Müsahibə
Əmrah Çəlikəl: “Respublika stadionunda oynayacağıq”
Avropa Liqasının qrup mərhələsinin ilk oyununu “Dalğa Aren…
Avropa Liqasının qrup mərhələsinin ilk oyununu “Dalğa Arena”da keçirməyi qərara alan “Qarabağ”ın neçə-neçə insanın ölkə çempionunun yanında olmaq istəyinin üzərindən xətt çəkdi. Tofiq Bəhramov adına stadionun ot örtüyünün faciəvi vəziyyətdə olması Ağdam təmsilçisini çıxılmaz vəziyyətdə qoydu. Klubun icraçı direktoru Əmrah Çəlikəl futbolinfo.az saytına verdiyi müsahibədə nəyə görə məhz “Dalğa Arena”nı seçdiklərinə aydınlıq gətirməklə yanaşı, Liberets "Slovan”ı ilə oyun üçün digər ideyaları barədə də danışdı.
– Bildiyiniz kimi, Respublika stadionunun ot örtüyü qənaətbəxş vəziyyətdə deyil. Belədə, iki stadion arasında seçim etməli idik: ya Bakı Olimpiya Stadionu, ya da “Dalğa Arena”. Hər iki meydanın ot örtüyünü nəzərdən keçirdik. Bu qənaətə gəldik ki, üstünlüyü Mərdəkandakı stadiona verək.
– Ancaq Olimpiya stadionunun əməkdaşlarından biri öz "facebook" səhifəsində ot örtüyünün oyun keçirilən günədək tam qaydasında olacağını yazıb…
– Ola bilər ki, qaydasına düşsün. Ancaq biz mövcud vəziyyətə baxıb, qiymət verdik. Riskə getmək istəmədik.
– “Qarabağ”ın avrokubok qarşılaşmalarına 30 min tamaşaçı gəlir. “Dalğa Arena” isə vur-tut 7 min tutuma malikdi. Həmin 23 minlik kütləyə yazığınız gəlmir?
– Əlbəttə, acıyırıq. Elə özümüz də daha iritutumlu stadionda oynamaq istəyərdik. Götürün həmin Bakı Olimpiya Stadionunu: 65 min insan hara, 7 min hara. Ancaq biz ilk növbədə meydanın vəziyyətini nəzərə almalıyıq. Futbolçulara bacardıqlarını, istədiklərini etmələri üçün ideal şərait yaratmalıyıq.
– Bəlkə alternativ gediş edəsiniz: “Dalğa Arena”nın yaxınlığında böyük bir monitor quraşdırıb, futbolsevərləri həmin yerə dəvət edəsiniz. Onların səsi çöldən gəlsə belə, komanda üzvlərinə dəstək olar. Elə azarkeşlər də məmnun qalar.
– Avropa Liqasının qrup mərhələsinin ilk oyunuyla bağlı bir sıra planlarımız var. Onların müəyyən hissəsini həyata keçirə biləcəyik, bəzilərini isə vaxt azlığından çatdıra bilməyəcəyik. İndidən konkret hansı addımları atacağımızı söyləyə bilmərəm.
– Mərdəkana gediş-gəliş olduqca müşkül məsələdi. Azarkeşlər üçün hər hansısa bir metro stansiyası yaxınlığından avtobuslar ayırmaq planlaşdırılıbmı?
– Bəli, belə bir planımız var. Bununla yanaşı da, bir sıra ideyalarımız var. Onu da qeyd edim ki, UEFA bizə yalnız ilk oyunu “Dalğa Arena”da keçirməyə icazə verib. Digər iki qarşılaşmaya gəlincə, həmin görüşləri doğma Tofiq Bəhramov adına stadionda keçirəcəyik.
CEYHUN ƏLİYEV