Ölkə futbolu
“Neftçi”, radikal islahatları qışa saxla!
“Neftçi”də dəyişim zamanıdı. Tezliklə Bakı k…
“Neftçi”də dəyişim zamanıdı. Tezliklə Bakı klubunda islahatlar reallaşacaq. İslahatların miqyasını proqnozlaşdırmaq isə çətin deyil.
Ötən həftə bir araya gələn klubun müşahidə şurası 5 saatlıq müzakirələrdən sonra bir qərara gələ bilmədi. Detallar açıqlanmadı, yalnız daha bir görüşə ehtiyac duyulduğu bildirildi.
Təbiidi, çünki vəziyyət pik həddə çatıb. Yeni mövsümün startında 3 oyuna qazanılan 3 xal göstərir ki, komanda ötənilkindən fərqlənmir, favoritlərlə ayaqlaşmır, oyun planında ciddi problemlər var. Kəsəsi, komanda futbol oynamır. Axsama idman tərəfində, nəticələrdədisə, baş məşqçi günahkar sayılır, oyunçulardan hesab sorulur.
Maliyyə durumu hər nə qədər pis olsa da, aylıq büdcəsi 13 min manat olan AZAL, bunun təqribən 2 qat çox parayla idarə olunan “Kəpəz”, eləcə də “Qarabağ” və “Qəbələ” istisna olunmaqla, bütün klublar “Neftçi”yə yalnız həsəd apara bilər. Çünki təkcə Vançe Şikovun maaşı hansısa iki klubumuzun büdcəsidi. Rəhbərlik idarəetmə srukturu baxımından kimdənsə geri qalmır, hətta bəzilərinə nümunədi. Bütün bunları nəzərə aldıqda, diqqətlər yenidən baş məşqçiyə yönəlir.
Komandanın oyunu, futbolçular arasında münasibət, klubdaxili ab-hava yaxşı deyil. Bütün bunlar isə birbaşa Vəli Qasımovun məsuliyyət dairəsinə daxildi. Məşqçi xaraktersiz deyil, hətta məncə, dürüst insandı, işində də özünü riski sevən, müəyyən dəst-xəttə sahib biri kimi göstərməyə çalışıb. Lakin Qasımovun ən zəif nöqtəsi transferlərdi, seçdiklərinin əksəryyəti oynatmaq istədiyi futbolu bacarmır. Büdcə xərclənib, nəticə, hətta sabaha ümid də yoxdu. Belədə dəyişiklik qaçılmazdı.
Mən də məşqşiyə vaxt verməyin tərəfdarı olmuşam. Bütün uğur qazanan komandalarımız buna sabitliyin sayəsində nail olub. Ancaq etimadı da layiq olana göstərmək gərəkdi. Qasımov iş başında olduğu bu dönəmdə ümid verəcək nə isə ortaya qoya bilmədi.
“Neftçi”də nələrsə dəyişəcək. Ola bilsin, rəhbərlik bu həftəyə daha bir iclas təyin etməklə hesabat hazırlamağa vaxt sərf edir, eyni zamanda vəziyyətdən çıxmaq üçün yollar arayır. Bəlkə də hesab istəyən sponsorlardan bir çox problemlərin həlli, yığılıb qalan borclardan birdəfəlik qurtulmaq üçün vəd olunan pulların verilməsini gözləyirlər.
İstənilən halda, dəqiqdi ki, komandanı bu vəziyyətdən çıxarmaq, nəticələri yaxşılaşdırmaq üçün yeni baş gəlməlidi. Lakin indiki durumda kim “Neftçi”yə yaxın gələr ki? Mövsümün elə vaxtıdı ki, özünə hörmət edən iddialı məşqçi bu riskə getməz. Kimsə yalançı vədlə gələ bilər, əsl komanda qurmaq istəyən isə buna qol qoymaz. Transferlər edilib, hazırlıq dövrü keçilib. Heyətdəki legionerlərin əksəriyyəti, o cümlədən artıq futboldan doymuş Cavid İmamverdiyev, Araz Abdullayev, Ruslan Qurbanov, Rəhman Hacıyev qovulmalıdı. İndi onlarla vidalaşmaq həm maliyyə itkisidi, həm də heyətin bütünlüklə dağıdılması. Ona görə də klub rəhbərliyi arzuolunmaz durumdadı.
Nə etməli? Zənnimcə, Müşahidə Şurası radikal dəyişikliklərdən qaçmalı, bütün dəyişiklikləri qışa saxlamalıdı. Bu müddətdə məşqçi və futbolçu heyəti özünü sübut etmək üçün son fürsəti dəyərləndirməlidi, alınmasa, artıq dekabrda əsl “Neftçi” yarada biləcək güclü məşqçi gətirilməli, heyət onun istəyinə uyğun olaraq yenilənməlidi. İndi isə komandaya yük olan bəzi futbolçuları qovmaqla digərlərini silkələmək olar.
“Neftçi”də əsas problem idman tərəfi il bağlıdı. İndi hansısa dəyişikliklə problemi çözmək olmaz, onun üstünə yalnız aldadıcı rəng vurmaq olar. Paytaxt klubunun fundamental dəyişikliyə ehtiyacı var – onu isə zamanında etmək lazımdı. Mövsümün əvvəində lazım idi, məsləhət bilinmədisə, qışa kimi də səbr etmək gərəkdi. İsti başla verilən qərar çox problemə səbəb ola bilər.
Bu müddətdə isə “Neftçi” axtarışda olmalıdı. “Ağ-qara”formaya layiq yerli və əcnəbi oyunçular, məşqçilər günbəgün, satbasaat izlənilməlidi. Əks halda, “Neftçi”nin Müşahidə Şurasının indiki heyəti bu tərkiblə çox iclas keçirməyəcək.
AĞA