Ölkə futbolu
"Centlmen oyunu" və naməlum şəxs
Qəbələyə 1 sutkalıq səfərinin 27 faizinin yola, 17 faizini isə…
Qəbələyə 1 sutkalıq səfərinin 27 faizinin yola, 17 faizini isə yuxuya həsr etdiyimi nəzərə alsaq, ezamiyyətin məhsuldar alındığını söyləyə bilərəm. Əlbəttə qismən. Təəssüf ki, “Qəbələ” – “İnter” matçından 1 saat əvvəldən stadiona gedərək, qonaq komandanın baş məşqçisi Zaur Svanadze ilə danışmaq cəhdlərim bəhrə vermədi. Paytaxt klubunda hansı vəzifəyə sahib olduğu bilinməyən, ancaq Georgi Nikolovun belə heç vaxt özünə rəva bilmədiyi üslubda davranan Aleksey Barvinski gürcü mütəxəssislə danışmaq üçün göstərdiyimiz bütün cəhdlərimizin qarşısını aldı: “Oyundan sonra”. Əlbəttə, Barvinskiyə oyundan sonra açıqlama almağın mümkünlüyünü, müsahibənin isə baş tutmaq şansının olmadığını başa sala bilməzdik. Qərəz, naməlum şəxs bundan artıq yer ayırmağımıza layiq deyil…
Saat 20:00-da səslənən start fitini bir qədər erkən adlandırmaq olar. Havanın olduqca isti olması, futbolçulara təsirsiz ötüşməyə bilməzdi. Bir qədər irəliyə gedərək, qeyd edim ki, fasilədən sonra havanın sərinləməsi oyundakı sürətdə də öz əksini tapdı. Yəni, qarşılaşma saat 21:00-da start götürsəydi, yəqin fərqli bir mənzərənin şahidi olacaqdıq. Elə bu səbəbdəndi ki, futbolçular istirahətə 2 yox, 4 dəfə yollandılar; iki dəfə də su fasiləsi elan olundu.
Bütövlükdə oyun kobud keçmədi. Bu da başadüşüləndi. Tərəflərin bir-birlərinə qarşı centlmensayağı davranışı hər iki kollektivin Avropa Liqasına hazırlaşması ilə əlaqədar idi. Nəzərə alsaq ki, mövsüm hələ start götürməyib, hər iki komandanın oyununu qənaətbəxş adlandırmaq olar. Xüsusilə, “İnter” müəyyən mənada təəccübləndirdi. Kisəsi boş olan komandanın bu cür mübarizə aparmasını az adam gözləyə bilərdi…
“İnter”in heyətində liderlik yükünü üzərinə götürən Zurab Xizanişvilinin oyunu həqiqətən heyranedici idi. Təcrübəli mərkəz müdafiəçisi keçilməz qala təəssüratı yaratmağı bacardı. 34 yaşlı Xizanişvilinin ən böyük qəbahəti sürət azlığıdı ki, bunu da o, ustalıq və təcrübə hesabına məharətlə sığortalamağı bacarır.
Bakılıların heyətində xoş sözlərə layiq digər futbolçu Nika Kvekveskiri oldu. 23 yaşlı yarımmüdafiəçinin son klubu Gürcüstan “Dila”sı olub. Yüksək texnikaya malik Nikanın fəallığının effekt verməməsinin yeganə səbəbi mərkəzdə və hücumdakı komanda yoldaşlarının futbol savadı baxımından ondan xeyli geri qalmasıdı.
İlkin Sadıqovun mərkəz hücumçusu mövqeyində forma geymək şansının bircə səbəbi var: komanda sanballı forvard transfer edə bilmir. Futbolçunun faydalı iş əmsalına gəlincə, bunu gənc olması ilə əlaqələndirməyin əleyhinəyik. Doğrudu, bu, başqa mövzunun müzakirəsidi, ancaq qısaca deyək ki, perspektiv vəd edən futbolçu 18 yaşında meydanda “at oynadır”.
Yuri Fomenkonun oyununa gəlincə, formasının rəngini görməsəydik, daha çox “Qəbələ”nin dayaq yarımmüdafiəçisi olduğunu söyləmək olardı. “İnter” adına isə qara qəpiklik də xeyri dəymədi.
“Qəbələ”də yaxşı mənada ən çox təəccübləndirən Sergey Zenyov oldu. Estoniya yığmasının futbolçusunun sürəti və texnikasını gördükdə, meydanda hansısa qafqazlının olduğunu düşünmək olardı. Elə qarabuğdayı olması da sözərimizi təsdiqləyən məqamlardandı. Matçdakı yeganə qolun müəllifi Aleksey Antonov olsa da, hələ ki, Viktor Mendinin kölgəsində qalır.
“Qəbələ”nin axsayan mövqeyi isə müdafiə xəttidi. Doğrudu, “İnter” qol sevinci yaşamadı. Ancaq razılaşmaq lazımdı ki, keçmiş “bankirlər” hazırda heç Azərbaycan futbolunun da etalonu deyillər. Mövqe seçimi və oyunçuları paylaşmaqda axsamalar var. Əlbəttə, hələ ki, hazırlıq dönəmi davam edir. Ancaq biz də mövcud vəziyyəti təhlil edirik, futuroloji proqnozlarla məşğul olmuruq.
Avrokuboklara 1 həftə qalmış “Qəbələ” və “İnter”ə təxmini bu cür ümumi qiymət vermək olar: hər iki komanda mərhələ adlaya bilər. Əlbəttə, “Qəbələ”nin ustalıq səviyyəsi daha yüksəkdi. Lakin unutmayaq ki, “İnter”in Xizanişvilisi var.
CEYHUN ƏLİYEV, Bakı – Qəbələ – Bakı
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”
- Ölkə futbolu2024-04-23 08:00
“Səbail” “Sabah”a uduzsa…