Ölkə futbolu
“Qəbələ” üçün yarmarka və ya iştah diş altına düşərsə…
Avropa Liqasının qrup mərhələsinin püşkü atıldıqdan …
Avropa Liqasının qrup mərhələsinin püşkü atıldıqdan sonra “Qəbələ”nin bəxtlə eyni istiqamətdə yol yoldaşı olmadığı üzə çıxdı. Onsuz da, “qırmızı-qaralar”ın ora çatanadək başı daşdan-daşa dəymişdi. Düşünmək olardı ki, “Lill”, “Maribor” kimi əjdahalardan sonra heç olmasa, qrup mərhələsinin püşkatmasında bəxtlərinin gətirəcək. Ancaq yenə də əksi baş tutdu.
“Sent-Etyen”, “Maynts” və “Anderlext”lə mübarizə aparacaq “Qəbələ” üçün bundan da çətin rəqiblər düşə bilərdi. Ancaq həmin “Mançester Yunayted”lə oyun təmsilçimizə maddi cəhətdən (oyunu sal Olimpiya stadionuna, biletin satışını da 3-5 manat aralığında et) yaxşı pul da qazandırdı. Elə bir vəsait ki, bunun qarşılığında Teo Uiksdən birini də almaq olardı…
“Qəbələ”nin təqvimi haqda nə qədər danışsaq da, başlıca məqam bundan ibarətdi ki, qrupda 3 aşkar favorit var. Fransa, Almaniya və Belçika nəhənglərinin kölgəsində qalan Roman Qriqorçukun komandası tam fərqli məqsədlər uğrunda mübarizə aparmalıdı.
Avropa Liqasının qrup mərhələsi “qırmızı-qaralar” üçün ticarət yarmarkası olmalıdı. Bu turnir təmsilçimizin bir neçə üzvünü baha qiymətə Avropa klublarına satmaqda yardımçı olmalıdı. Əlbəttə, fərdi oyunu ümumi nəticəyə qurban verməmək şərti ilə.
Bu gün “Maynts”, “Sent-Etyen”, “Anderlext”in “Qəbələ”nin “dişinə görə” olduğunu iddia etmək qeyri-mümkündü. Özü də ona görə yox ki, təmsilçimizin hazırkı durumu ürəkaçan deyil. Tam əksinə, “Qəbələ” ideal formadadı və heyət sarıdan əziyyət çəkən əyalət təmsilçisinin üzvləri bu performansı uzun müddət qoruya bilməyəcəklər. Rəqiblərdə də isə tam əksi baş verir: hər üç klub yeni-yeni formasını yığmaqdadı və bir neçə həftədən sonra istənilən uzun marafona hazır olacaqlar.
Qqrioqrçukun meydana çıxaracağı oyunçuların sayına baxdıqda da, həyəcanlanmamaq olmur. Komandanın hücum potensialı əzəmətli görünsə də, rotasiyalar üçün seçim yoxdu. Əlbəttə, hər şey pula bağlıdı və indi vəsait var: qrupa düşdükdən sonra klub 3 milyondan artıq pul alacaq. Bu pulun müəyyən hissəsini yeni transferlərə ayırmaq gərəkdi. Ancaq seçim bu dəfə daha çətin olacaq. Azad trasnfer bazarında sanballı oyunçu qalmaz, kluba məxsus futbolçunu almaq üçün vəsait yetməz. Hər halda, komanda güclənməlidi və böyük ehtimalla daha iki əcnəbi yaxın 2 gündə “Qəbələ”nin sıralarına qatılacaq.
Yuxarıda qeyd etdiyimiz “yarmarka” məsələsi isə özünü müsbət tərəfdən göstərmiş futbolçuların satışına hesablanmalıdı. Yəni, “Qəbələ” qarşısına hədəf kimi qrupdan çıxmağı yox, hər oyunda məzmunlu futbol sərgiləmək məqsədi qoymalıdı. Belədə, nəticələr də olacaq. Ancaq komanda təzyiq altında olmayacaq. Hətta qrup mərhələsini xalsız bitirsələr belə, “qırmızı-qaralar” qınaq obyekti ola bilməz. Çünki bu komanda Azərbaycan adına cari mövsüm üçün gözləniləndən də artığını verdi.
Sonda komandamızın təqvim potensialına da nəzər salaq. İlk oyunu səfərdə “Anderlext”ə qarşı keçirməsini “Qəbələ” üçün uğurlu hesab etmək də olar. Çünki belçikalılar hələ ideal formada deyillər və digər iki rəqibdən fərqli, “Böyük beşlik” ölkəsini təmsil etmirlər. Əlbəttə, səfərdən qələbəylə dönmək əla olar, ancaq bərabərlik də “Qəbələ” üçün uğurlu nəticə hesab ediləcək. Amma “qırmızı-qaralar” debüt oyununda aktivlərinə 3 xal yazdırsalar, mütləq “iştah diş altındadı” deyimi yada düşəcək.
CEYHUN ƏLİYEV
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?