vurub onları medalsız qoymaqla əvəz çıxdı. Beləcə bu komandalar sanki sözləşibmiş kimi heç-heçə etməklə yerlərini qorudu.
“Sumqayıt” bərbad mövsümü layiqli ev qələbəsi ilə yekunlaşdırdı. Son pilləni tutacağı öncədən bəlli olan “Səbail”lə matçdakı darmadağın Aleksey Baqanın zəif təsəllisi oldu. Lakin bu uğur komandaya qələbəyə həsrət “Şamaxı”nı ötməyə imkan verdi.
Bakı klublarının qələbəyə həsrət qaldığı mövsümün son turu hər nə qədər formal olsa da, maraqlı alındı. Bürünc medal uğrunda qiyabi mübarizə, “Qarabağ” – “Neftçi” dueli azarkeşlər üçün yaddaqalan oldu.
Son turda qol vurmaqla bombardir olan Kadi Borges ilk mövsümündəcə adından söz etdirdi. 3 “Qarabağ”lının yer aldığı, ən azı 10 qol vuran 6 futbolçunun yer aldığı siyahıda yerlilərdən kimsənin qərar tutmaması məyus edir. Elə bu statistika da milli komandamızın zəif nəticələrinin səbəbini anlamaq üçün yetərlidi.
Mövsüm bitdi, qarşıda yalnız ölkə kubokunun finalı qalıb. Ardınca yığmanın vacib matçları sıralanacaq, daha sonra avrokubokda mübarizə başlayacaq. Start tarixi hələ də dəqiqləşməyən yeni mövsümün də favoritinin “Qarabağ” olacağını deyə bilərik. Ağdamlılar rəqibləri ilə aşkar fərq yaradıb. Digər komandalar güclənməsə, çempionun da tonusda qalması çətin olacaq.
FƏRİD
- Ölkə futbolu2024-02-08 08:00
Limit oyunu: “Sumqayıt” – “Neftçi” matçının dəhşətli statistikası
- Milli komanda2024-02-08 21:39
Millətlər Liqası: Azərbaycan yığmasının rəqibləri bəlli oldu
- Milli komanda2024-02-09 11:01
“Azərbaycanla bağlı pis xatirələrimiz var”
- Ölkə kuboku2024-02-09 20:56
“Qarabağ”ın yarımfinaldakı rəqibi “Neftçi” oldu