"Qarmoşkalı" "gözəlçə"

Saat 13:00. Bakı-Kutaisi aviareysi Gürcüstana enir. Heç bir ciddi yoxlanış yoxdu. Ən qısa zamanda Kutaisinin "Kopitnari" Hava Limanını tərk edirik. "Qəbələ"ni bir də axşam görəcəkdik…

Azərbaycanlı jurnalistlərə təkim olunmuş avtobus Kutaisi küçələrini alt-üst edir. Sürücünün şəhərə bələd olmaması məskunlaşacağımız ünvanı tapmasını yubadır. Bir neçə dəfə əyləci basıb, yerli əhalidən axtardığımız ünvanı soruşan avtobus sürücüsü nəhayət, Likeya qəsəbəsinə daxil olur. Yolların bərbad olması, şəhərin isə 2 özəlliyi diqqətimizi çəkir. Kutaisi büst-bütün yaşıllıqdı, özü də Bakı merinin bu gün doğratdırıb, sabah əkdirdiyi üslubda salınan yaşıllıq yox, təbii, gözəl. Ancaq binaların fasadları, ümumi görünüş, yumşaq desək daha yaxşısını arzulamağa sövq edir.

Kutaisi istisi Kürdəmirdən çox fərlənmirdi. Amma bu, günorta saatlarında idi. Saat 16 radələrində buludlar elə qaş-qabaq tökmüşdü ki, gəl görəsən. Elə "Zestafoni" stadionuna yollanarkən, havanın kəskin şəkildə dəyişməsini gördükdə, əmin idik: "Qəbələ" yağış altında məşq edəcək. Doğrudu qismən yaıldıq: təmsilçimiz yağış yox, leysan altında məşq etdi. Ancaq buranın yağışı məşhur filmdəki ifadəylə üst-üstə düşür: "Dövlət bəyin ölüsü də gözəldi". Əsl yay yağışı idi. 

Deyə bilmərik, Kutaisi yolları daha kala-kötürlüdü, yoxsa "Zestafoni" stadionu. Amma bir-birindən çox fərqlənmədiyini dünənki fotoreportajda oxucularımız da görüb. Düzdü, gürcülər bu şəkillərin çəkilməsini əngəlləməyə çox səy göstərdi. "Bəyin oğurlanması"nda mərhum sənətkarımız Yaşar Nurinin "Brodyaqa"ya dediyi sözlər yerinə düşür: "Sən söhbətini elə". Elə biz də bu üslubda gürcüləri yola verdik.

Roman Qriqorçukun ayaqüstü mətbuat konfransından sonra UEFA-nın hansı ağılla bu stadionda beynəlxalq oyun keçirilməsinə icazə verdiyini anlamasaq da, tribunadakı yerimizi tutduq.

Daha sonra bəlli marşrutla Likeyaya qayıtdıq. Portuqaliya – Uels oyununu bir neçə həmkarımla gecə Kutaisisini gəzmək məqsədilə dolaşarkən, yerli kafelərin birində izlədik. Gecə istənilən şəhər yuxudan qalxan, bir neçə saatdan sonra isə tamamilə libasını dəyişən gözəlçəni xatırladır. Kutaisi də libasını dəyişmişdi: daha istiqanlı, daha gözəl, daha maraqlı. Hətta "qarmoşka" yolları da bu istiliyin kölgəsinə çəkilmişdi. Yerli polislərlə də söhbət etdik, taksi şoferinin nəyə görə futboldan incik düşdüyünü də öyrəndik, kutaisili "qədeşlər"lə "fikir mübadiləsi" də apardıq. Ancaq bütün bunlar barədə Vətənə döndükdən sonra…

CEYHUN ƏLİYEV, KUTAİSİ