MBA “Ulduzlar Oyunu” üçün ehtiyat basketbolçuların adlarını açıqlayıb.
14 ehtiyat oyunçunun yer aldığı siyahıda “Nyu-York Niks”in snayperi Ceylen Branson, “Filadelfiya Siksers”in müdafiəçisi Tayrez Maksi və “Orlando Mecik”in hücumçusu Paolo Bankero yer alıb. Onlar ilk dəfə bu oyunda iştirak edəcəklər.
Bu üç nəfərdən əlavə, Şərq konfransının ehtiyat oyunçular siyahısına Klivlenddən Donovan Mitçell (beşinci dəfə), Bostondan Ceylen Braun (üçüncü), Nyu-Yorkdan Culius Rendl (üçüncü) və Mayamidən Bem Adebayo (üçüncü) daxil ediliblər.
Qərb Konfransının ehtiyat oyunçuları bunlardır: “Varriors”un müdafiəçisi Stiven Körri (onuncu dəfə), “Leykers”ın hücumçusu Entoni Devis (doqquzuncu), “Klippers”in hücumçuları Pol Corc (doqquzuncu) və Kavay Leonard (altıncı), “Sans”ın müdafiəçisi Devin Buker (dördüncü), “Timbervulvs”un mərkəz basketbolçusu Karl-Entoni Tauns (dördüncü) və müdafiəçisi Entoni Edvards (ikinci).
Bu basketbolçular MBA-nın keçən həftə elan etdiyi 10 start oyunçusuna qoşulacaqlar. Qeyd edək k, ehtiyat oyunçular MBA komandalarının 30 baş məşqçisinin səsverməsinin nəticələrinə əsasən müəyyən edilir. Hazırda Rendl və Embiidin zədəsi olduğuna görə, liqanın komissioneri Adam Silver onların əvəzinə 2 nəfəri elan edəcək.