“Sabah”ın yarımmüdafiəçisi Aleksey İsayevin futbolinfo.az saytına müsahibəsi
- Son turda “Zirə” ilə matçda nəhayət ki, komanda mövsümdə ilk xalını qazandı. Səncə, bu xal komandaya təkan olacaq?
- Bu heç-heçənin nəyəsə təkan verib-verməyəcəyini deyə bilmərəm. Yalnız onu deyə bilərəm ki, biz hər oyunumuza qələbə üçün çıxırıq. Bütün komandalar üçün eniş-yoxuşlar olur. Lakin biz dayanmırıq, öz üzərimizdə işləməyə davam edirik.
- Komandanın mövsümə uğursuz start verməsinin səbəbini nədə görürsən? Mövsümün əvvəli olduğu üçün belə nəticələr oldu, yoxsa sadəcə bəxtsizlikdi?
- Yay fasiləsində komandanı 1-2 yox, xeyli sayda oyunçu tərk etdi. Düzdü, onların yerinə gələnlər də kifayət qədər yaxşı futbolçulardı. Lakin bizim bir-birimizə tam uyğunlaşmağımız üçün zamana ehtiyacımız var. Bizim çox mehriban kollektivimiz var. Premyer Liqada hazırkı vəziyyətimizlə barışa bilmərik. Birlikdə çalışaraq, hazırkı vəziyyətdən çıxacağıq.
- Qarşıda uzun marafon var. Səncə, bu itirlmiş xalları sığortalayıb daha yaxşı pillələrdə ola biləcəksiz?
- Hamımız bunun üçün çalışırıq və əminəm ki, buna nail olacağıq.
- Konkret olaraq komandanın builki hədəfi nədir?
- Bizim öz hədəflərimiz var. Amma qoy bu komanda daxilində, öz aramızda qalsın.
- Qarşıdakı oyununuz son çempion “Neftçi”yə qarşıdır. Səncə, qalib gələ biləcəksiz, yoxsa 1 xal da yaxşı nəticə sayılacaq?
- “Neftçi” yaxşı futbolçuları olan əla komandadı. Lakin bayaq da dediyim kimi, biz bütün oyunlara yalnız qələbə üçün çıxırıq. Bir futbolçu və komanda kimi böyümək üçün başqa cür də ola bilməz.
- “Zirə” ilə matçdakı qol epizodunuz çox müzakirə olundu. Bu epizod barədə “Sabah”ın oyunçusu kimi sənin fikirlərin necədir?
- Meydanda hakim var. O qol qərarı verirsə, deməli qoldur. Həmin vaxt əks qərar verilsəydi belə, oyuna davam etməliydik. Hakim meydanda öz işini görür, biz futbolçular da həmçinin. Fikrimcə, hamı bir-birinin işinə hörmətlə yanaşmalıdır.
FƏRİD