Ölkə futbolu
“Qarabağ” bir addım öndə – mütəxəssislərə görə…
“Böyük oyun” sıradan çıxdıqdan sonra &…
“Böyük oyun” sıradan çıxdıqdan sonra “Qarabağ” və “Qəbələ”nin oyunları daha çox ön plana çıxır. Bu da adıçəkilən komandaların son 2 mövsümdə həm daxili, həm də xarici arenalarda göstərdiyi uğurlu oyunlarla bağlıdı. “Neftçi”nin çöküşündən, “Kəpəz”in özünə gələ bilməməsindən sonra çempionluq yolunda meydanda tək qalmaları da bu komandaları barışmaz rəqibə çevirib.
Hazırda ölkənin ən yaxşı 2 komandası olan “Qarabağ” və “Qəbələ”nin oyunlarına son vaxtlar diqqət yetərincə artıb. Hazrıda turnir cədvəlində də xalları eyni (28) olan tərəflər sabah yenidən üzləşəcək. Çempionluq uğrunda vacib qarşılaşmalardan biri olacaq görüşdə qalib gələn tərəf şəriksiz liderliyə yüksələcək. Məhz bu kimi amilləri nəzərə alsaq, bu gün bizi Suraxanıda amansız mübarizənin gözləcəyini proqnozlaşdırmaq olar.
Vacib oyunöncəsi mütəxəssislərin və jurnalistlərin fikirlərini öyrəndik.
Arif Əsədov (məşqçi):
Bu oyunda “Qarabağ” üçün doğma meydan amilini qabartmaq olar. Bundan başqa, ağdamlılar öz oyununu göstərib, rəqibi topsuz saxlaya bilsə və lider futbolçuları optimal oyununu sərgiləsə, qalib gəlmək şansı böyükdü. “Slovan”dan alınan məğlubiyyətin bu matça təsir edəcəyini düşünmürəm. Oyundan-oyuna fərq var, onlar peşəkar futbolçulardı. Matça necə köklənməkdən də çox şey asılıdı. Digər amil isə “Qarabağ”ın avroliqada daha bir vacib qarşılaşmasının olmasıdı.
Komandanın əsas problemləri müdafiə xətti ilə bağlıdı. İlk oyunda da göründü ki, “Qəbələ” pressinq etməklə “Qarabağ”ın top saxlamağının qarşısını alıb, rəqibi cəzalandıra bilir. “Qırmızı-qaralar” topu ələ keçirən kimi dərhal sürətli əks-hücumlardan istifadə edib, dəyərləndirə bilsə, uğur qazana bilər. Son AÇ-də də gördünüz ki, topu tez ələ keçirib, sürətli hücum quranlar sonda uğur qazanır. 4-5 il əvvəl “Barselona”nın, İspaniya millisinin oyunda dominantlıq edib, qalib gəldiyi oyun tərzi artıq keçmişdə qalıb.Futbol artıq sürət hesabına daha da inkişaf edir. Hər iki klubumuz indi avroliqada çıxış edir. Məhz elə haqqında danışdığımız klublar da qeyd etdiyim səviyyəyə daha yaxındı.
Natiq Muxtarlı (jurnalist):
Azərbaycan çempionatının oyunu Avroliqa qarşılaşması deyil. Bu oyunda hər iki məşqçi məcburiyyətdən meydana 5 yerli futbolçu buraxmalıdır. Təbii, belə olan təqdirdə bu qarşılaşmanın taleyini əsasən yerli futbolçuların oyun keyfiyyəti müəyyənləşdirəcək.
Bütövlükdə oyuna gəldikdə isə yarımmüdafiə xəttində nəzarəti ələ ala biləcək komanda qələbəyə daha yaxın olacaq. Bu baxımdan yanaşsaq, “Qarabağ”ın daha üstün olduğu görünür. Ancaq “köhlən atlar”ın da zəif tərəfi var. Bu da müdafiə ilə bağlıdır. Rəşad Sadıqovun olmaması bu komandanın müdafiəsində bütün nizamı pozur. Çox güman ki, Roman Qriqorçuk da “”Qarabağ”ın bu zəif cəhətindən yararlanmaq üçün taktika düşünəcək. Qurban Qurabnov da müdafiədəki çatışmazlıqdan xəbərdardır. Ona görə də “köhlən atlar”ın yarımmüdafiə xəttinin üzərinə böyük yük düşəcək. Onlar rəqib futbolçuların “Qarabağ”ın cərimə meydançasına daha az yaxınlaşmasına çalışmalıdırlar. Üstəlik, hücumların qurulmasında da böyük güc sərf etməlidirlər. Qurbanovun yarımmüdafiəçiləri bu missiyanı yerinə yetirə bilsələr, qələbə qazanmaq şansları çox olacaq.
Açıq futbolun olacağını gözləmirəm. Böyük ehtimalla komandalar ehtiyatlı davranacaqlar. “Qarabağ” topa sahib olmağa çalışacaq. “Qəbələ” isə pressinq tətbiq edib, əks-hücumlara bel bağlayacaq.
Tahir Süleymanov (mütəxəssis):
"Qarabağ" daha təcrübəli, stabil heyətə malikdir. Son illərin çempionları kimi bu yolu necə getmək lazım olduğunu strateji baxımdan daha yaxşı bilirlər. 3-4 il öncə çempionluq uğrunda 6 klub eyni səviyyədə mübarizə aparırdısa, indi "Qarabağ" üçün bunu etmək daha rahatdır. Çünki, çempionluq yolunda bu titulu qazanmamış təcrübəsiz rəqibi var. "Qarabağ" stabil çıxışını davam etdirə bilsə, növbəti çempionluğunu qazana bilər.
"Qəbələ" oyun səviyyəsi, keyfiyyətlə yanaşı, ilk növbədə psixoloji baxımdan özlərinə qalib gəlməlidirlər. Klub olaraq çempion olmadıqları üçün öz üzərlərində təzyiq hiss edirlər. Çempionatın əvvəlində 6 xal önə çıxmaqlarına baxmayaraq, üstünlüyü 3-4 tura əldən verdilər. Çempionatda rəqabətsizliyi nəzərə alsaq, bu, yolverilməzdir. Klub olaraq çempionluq təcrübələri olmasa da, heyətdə titulu qazanmış futbolçular var. Əzmkarlıq, özünəinam sayəsində qış hazırlığını səmərəli keçirə bilsələr, ilk dəfə Azərbaycan çempionu adını qazana bilərlər.
Çempionluğa oynayan komandaların yalnız müdafiəni düşünməsi mümkün deyil. Çempion olmaq üçün qələbə ruhun olmalıdır. "Qarabağ" öz oyun fəlsəfəsinə sadiq qalacaq və son illərdə olduğu kimi dəst-xəttini qoruyub-saxlayacaqlar. Qısa müddətdə xal fərqini aradan götürməkləri özlərinə inamın, təcrübənin nəticəsidir. "Qəbələ" ilk növbədə stabil çıxış etməlidir. Qısa müddətdə 6 xallıq üstünlüyü əldən verdiklərinə görə çempionluq yolunda böyük zərbə aldılar və psixoloji üstünlüyü "Qarabağ"a verdilər. Müdafiənin keçilməzliyini qorumaq şərtilə hücumda daha aqressiv və yaradıcı oynamaqla çempionluğu qazana bilərlər. Heyətdə texnikalı, oyunu həll edə biləcək futbolçuları var. "Qəbələ" ilk növbədə klub olaraq çempionluğa hazır olmalıdır.
ELMAR ABDULLA-ZADƏ