Müsahibə
“Kəpəz”in sabiq moldovalısı: "Daçiya"nın qələbə qazanmasını istəyəcəm"
“Kəpəz”in Moldovada olmasını bilən moldovalı futbol …
“Kəpəz”in Moldovada olmasını bilən moldovalı futbol adamlarının bəziləri buna biganə yanaşmayıb. Əvvələr ölkəmizdə çıxış edən moldovan futbolçulardan olan İon Arabaci da belələrindən idi. Gəncəlilərin Kişinyovda olmasını eşidən “Kəpəz”in sabiq oyunçusu qərblilərin qaldığı “Aria Hotel”i ziyarət etdi. O, hətta Ramazan bayramı münasibətilə komandanın həkimi Şıxəli Həsənovla Xaliq Mərdanova bayram hədiyyəsi gətirməyi də unutmamışdı. İlk görüşdən səmimi insan təsiri bağışlayan İon müsahibə götürmək istəyimi məmnuniyyətlə qəbul etdi:
– Hazırda nə işlə məşğulsan?
– “Saxan” klubunda çıxış edirdim. Avropa Liqasının birinci təsnifat mərhələsi çərçivəsində Kipr “Apollon”una məğlub olub, mübarizəni dayandırdıq. Hazırda klubsuzam.
– Azərbaycanla bağlı xatirələrin nədi? Kiminləsə əlaqə saxlayırsanmı?
– Komandanın həkimi Şıxəli Həsənov və Xaliq Mərdanovla əlaqələrim var. Orada yaxşı münasibətdə olduğum dostlar çox idi. Əsasən, rus dilini bilənlərlə sosial şəbəkələrdə danışıram. Tədricən həmin əlaqələr itib. Bir də Azər Məmmədovu xatırlayıram. Çox təəssüf ki, o, Moldovaya gəlməyib.
– Azərbaycan futbolunun indiki vəziyyətindən xəbərdarsan?
– Bəli, hətta “Kəpəz” 1-ci dəstədə çıxış edəndə belə izləyirdim. Avroliqada mübarizə aparmağını eşidəndə çox sevindim. “Daçiya” çətin rəqibdi, bu oyunda gəncəlilərə uğurlar arzu edirəm.
– Maraqlıdı, sabahkı qarşılaşmada kimə azarkeşlik edəcəksən?
– Çətin sualdı. Mən vətənpərvər insanam, yəqin ki, az da olsa, “Daçiya”nın qələbə qazanmasını istəyəcəm.
– Bəs reallıqda kimin daha şanslı olduğunu düşünürsən?
– Fikrimcə, ciddi mübarizə gedəcək. İlk matçda “Daçiya” pis nəticə göstərməyib. Əgər 1:1 hesabı ilə başa çatsaydı, yaxşı nəticə qazanmaq olardı. İndidən proqnoz verməyə çətinlik çəkirəm.
– Gələcəkdə səni yenidən Azərbaycan çempionatında görə bilərik?
– Yenidən Azərbaycan çempionatında oynamağa yalnız sevinərdim. Amma indi vəziyyət əvvəlki kimi deyil. Hazırda 31 yaşım var. Futbola peşəkarcasına yanaşıram. Klubsuz olsam da, fərdi məşqlərimi davam etdirirəm.
– Moldovada klubsuz qalmaq təhlükən var?
– Elə bir şey yoxdu, burda məni transfer etmək istəyən komandalar var, amma hələ ki, düşünürəm. Ən yaxşı təklifi dəyərləndirmək fikrindəyəm.
– “Daçiya” – “Kəpəz” oyununu stadiondan izləyəcəksən?
– Dəqiq bilmirəm, oyunun keçiriləcəyi Speya şəhərinə gediş rahat deyil. Ola bilsin, Kişinyovdan avtobus təşkil edilsin. Vəziyyətə baxacam.
– Şəxsi maşının yoxdu?
– Xeyr, heç sürücülük vəsiqəm də yoxdu. (gülür)
– Turist kimi də olsa, Bakıya qayıtmaq istəyərdin?
– Əlbəttə, Bakı çox gözəl şəhərdi. Orada yaşamaq da istəyərdim.
– Kişinyov ilk baxışdan müəyyən qədər Gəncəyə bənzəyir. Sən necə düşünürsən?
– O qədər də bənzətməzdim, Gəncədən fərqli, Kişinyovda hündürmərtəbəli binalar azdı. Oxşar cəhtlər də var: Hər iki şəhər yaşıllıqlarla doludu. Amma Azərbaycanda Gəncədə digər şəhərlərlə müqayisədə yaşıllıq daha çoxdu. Moldova isə başdan-başa yaşıla bürünüb.
– Azərbaycan xalqına burdan nə demək istəyərdin?
– Ancaq xoşbəxtlik və sülh arzu edirəm. Bütün dünyanı əhatə edən siyasi hadisələr sizlərdən də yan keçmir. Oralarla bağlı yaddaşımda xoş xatirələr qalıb.
– Azərbaycanda olduğun müddətdə səni ən çox nə təəccübləndirib?
– Valyuta dəyişmə məntəqələri çox tez bağlanır. Halbuki Moldovada bu məntəqələr gec saatlara kimi işləyir. Həmçinin, Gəncədə taksilər məsafədən asılı olmayaraq, hər yerə 2 manata aparırlar. Bundan başqa, ilk dəfə idi ki, müsəlman ölkəsində bu qədər uzun müddət yaşayırdım. Kafelər, bilyard salonları yalnız kişilər üçündü, qadın görmək qeyri-mümkündü. Amma başa düşürəm, hər yerin öz mentaliteti var. Bu, mənə bir az qəribə gəlmişdi.
Azərbaycan xalqına uğurlar arzu edirəm. Hər zaman sülh və dostluq içində yaşasınlar. Azərbaycanın müsəlman dövlət olmağına baxmayaraq, Gəncədə çoxlu məsçidlərlə yanaşı kilsə də var idi. Mən həmişə gedib, orada dua edirdim. Bu da ölkənizin necə tolerant olduğunu göstərir.
ELMAR ABDULLA-ZADƏ, Moldova, Kişinyov
- Ölkə futbolu2024-02-15 08:35
Rahilə “tərif yağır”: “Yayda gəlsəydi, çempionatın ən yaxşılarından idi”
- Ölkə futbolu2024-02-15 10:47
Marko Veşoviç: “Matçın Azərbaycan üçün əhəmiyyətini anlayırıq”
- Ölkə futbolu2024-02-15 19:45
Qurban Qurbanov: “Bir neçə təklif alsam da…”
- Premyer-liqa2024-02-15 14:27
Premyer Liqada qış bazarlığı – YENİLƏNİR