Ölkə futbolu
İdman kanallarının sayı: KİV nə düşünür?
“CBC Sport” kanalının ölkənin idman həyatına dax…
“CBC Sport” kanalının ölkənin idman həyatına daxil olması “İdman Azərbaycan” kanalına “əlcək atılması” kimi də səciyyələndirilə bilər. Əhalisi 9 milyon olan bir ölkə üçün 2 idman telekanalının olması çox deyilmi? Bu, rəqabəti artırıb, yoxsa hərəsi öz “əppəyi”ni qazanır? Hər kəsin bir mövqeyi var. Hamı da fikrini daha düzgün sayır. Bəs, ölkə mətbuatının nümayəndələri necə düşünür? Həqiqətənmi 2 telekanalın olması kiçik bir ölkə üçün çoxdu? Tribunanı həmkarlarımıza verək.
İlkin Fikrətoğlu (ATV): "Düşünrəm ki, çox deyil. Rəqabətin olması üçün yaxşı haldı və biz artıq bunu hər iki kanalda müsbət mənada hiss edirik. Tamaşaçıya seçim imkanı verilib. Zövqünə hansı uyğundursa, tələbatına hansı cavab verirsə, o kanala da baxacaq. Məsələn, mən hər ikisinə baxıram. "CBC Sport"dan İtaliya, Hollandiya və milli çempionatımızı, İdman Azərbaycandan isə İngiltərəylə İspaniyanı, habelə boks döyüşlərini izləyirəm. Hər ikisini yaxşı peşəkar yaradıcı ve texniki heyəti var".
Sənan Abdullayev (“Xəzər” TV): "Məncə, çox deyil. Bir də ki "CBC Sport"un dövlət tərəfindən maliyyələşməsini ancaq sözdə demək olar. Hər nə qədər qeyri-rəsmi hər şey bəlli olsa da. Sözsüz ki, özəl bir idman kanalının olması daha uğurlu sayılardı. Ancaq özəl dediksə, deməli, bundan pul qazanaraq özünü təmin etməlidi. Azərbaycan idman bazarından isə gəlir əldə etmək yaxın zamanlarda real deyil. Ümumilikdə isə, "İdman Azərbaycan" və "CBC Sport"un hazırkı fəaliyyəti də göstərir ki, çox deyil. Sadə bir nümunə. Tutaq ki, əvvəl olduğu kimi tək "İdman Azərbaycan" var. "Böyük Beşlik" çempionatlarını izləmək istəyənlər sıxlıq üzündən əksər hallarda bir çox oyunlara həsrət qalırdılar. Ya da Azərbaycan çempionatı yayımlanırdısa nələrinsə təxirə düşmək ehtimalı artırdı. Mən hələ ölkədə futboldan da çox izləyicisi olan güləş, boks, cüdo kimi yarışları demirəm. Məsələn, Rusiyanın NTV-si kimi bir kanal olacaqdısa, o əlbəttə, bir telekanal da bəs edərdi".
Kənan Məstəliyev (Rekord.az): "Üzərinə düşəni tamlığıyla yerinə yetirsə, biri də bəsdi. "İdman Azərbaycan"ın etmədiyi, etmək istəmədiyini “CBC Sport” öz üzərinə götürdü və yaxşı da bu boşluğu doldurdu. Məncə, lap 5 belə kanal olsun. Ancaq məsələ dövlət tərəfindən maliyyələşməyə gəldikdə… Daha uzunömürlü olması baxımından seçim olsa, "İdman TV"yə üstünlük verərdim. Çünki konkret dövlət tərəfindən maliyyələşir, büdcə ayrılır. CBC Elxan Məmmədovun layihəsidi. Düzdü, maliyyə SOCAR-dan gəlir. Ancaq “İdman TV” daha etibarlı layihədi. Lakin bu, o demək deyil ki, ordakılar əvvəlki kimi yola verməli, hər şeyi öz istədikləri kimi etməlidilər. Məsuliyyət məsələsi öndədi".
Rüstəm Piriyev (Extratime.az): "Hesab edirəm ki, çoxdu. Ümumiyyətlə, “CBC Sport” kanalının yaradılmasını anlamadım, onun qurulmasının zəruriliyini anlaya bilmədim. Bu haqda çox danışıldı, o cümlədən, AFFA və bəzi digər qurumların özlərinə sərf edən, birbaşa nəzarəti altında ola biləcək bir kanalın yaratması haqqında mülahizələr yarandı. Bunun nə dərəcədə doğru olub-olmamasını söyləmək çətindi, amma fakt budu ki, CBC məhz Azərbaycan futbolu üzrə monopoliya yaradıb, çempionat, kubok, futzal və gənclərdən ibarət yığma komandaların oyunlarını yayımlayır. CBC-nin reportajlarının keyfiyyəti daha üstündü. Ancaq bunu kanal rəhbərliyinin və ya AFFA-nın nailiyyəti kimi dəyərləndirmək fikrindən uzağam. Sadəcə, böhran vəziyyətində olan bir ölkədə böyük pulların müqabilində alınan avandanlığın daha qabaqcıl olması ilə əlaqələndirərdim. Yəni, 2015-ci ildə yaranan kanal təbii ki, son model kameralar, PTS-lər və s. texniki imkanlardan yararlanmalıdı. Çünki 20 il əvvəl istifadə olunan avandanlığı istəsəydilər də tapa bilməzdilər.
Ortada keyfiyyət var – bu, faktdı, amma keyfiyyətli görüntüdən başqa qeyri-adi heç nə görmürəm. Tanıdığımız, hörmət etdiyimiz şərhçilər işə cəlb olundu ki, bu da gözlənilən idi. İşsizliyin səviyyəsi artır və “İdman Azərbaycan” kanalında və digər idman təşkilatında işləməyən həmkarlarımızistənilən halda CBC-yə üz tutmalı, ya da başqa sahəyə keçməli idilər. Bu mənada “CBC Sport” uyğun bir vaxtda gözəl kollektiv formalaşdıra bildi ki, bu münasibətlə onları təbrik etmək olar. Ümid edirəm, bu işçilərlə onlar növbəti aylarda daha keyfiyyətli və baxımlı verilişlər hazırlayacaqlar, yalnız HD səviyyəli görüntülərə bel bağlamayacaqlar. Hər halda İtaliya, Rusiya, Hollandiya çempionatlarını pulla alıb, efirə buraxmaq qəhrəmanlıq tələb etmir.
Digər tərəfdən, Azərbaycanda 2-ci idman kanalının yaradılmasını şərtləndirən amillərdən biri də “İdman Azərbaycan”ın öz işində verdiyi çoxsaylı nöqsanlardı: şərhlər sönük və bəzən maraqsız, həvəskar səviyyədə, verilişlərin monoton, eynitipli, köhnəlmiş formatda hazırlanması, həftələrlə boyat yarışların göstərilməsi. Hesab edirəm ki, “İdman Azərbaycan” kanalı rəqiblərinə özü kömək etdi və “yeganə” statusunu itirdi. Vaxtında tənqidlərdən nəticə çıxarsaydılar, “CBC Sport”un yaranmasına ümumiyyətlə, ehtiyac qalmazdı.
Fikirlərimi yekunlaşdıraraq, qeyd edim ki, Azərbaycanda dövlət tərəfindən ikinci idman kanalının yaradılmasına zərurət görmürəm. Sadəcə, “İdman Azərbaycan”ın bazasında daha mükəmməlvə yüksək keyfiyyətli yayım təşkil edə biləcək kanal qurulmasını məqsədəuyğun sayıram. Yeni kanal yaratmaqdansa, köhnənin bazasında daha mükəmməlini yaratmaq olardı. Belədə, xərc də daha az olardı".
Kənan Həsənov (Futbol+): "Ölkədə istər 1, istər 2, istərsə də 22 idman telekanalı olsun. Bu, həlledici məsələ deyil. Kəmiyyət boş şeydi! Əsas olan keyfiyyətdi ki, tamaşaçılar da bunu görmür. Bizim kanallar hadisələrin episentrindən çox-çox uzaqda dayanıblar. Hadisələrin nəbzini tuta bilmirlər. Bəlkə də istəyirlər, amma hamıya bəlli səbəblərdən bunu edə bilmirlər. Nəticədə, efir daxili və xarici yarışlarla doldurulur. Gündəm mövzular isə qalır kənarda. Üzərində “Azərbaycan” damğası varsa, bu ölkənin idmanında, futbolunda baş verən ciddi məsələləri masaya yatırtmağa məhkumsan, buna borclusan! Dartışılası o qədər mövzu var ki… Amma tamaşaçı b unu görmür. Heç kim demir daxili və xarici çempionatları yayımlamayın. Əlbəttə, bu da olmalıdı. Amma daha vacib olan daxildə baş verən olaylara anında reaksiya vermək, səbəblər üzərində gəzişməkdi ki, bunu görmürük. Bu səbəbdən də kiçik ölkədə neçə idman kanalının olmasının mənim üçün ciddi önəmi yoxdu. Efirdə kreativliyə, rəngarəngliyə, gündəmi məşğul edən mövzulara yer yoxdusa, hazırki fəaliyyəin adı günü yola verməkdi".
CEYHUN ƏLİYEV
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?