Özünüifşa reallaşdı. Dünən AFFA İcraiyyə Komitəsi növbəti yığıncağını keçirdi, gözlənilən qərarları qəbul etdi və oyuncaq qurum olduğunu nümayiş etdirdi. Komitəyə nə diqtə edilmişdisə, ona da səs verdilər. Bir ay öncə limit və əvəzetmə sayı ilə bağlı mövqeyini sərgiləyən İK bu dəfə “qələt etmişəm”ə məcbur edildi.
Ümumilikdə 6 məsələ müzakirə edildi, qərarlar verildi. Amma hamı üçün maraqlı olan iki məsələ var idi. Məhz limit məsələləri maraq doğururdu ki, bu barədə yazacağıq. Bununla belə, digər məsələlərə də biganə qalmaq olmaz.
AFFA-nın Yoxlama və Təftiş Komitəsinin Əsasnaməsi təsdiq olunması gözlənilirdi. Lakin ora sədrin müvəqqəti seçilməsi göstərir ki, AFFA-da islahatlar yayda yekunlaşacaq. Xalid Cavadov bu posta yalnız 3 ay müddətinə əyləşdirilib, deməli, yeni komanda yeni qərarlar verə bilər.
“Kəpəz” və “Turan Tovuz”ın Premyer Liqada iştirakı təsdiqləndi. Sözügedən komandaların, eləcə də AFFA-dan maliyyələşən digər klubların aqibəti müəmma olaraq qaldı. Güman ki, tezliklə bu barədə açıqlama veriləcək, proses başlayacaq, təsdiq üçün isə İK-nın növbəti iclasını gözləməli olacağıq.
Naib Əsədov AFFA-nın İntizam Komitəsinə üzv təyin olundu, lakin onun kimliyi sirr olaraq qaldı. Futbola dəxli olmayan bu şəxs tanışlıq pis olmaz. Ümid edirik, assosiasiya təqdimata gərək duyacaq.
Müvafiq komissiyanın təqdimatına uyğun olaraq, Məlik Həsənov, Xanoğlan Abbasov, Əli Hüseynov və Boris Tibilova təqaüdlərin ayrılması alqışalayiqdi, hər birinin futbolumuzda müəyyən xidmətləri olub.
İcraiyyə Komitəsinin iclasında hansısa klubun rəhbərinin istefa qərarının açıqlanması bir az qəribə göründü. Bəli, Zaur Axundov da komitə üzvüdü, lakin onun “Şamaxı”dan getməsi başqa vaxt da elan oluna bilərdi, məhz bu iclasda reallaşdısa, deməli, tapşırığın gəldiyi yerə “missiya tamamlandı” siqnalı ötürülməliymiş. “Şamaxı”nın Müşahidə Şurasının sədrinin “işlərinin çoxluğu və vaxt məhdudiyyəti ilə əlaqədar” postundan getməsi isə onun başqa klubda görünəcəyi ilə bağlı şaiyələrin üstündən xətt çəkdi. “Vaxtı olmayan adam” hansısa təyinat gözləyə bilməz.
Həmişə İK-nın toplantısından kollektiv şəkil paylaşan AFFA bu dəfə eyni addımı atmadı. Çünki üzvlərin hamısı iclasda deyildi. Xüsusilə Elşad Nəsirovla Elxan Məmmədovun yoxluğu diqqət çəkdi. Ya bu adamların həqiqətən qələmi qırılıb, ya da onlar bir ay öncəki iclasın qərarlarının ləğv olunduğu tədbirdə görünmək istəməyiblər. Sözlərinin keçmədiyi yığıncağa qatılmayan cütlük bununla daha hakimiyyətlərinin davam etmədiyini də etiraf etdilər.
Oğlunu Uşaq Futbol Federasiyasına prezident təyin etdirməklə gözdən düşən, futbolla bağlılığı qalmadığından gələcəkdə İK-da təmsilçiliyi də mümkünsüz olan Rauf Əliyev, eyni zamanda Firudin Qurbanov, Mahir Məmmədov tədbirdə olmayıb, sonuncu iclasdan sonra milli komanda ilə görüşdə görüntülənib. Lakin hətta 5 nəfərin yoxluğu da komitənin iclasının səlahiyyətli olmasını əngəlləmədi. Nizamnaməyə görə, 7 üzv yığıncaqda iştirak edirsə, səlahiyyətli sayılır, dünənki tədbirdə isə 8 nəfər müzakirələrə qatılmışdı.
Təbii ki, günün əsas qərarları limitlə bağlı idi. Qərara alındı ki, 2022/2023-cü il mövsümündə Azərbaycan Premyer Liqasında legioner limiti 7+4 (7 əcnəbi, 4 yerli futbolçu) sistemi ilə tətbiq olunsun.
Həmçinin, beynəlxalq təcrübə, UEFA-nın milli komandalar və klub yarışlarında tətbiq olunan qaydalar nəzərə alınaraq, Azərbaycan Premyer Liqasında 2022/2023-cü il mövsümündən etibarən oyunlarda 5 əvəzetməyə icazə verilsin. Meydanı tərk edən futbolçuların əvəzinə oyuna daxil olan minimum 2 oyunçu yerli statuslu futbolçu olmalıdır.
Aprelin 29-da “beynəlxalq təcrübə”yə nəzər salmayan İK üzvlərinin beləcə bir aya “gözləri açıldı”, həqiqəti görməyə başladılar. Meydana daxil olacaq 5 oyunçudan ikisinin yerli olması barədəki qeyd də yerindədi. AFFA hər şeyi klubların arzusuyla reallaşdırmamalı, milli komandaların da mənafeyini düşünməli, yerli futbolçuların daha çox oyun vaxtı qazanmasına çalışmalıdı.
Ötən yazımızda qeyd etdiyimiz kimi, 6 və ya 7 legionerin oynaması həlledici faktor deyil. Zatən illərlə müxtəlif sistemləri yoxlamışıq, qadağasız çempionatlar da olub, cəmi 3 əcnəbinin çıxış etməsinə icazə verilən mövsümlər də. Aşağı-yuxarı nəticələr eynidi, Azərbaycan futbolunun problemi meydanda legioner saymaqda deyil, daha köklü islahatlara ehtiyac var. İlk olaraq İcraiyyə Komitəsindən başlayaraq, ölkədə futbol siyasətini müəyyənləşdirən bir sıra vəzifələrdə sağlamlaşdırıcı addımlar atılmalıdı. Kosmetik dəyişikliklərlə yalnız vaxt itiririk.
İcraiyyə Komitəsinin qərarlarında müəmmalı qalan məqamlar da oldu. Qurum bir ay öncəki qərarlarını nə təsdiq, nə də ləğv etmədi. Belə ki, aprelin 29-da qərara alınmışdı ki,
2022/2023 mövsümündən klublar sifariş ərizəsinə 14 legioner futbolçu daxil edə bilər. 14 legionerdən əlavə hər legioner üçün sifariş ödənişi 50.000 (əlli min) manat müəyyənləşdiriləcək. 2023/2024 mövsümündən klublar sifariş ərizəsinə 12 legioner futbolçu daxil edə biləcək. 12 legionerdən əlavə hər legioner üçün sifariş ödənişi 50.000 (əlli min) manat olacaq.
Bu şərtlərin “7+4” limitində də keçərli olub-olmayacağı aydınlaşmadı. AFFA-nın açıqlama verməsi lazımdı. 29 aprel qərarlarını dünən xəlvətcə qurumun rəsmi saytından silmək çıxış yolu deyil. Mətbuatda həmin qərarlar yayılıb və indi bu maddələr dəqiqləşməlidi. Rəsmi açıqlama olmasa, sabah suallar meydana çıxacaq və qaydaları pozanlar ittiham ediləcək.
Bütün bunları nəzərə alaraq, İK-nın 31 may qərarlarını natamam sayırıq. İctimaiyyətə bilgi verilməli, müəmmalı məsələlər aydınlaşmalıdı. Klublar transferlər edərkən çətin vəziyyətdə qalmamaq üçün şifahi söhbətlərə yox, rəsmi məlumata istinad etməlidilər. İndiki halda 29 aprel qərarlarının bəzi hissələri qüvvədə qalmış kimi görünür.
VÜSAL MAHMUDOV