Ölkə futbolu
Qumar davam edir: 43 qolla “cavab zərbəsi”
Davam edir. Heç nə dəyişməyib. Görünür, AFFA…
Davam edir. Heç nə dəyişməyib. Görünür, AFFA-nın açıqladığı siyahı, başlatdığı araşdırmalar da pul hərisi olanların tamahını kəsməsinə səbəb olmayıb.
I divizionda 13-cü tur unikal statistikalarla yadda qaldı. 7 oyunun hamısı bol qollu, sensasiyalarla zəngin keçdi. Aşkar görünür ki, danışılmış oyunları təşkil edənlər AFFA-nın şübhəlilərin siyahısını açıqlamasından sonra əks-həmləylə güclərini göstərdilər. Bu, həm də o deməkdi ki, 10-15 futbolçunu cəzalandırmaqla bu bazarı bağlamaq olmayacaq. Hüquq-mühafizə orqanları işə girişənə kimi şübhəli oyunlara son qoyulmayacaq.
Turun heç-heçəsiz başa çatması, bütün qarşılaşmaların “üst” gəlməsi ilə qara bazaar təşkilatçıları önəmli siqnal verdilər. Bu, AFFA-ya meydan oxumaqdı – demək istəyirlər ki, bütün komandalara əlimiz girir, istəsək, hamısı arzuladığımız nəticə ilə qurtarar. Oyunların 5-nin “3+”, 2-nin “7+” gəlməsi isə daha maraqlıdı. Mərc oyunları ilə maraqlananlar belə nəticələrin hansı əmsalla ifadə olunduğunu yaxşı bilir.
7 oyuna 43 qol – bəlkə də tarixi nəticədi, amma əsl tarix bu qolların kimlərə neçə milyonlar qazandırmasıdı.
Mübarizə ən pik həddədi. İndi AFFA-nı işbazlarla əsl müharibə gözləyir. Yəqin ki, tezliklə assosiasiyanın özünü bu kimi işlərin təşkilində günahlandıranlar üzə çıxacaq, maraqlı müsahibələr, ittihamlar eşidəcəyik. Nə olursa-olsun araşdırmayla məşğul olanlara dəstək vermək, həqiqi günahkarların üzə çıxarılması üçün səy göstərmək lazımdı. Hətta AFFA-nın bu işdə müəyyən rolu varsa da, işbazlar ifşa olunmalıdı. Belə olanda əvvəl-axır bu işə AFFA-dan dəstək verənlər də kölgədə qala bilməyəcək.
Əslində, divizionun belə vəziyyətə düşməsində birbaşa AFFA məsuliyyət daşıyır. Hansısa yarışda stimul – elitaya qalxan, daha aşağı diviziona düşən – yoxdusa, belədə iştirakçılar özləri “maraq” kəşf edirlər. “Oynamaq naminə oynamaq” olmur, AFFA klubları həvəsləndirə bilmirsə, belədə ortaya başqa maraqlı qüvvələr çıxır. Su qaldığı yerdə iylənir, iylənəndə isə hər tərəfi üfunət basır.
Son turda vurulan qollara, bilərəkdən boşa verilən epizodlara, futbolçuların davranışlarına fikir verin. Hiss olunur ki, məlum qanun layihəsi qəbul olunana kimi işbazlar əməllərindən qalmayacaq. Adı şübhəlilər siyahısına salınan futbolçular ilkin qurbanlardı və böyük qazancların qarşılığında yenə kimlərsə gözardı ediləcək. Qarşıdakı günlərdə siyahı böyüyə də bilər, lakin bu qumar hələ davam edəcək. AFFA işə başlamışkən sona qədər getməlidi.
Yanlışlıqlar ola bilər, mümkündü ki, bəzən heç də şübhə doğuranların hamısı günahkar deyil. Ancaq əvvəl-axır nəticə olacaq.
CAVAD