MFL-dən daha bir ilk: Ulduzlar yığmaları üz-üzə gəldi!

Dünən Bakı Olimpiya Stadionunun süni örtüklü meydançası maraqlı bir qarşılaşmaya səhnə oldu. Avropada, Amerikada bu cür matçlar adət halını alsa da, Azərbaycanda ilk dəfə idi ki, belə qarşılaşmaya şahidlik etdim. Söhbət MFL-in təşkil etdiyi çempionatın “A” və “B” Konferensiyalarında mübarizə aparan ən yaxşı futbolçulardan formalaşmış yığmaların qarşılaşmasından gedir.

Bu, bir ilk idi və təbii ki, bir sıra qüsurlar ortaya çıxmalı idi. Əvvəla, oyunun planlaşdırıldığı kimi, saat 15:00-da başlamamasını qeyd etməliyik. Təqribən 40 dəqiqəlik gecikməylə start götürən görüşün şou xarakterli olmasını meydana çıxan oyunçular qavramamışdı. Bu yöndə onlarla mütləq təbliğat xarakterli söhbətlərin aparılması da vacib məqamlardandı.

Daha bir diqqətçəkən məqam bayram əhval-ruhiyyəsinin yaradılmaması idi. Qarşılaşmaya hansısa ulduzları (həm futbol, həm də tanınmış müğənnilər) dəvət etməklə tədbirə əlavə rəng qatmaq olardı. Ancaq bir daha təkrarlayaq ki, bu, bir ilk idi və atılan addım futbolun təbliği baxımından olduqca əhəmiyyətlidi.

Oyuna gəlincə, “A” Konferensiyasının yığması ilk dəqiqələrdən təşəbbüsə yiyələndi. Ancaq oyunu əks-hücumdan quran “qırmızılar” olduqca ağıllı futbol nümayiş etdirirdi. Ən böyük problem isə emosiyalarla bağlı idi. Hər xırda epizoda çılğınlıqla reaksiya göstərən tərəflər oyun üzərindəki gərginliyi artırırdılar.

Futbolçuların texnikası, qapıçıların qurtarışları, hiyləgər ötürmələr, qüvvətli zərbələr – bütün bunlar olduqca maraqlı görüşün vizit kartı idi. Qarşılaşmada cəmi bir qol vurulsa da, oyunu izləyənlər 50 dəqiqə ərzində gərgin və maraqlı mübarizəyə şahidlik etdilər.

Matçda penalti də təyin edildi, qırmızı vərəqə də göstərildi, top qapı tirinə də tuş gəldi, dirəklərə də. Ancaq futbolçuların həddən artıq emosional olması bu görüşə rəng qata bilməzdi. Çünki şou xarakterli qarşılaşmaların nəticəsinin heç bir əhəmiyyəti yoxdu. Çıx, gözəl futbolunu oyna və nəticədən asılı olmayaraq, bu, yaddaşında unudulmaz bir xatirə kimi qalsın. “Mən uduzmağı bacarmıram”, “Hakim bizi bilərəkdən sıxır” demək heç də çıxış yolu deyil. Çünki yoldaşlıq oyununda hakimlərin hansı marağı ola bilər? “Uduzmağı bacarmıram”a gəlincə, meydana çıxanlar başa düşməlidilər ki, bu cür matçlarda udub-uduzan olmur. İnanmaq istəyərdik ki, növbəti analoji oyunlarda futbolçuların dünənki çılğınlıqlarından əsər-əlamət qalmayacaq.

İlk yarının son dəqiqələrində İlkin Babayev nəhayət ki, “B” Konferensiyasının yığmasının müqavimətini qıra bildi. Bu epizodadək dəfələrlə komandasını real qollardan xilas edən Kamran İskəndərov da “qırmızılar”ın dadına çatmadı.

Fasilədən sonra oyunun ssenarisi dəyişdi. İndi daha çox hücum edən tərəf “B”-lər idi. Lakin cüssəsinə görə, vizavisi Kamran İskəndərova uduzan Musa Musazadə qapıda pişik kimi idi. Yaxın, orta, uzaq məsafələrdən endirilən zərbələrə qolkiper möhtəşəm reaksiya göstərməklə, əbəs yerə “A”-ların qapısında yer almadığını sübut etdi.

Lakin onun komanda yoldaşları bu təzyiq qarşısında daha çox qayda pozuntularına əl atmağa başladılar ki, yekunda cərimə limitini doldurdular. Lakin hakimlərin təyin etdiyi 10 metrlik cərimə zərbəsi nöqtəsinə yaxınlaşan Yadulla Əmirəliyev qapı tirini nişan aldı.

Beləcə, olduqca maraqlı 50 dəqiqəlik mübarizə “ağlar”ın – “A” Konferensiyasının yığmasının 1:0-lıq qələbəsi ilə başa çatdı. Tərəflərdən ən yaxşılara gəlincə, zənnimizcə, bu ada hər iki tərəfdən qolkiperlər – “Yuventus Baku”nun əlcək sahibi Kamran İskəndərov və onun “Underdog”dan olan həmkarı Musa Musazadə layiq idi.

CEYHUN ƏLİYEV