“Araz-Naxçıvan”ın futbolçusu Ramon Maçadonun futbolinfo.az saytına müsahibəsi
– Misli Premyer Liqasının 2-ci turunda “Şamaxı”ya 1:0 hesabı ilə qalib gəldiniz. Bu matçla bağlı fikirləriniz necədir?
– Oyunda qalib gəldiyimiz üçün çox şadam. Çempionatda daha yaxşı davam edə bilmək üçün bu 3 xal çox vacib idi.
– Matçda yeganə qolu siz vurdunuz…
– Əlbəttə ki, bu, mənim üçün vacibdir. Amma komandamızın qələbəsi daha önəmlidir. Bu səbəbdən də 3 xalı əldə etdiyimizə sevinirəm.
– “Neftçi” və “Qəbələ”dən sonra daha bir Azərbaycan komandasında oynayırsız. Özünüzü necə hiss edirsiz?
– 2021-ci ildə Azərbaycana “Neftçi” üçün gəlmişdim. Sonradan “Qəbələ”yə keçdim və orada oynadım. Bura uyğunlaşmaq mənim üçün çox asandır. Mən artıq ölkəni tanıyıram, Bakını bilirəm, Azərbaycan çempionatına bələdəm. Belədə hər şey asanlaşır.
– Yeni mövsümdən gözləntiləriniz necədir?
– Klub, rəhbərlik və komandamız məqsədinə çatmaq üçün hər şeyi edəcək. “Araz-Naxçıvan”ı yaxşı yerlərə gətirmək üçün buradayıq. Mövsümün sonunda turnir cədvəlinin yaxşı pilləsində olmaq istəyirik.
– Elmar Baxşıyevlə bir yerdə çalışmısız. Onun uğurlu olacağını düşünürsüz?
– Mütləq. “Qəbələ”də bir yerdə işlədik və uğurlarımız oldu. Düşünürəm ki, Elmar Baxşıyev çox yaxşı məşqçidir.
FƏRİD
