Ölkə futbolu
Ölkə başçısı Nurlan Novruzovu əfv etdi
Azərbaycan Respublikasının Prezidenti İlham Əliyev dekabrın 28-d…
Azərbaycan Respublikasının Prezidenti İlham Əliyev dekabrın 28-də “Məhkum edilmiş bir sıra şəxslərin əfv olunması haqqında” Sərəncam imzalayıb. AZƏRTAC xəbər verir ki, Sərəncamda məhkum olunmuş bir sıra şəxslərin, onların ailə üzvlərinin, insan hüquqları üzrə müvəkkilin, insan hüquqlarının müdafiəsi təşkilatlarının Azərbaycan Prezidentinə ünvanlanmış əfv haqqında müraciətlərinə baxıldığı, məhkumların şəxsiyyətinin, səhhətinin, ailə vəziyyətinin, cəza çəkdikləri müddətdə davranışlarının nəzərə alınaraq, humanizm prinsiplərinə əsaslandığı qeyd edilib.
Sərəncama əsasən, azadlıqdan məhrum etmə cəzasına məhkum olunmuş 198 nəfər cəzasının çəkilməmiş hissəsindən azad edilib. Bundan başqa, 3 nəfər islah işləri cəzasının çəkilməmiş hissəsindən, 9 nəfər isə cərimə cəzasından azad olunub.
Əfv olunanlar arasında futbolçu da var. Ötən çempionatın bombardiri olan, hazırda isə “Zirə”də çıxış edən Novruzov Nurlan Zahid oğlu da sevinənlərdəndi. 1993-cü ildə anadan olmuş gənc futbolçu Bakı şəhəri Nəsimi rayon məhkəməsinin 2014-cü il 11 sentyabr tarixli hökmü ilə məhkum edilmişdi. İslah işləri cəzasına məhkum edilmiş Nurlan cəzanın çəkilməmiş hissəsindən azad edilib.
Xatırladaq ki, Novruzov baş vermiş avtomobil qəzasına görə bu aqibətlə üzləşmişdi. Ölkədən çıxışına qadağa qoyulan bu üzdən səfər oyunlarına gedə bilmirdi. Onun milli komandadan kənar qalmasının, Türkiyədə legioner həyatı yaşaya bilməməsinin də gizli səbəbi bu idi. Bu faktı da ilk dəfə futbolinfo.az üzə çıxarmışdı. O vaxt futbolçu xəbəri təkzib etsə də, bugünkü sərəncam kimin haqlı, kimin yalançı olduğunu üzə çıxardı.