Ölkə futbolu
Diniyevə gələn zəng və “Kəpəz”i oyuna kökləyən Şişxanov
Dünən səhər saatlarından Kişinyovda olan “Kəpəz&rdqu…
Dünən səhər saatlarından Kişinyovda olan “Kəpəz” Moldovada 1-ci gününü arxada qoydu. Şübhəsiz, ilk gününü gəncəlilər üçün ən ağır saymaq olar. Gecəni yolda keçirən, yuxusuz “Kəpəz” futbolçuları Kişinyovdakı “Aria Hotel”də yerbəyer olduqdan sonra nahar edib, otaqlarına yollandılar.
Oyunçular istirahət etsə də, baş məşqçi Şahin Diniyev və klub rəsmiləri dincələ bilmirdi. Əbəs yerə deyil ki, foyedə klubun müşahidə şurasının üzvü Mikayıl Nərimanoğlunun yanında əyləşən vitse-prezident Mehman Allahveriydyev artıq oturaq vəziyyətdə yatırdı. Rəsmilərin əl-ayağa düşməsinə səbəb komandanın oyunun keçiriləcəyi Speya rayonuna getmək istəməməsi idi. Çünki bura gəncəlilərin məskunlaşdığı yerdən çox uzaq və əlverişsiz yerdə idi.
Yol yorğunluğunu nəzərə alan Diniyev oyunçularına əziyyət vermək istəmirdi. Ona görə də uzun çək-çevirdən sonra qərblilər paytaxtdakı “Zimbru” stadionunda məşq etməyə qərar verdilər. Amma buna kimi Şahin Diniyev və həmkarı Oleq Bejenar “Julian Hotel”də jurnalistlərin suallarını cavablandıracaqdı.
İlk olaraq, KİV nümayəndələri önünüə Diniyev çıxdı. Verilən bütün sualları cavablandıran Şahin bəy sonda moldovalı həmkarlarımıza vaxtilə bu ölkənin “Nistru” klubunda çıxış etdiyini və ona bununla bağlı sual veriləcəyini gözlədiyini də qeyd etdi. O, vaxtilə bir yerdə çıxış etdiyi futbolçular və mütəxəssisləri unutmadığını qeyd etdi.
Diniyev konfransl bitirər-bitirməz moldovalı jurnalistlərdən biri tələsik telefonunu Şahin bəyə uzatdı… Xəttin o biri başında 1989-cu ildə hələ Diniyev futbolçu ikən “Nistru”dakı baş məşqçisi Anatol Teslev idi. Sabiq çalışdırıcısı ilə mülayim-mülayim danışan Şahin bəyin ardınca mətbuat konfransı keçirilən zala gözlənilməz qonaq gəldi. Bu, klubun vitse-prezidenti Adlan Şişxanov idi. 1 həftə əvvəl “Kəpəz”in futbolçusu Kərim Diniyevə “Moldovaya gəl, sənə göstərəcəm” deyən inquş yenə ampulasnda idi.
Yerli jurnalistlərin komandamız əlehinə verdiyi təxribatçı suallardan sonra əsib-coşan Şişxanovun görünür, kəsdiyi başa sorğu-sual yoxdu. Konfransa 2 futbolçusu ilə gələn klubun meneceri o qədər danışdı ki, oyunçular heç bir kəlmə söz də deyə bilmədi. Özündənrazı şəkildə bütün sualları cavablandıran Adlan bəyin yanındakı oyunçuları isə fağır sifəti almışdı. Sanki bu klubda hamı ondan vəzifəsinə görə yox, yaratdığı imicinə görə qorxur.
Konfrans ərzində yeganə müsbət cəhət onun moldovalı jurnalistlərə gəncəli azarkeşləri misal çəkməsi oldu. Sabahkı oyuna az sayda azarkeşin gələcəyini deyən jurnalistə ilk matçda Bakıdan 350 km aralıda yerləşən Gəncədən gələn azarkeşlərin sayını xatırlatdı.
Konfrans başa çatandan otelə qayıdan “Kəpəz” rəsmiləri və jurnalistlər təxinən 2 saatdan sonra yenidən “Aria Hotel”in 1-ci mərtəbəsinə yığıldı. Bu dəfə kollektivə yeni qoşulanlar da var idi. Yatmaqdan üz-gözü şişən gəncəli futbolçuların yol yorğunluğu hələ də canından çıxmamışdı. “Zimbru” stadionunda təxminən, 1 saat davam edən məşqi isə Azrəbaycandan gələn jurnalistlərlə yanaşı, Mikayıl Nərimanoğlu və Mehman Allahverdiyev də izləyirdi.
Məşqdə ən çox diqqət çəkən isə komandanı Kişinyova gələndən bəri bir an da olsun tək qoymayan Şamil Mustafayev idi. Məhz bu qarşılaşmanı izləmək üçün Hollandiyadan Moldovaya gələn “Milli Dəstə” fan-klubunun üzvü təkbaşına oxuduğu bəstələrlə sevimlilərini qələbəyə kökləyirdi. Hətta məşqdən sonra o, Nərimanoğluna Moldova Azərbaycanlıları Konqresinin 50-ə yaxın üzvünü də oyuna cəlb edəcəyini bildirdi. Əvəzində isə Mikayıl bəy bu işdə ona lazımı köməkliyi göstərəcəyini dedi. Soyuqqanlı Nərimanoğlundan fərqli, Allahverdiyev deyəsən, çox təsirlənmişdi. Buna səbəb qərib diyarda doğma şəhərinin komandasının bu gənc oğlan tərəfindən belə dəstəklənməsi idi.
Bundan sonra otelə qayıdan komanda şam yeməyini yeyib, istirahətə çəkildi. Axı, onları vacib matç gözləyir. Artıq elə ab-hava yaranıb ki, Şahin bəydən çox rəqib komandanın meneceri Şişxanov futbolçularımızı oyuna motivasiya edir. Özündənrazı qafqazlının dediyi hər qıcıqlandırıcı sözdən sonra gəncəlilər bu şəxsi susdurmaq üçün sabah təpiyə kəllə atmalı, hər top uğurunda mübarizə aparmalıdı. Əks təqdirdə Şişxanov haqlı çıxacaq…
ELMAR ABDULLA-ZADƏ / Moldova, Kişinyov