Yevlax sakini Şakir Zəngəzurlu “Şahənşah” və ya “Yevlax daması” adlandırdığı yeni oyunun geniş şəkildə yayılmasını istəyir.
Onun 1995-ci ildə tərtib etdiyi “Şahənşah” elə şahmat üzərində qurulub. Lakin Şakir Zəngəzurlu yeni oyunu ənənəvi şahmatdan fərqləndirir.
Tərtibatçı deyir ki, şahmatdan fərqli olaraq “Şahənşah”da bərabərlik prinsipi daha çox gözlənilir: “Şahmatda qarşı-qarşıya fiqurlar hərəsi biri ağda, biri qara damada dayanır. Burada bərabərlik prinsipi pozulur. Fiqurlar qara xanadadırsa, ağda da o qara xanada dayanmalıdır. Piyadalar da həmçinin – şahmatda ağ şah qarada dayanır, qara şah ağda dayanır. Bunun özü bir nöqsandır. Hər bir fiqurun birdəfəlik yeri olmaldır”.
Şakir bəyin sözlərinə görə, “Şahənşah”da bunun tam əksidir. Həmçinin fiqurların içərisində vəkillər də yer alırlar: “Bu oyunun adını “Şahənşah” qoymuşam. Ona görə ki, şahmatda iki dənə şah var. Bir şah gəlib əgər bayrağı mərkəzə – qızıl xanaya sancırsa, qələbə qazanırsa, o, artıq şahlıqdan düşür. O biri artıq şah olur. Lövhəni 9-9-a hazırlamışam, belədə mərkəzi xana alınır və mərkəzi qırmızı rəngləyirəm. Kim gətirib şahı mərkəzə qoya bilərsə, qələbə qazanır, oyun qurtarır. Hazırda rayon sakinləri arasında bu oyuna maraq artır. Böyükdən-balacaya bir çox insan boş vaxtlarında “Şahənşah” la məşğul olur”.
Rayon sakini Yusif Əsədov da bu variantı bəyənir. Nəriman Əzizli isə uğur qazanmağı da bacarıb: “Mən artıq oyunu tam bilirəm. Yarışlarda iştirak edib 1, 2 və 3-cü yerləri tutmuşam”.
İndi Şakir Zəngəzurlunun əsas istəyi “Yevlax daması”nın daha çox tanınmasıdır.
BƏHRUZ MUSAYEV, YEVLAX