Ölkə futbolu
“Qarabağ” uğursuz tendensiyaya son qoya biləcəkmi?
Bu gün Premyer Liqada II tura start veriləcək. Həftənin oyunl…
Bu gün Premyer Liqada II tura start veriləcək. Həftənin oyunları 4 fərqli gündə keçiriləcək və ilk matç Sumqayıtda, şəhərin eyni adlı təmsilçisi ilə son çempion “Qarabağ” arasında baş tutacaq.
19:00. “Sumqayıt” – “Qarabağ”
Hakimlər: RƏVAN HƏMZƏZADƏ, Mübariz Haşımov, Vüqar Bayramov, Mehman Mahmudov.
Əlavə köməkçi hakimlər: Ömər Paşayev, İnqilab Məmmədov.
AFFA nümayəndəsi: Eldəniz Musayev.
Hakim-inspektor: Şaiq Həmidov.
“Kapital Bank Arena” (1350 yerlik).
Bu kollektivlərin son iki mövsümdə ilk dueli Sumqayıtda baş tutub və hər iki halda 3 xalı meydan sahibləri qazanıb. Düzdü, 2014/15 mövsümünün açılış həftəsinə təsadüf edən dueldə “Qarabağ” rəqibini 3 cavabsız qolla üstələmişdi. Lakin matçın gedişində Ağdam klubunun məşqçilər korpusunun kobud səhvi bu zəfərin üstündən xətt çəkdi. Belə ki, oyunun 59-cu dəqiqəsində Qurban Qurbanovun rəhbərlik etdiyi kollektiv əvəzetmə zamanı limiti pozduğuna görə texniki məğlubiyyətlə üzləşdi. Bəs, yenicə başlayan çempionatda necə, “Qarabağ” uğursuz tendensiyaya son qoya biləcəkmi?
Komandalar yeni mövsümdə ilk oyunlarını səfərdə keçirsələr də, fərqli nəticələr əldə ediblər. Belə ki, “Qarabağ” öndə olduğu matçda “İnter”ə uduzduğu halda (1:2), “Sumqayıt” “Zirə”ni üstələyib (1:0). Açığı, Çempionlar Liqasında mübarizəni dayandırdığı üçün əhvalı yerində olmayan ağdamlıların məğlubiyyəti elə də sürpriz sayılmamalıdı. Lakin sumqayıtlıların qələbəsi bir qədər gözlənilməz alındı. Hər halda, bu komanda yay fasiləsində bəzi aparıcı futbolçuları ilə vidalaşması və onların əvəzində daha səviyyəli oyunçuların heyətə cəlb edilməməsi belə düşünməyə əsas verir. Ancaq “Gənclik şəhəri” təmsilçisi əzmkarlıq və məsuliyyətli oyun sayəsində “Zirə”ni məğlub etməyi bacardı.
Samir Abasovun rəhbərlik etdiyi kollektivin “Qarabağ”la dueldə də eyni istəyi ortaya qoyacaqlarını təxmin edirik. Son çempionunun əsas silahı isə futbolçularının ustalıq səviyyəsidi. Avqustun 18-də Avropa Liqasının pley-off mərhələsində “Höteborq”la oynayacağı səfər matçını da düşünməli olan qonaqlar zədədən və əlavə yüklənmədən qaçmağa çalışmalı, eyni zamanda Premyer Liqada ilk qələbələrini qazanmaları üçün əllərindən gələni etməlidirlər.
STATİSTİKA: 16 oyun, +4=2-10, top fərqi 9-31
ÖTƏN MÖVSÜM…
25.10.2015 Sumqayıt – Qarabağ 1:0
16.12.2015 Qarabağ – Sumqayıt 2:2
13.03.2016 Sumqayıt – Qarabağ 0:2
07.05.2016 Qarabağ – Sumqayıt 1:0
OYUNDAN NOTLAR
* “Sumqayıt”ın heyətində zədə səbəbi ilə 3 futbolçu bugünkü matçı buraxacaqlar. Söhbət müdafiəçilər Mikayıl Rəhimovla Bəxtiyar Həsənəlizadən və hücumçu Məhəmməd Qurbanovdan gedir.
* “Qarabağ”ın heyətində zədəli futbolçu yoxdu.
* Heç bir futbolçu cəza səbəbi ilə kənarda qalmayacaq.
* Yay fasiləsində “Qarabağ”ın 2 futbolçusu – Fərhad Vəliyev və Azər Salahlı “Sumqayıt”a keçib. Sonuncu icarə əsasında çıxış edəcək.
* “Qarabağ” “Sumqayıt”ın baş məşqçisi Samir Abasov üçün doğma klub sayılır. Millimizin üzvü fərqli vaxtlarda Ağdam klubunun heyətində 3 mövsüm çıxış edib (2004/05, 2006/07, 2010/11).
REFERİ
Rəvan Həmzəzadənin hakimlik karyerasında idarə etdiyi ilk Premyer Liqa matçı da da “Sumqayıt” – “Qarabağ” dueli olub. Ötən il IX tura təsadüf edən görüş sumqayıtlıların 1:0 hesablı qələbəsi ilə yekunlaşmışdı.
Ümumilikdə götürsək, Həmzəzadə ötən mövsüm “Sumqayıt”ın 5 matçında fit çalıb. Maraqlıdır ki, bunlardan 4-də qələbə qazanan “Gənclik şəhəri” təmsilçisi 1 dueldən də məğlub ayrılıb. “Sumqayıt”a 11, rəqiblərinə 5 “sarı” verən referi 1 matçda da meydan sahiblərinin əlehinə penalti təyin edib.
“Qarabağ” isə Rəvan bəyin baş hakim olduğu 2 oyundan 1-də qələbə qazanıb, digərində uduzub. Ağdamlılara yalnız 1 sarı vərəqə verən Həmzəzadə rəqiblərə 4 “sarı”, 1 “qırmızı” göstərib. Həmçinin “Qarabağ”ın qapısına 1 penalti təyin edib.
FƏRİD
- Premyer-liqa2024-04-14 20:55
“Qarabağ” “Sabah”a uduzdu
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Ölkə futbolu2024-04-14 08:00
“Turan Tovuz” avrokubok mübarizəsinə qayıtdı