Kim qazandı, kim itirdi?

Dünən “Zirə” turnir cədvəlinin 4-cü pilləsinə qayıtmaq şansını əldən verdi. “Qəsəbəlilər” “İnter”lə oyunda 1 xalla kifayətləndilər. Adil Şükürovun yetirmələri çempionatda 5-ci qələbələrini qazanmaq məqsədlərini ilk dəqiqələrdən ortaya qoydular.

Çərçivəyə ilk zərbə qonaqlardan – Elnur Abdullayevdən gəldi. Lakin Anar Nəzirov üçün bu, elə də ciddi sınaq olmadı. Ancaq Sezar Meza Kollinin üçgedişli kombinasiyadan sonra endirdiyi qüvvətli zərbə hələ uzun müddət Səlahət Ağayevin gözləri qarşısından getməyəcək. Topun dirəyə dəydiyi an isə səsi Masazırda da eşidildi… ən azından oyunu televiziya vasitəsi ilə izləyən masazırlılar buna and içə bilər.

Qonaqlar Adil Şükürovun yetirmələrinin təklif etdiyi yüksək tempdə futbol oynamaq arzusunda olmadıqlarını hər epizodda nümayiş etdirirdilər. Onlar çətin səfərdən 1 xalla dönməyin əleyhinə deyildilər.  

Baş hakim Orxan Məmmədovun “bankirlər”ə qarşı aqressiv davranması isə başadüşülən deyildi. İki nümunə gətirək. Qarşılaşmanın 19-cu dəqiqəsində referi Pərdis Fərcad Azada gözlənilmədən qırmızı vərəqə göstərdi. Doğrudu, “qarapaltarlı” yanlışlığa yol verdiyini etiraf edərək, vərəqələri səhv saldığını və iranəsilli forvarda “sarı” göstərmək istədiyini bildirib, vərəqələri dəyişdi. Ancaq məsələ burasındadı ki, həmin epizoda görə, heç sarı vərəqə də verilməli deyildi. 

Matçın 30-cu dəqiqəsində isə Vüqar Mustafayev aşkar şəkildə oyundankənar vəziyyətdə olduğu halda, Denis Silvanın üstünə şığıdı və müdafiəçini itələyərək, Səlahət Ağayevlə toqquşmasına səbəb oldu. Nəticədə, top Mustafayevin önünə düşdü və hakim fiti səsləndirdikdən sonra boş qapını nişan aldı. Diqqət! Orxan Məmmədov hadisə yerinə gəlib, Vüqara sarı vərəqə verməyə borclu lduğu halda, sadəcə, cərimə zərbəsi təyin edir. Yalnız Denislə Səlahət rəqib futbolçuya təpki göstərdikdən sonra baş hakim hadisə yerinə baş çəkir və… Hər 3 oyunçuya sarı vərəqə göstərir. Başqa sözlə, “Zirə”nin oyunçusu rəsmi xəbərdarlıq almalı epizodda, Məmmədov qonaq komandanın iki futbolçusunun da sarı vərəqə almasına bilərəkdən şərait yaradır. Deyəsən, “İnter”in liderlər qrupunda qərarlaşması hansısa qüvvələrin maraq dairəsinə daxil deyil və bu üsulla komanda vurulur.

Fasiləyədək tablodakı hesab dəyişməsə də, ikinci hissə komandaların oyununa təsir edəcək hadisəylə başladı. İlk yarıda oyunu istədiyi kimi alınmayan Ağabala Ramazanovun möhtəşəm ötürməsinə hamıdan topa tez yetişən Ruslan Abışov qarşısıalınmaz zərbə endirdi. Bu qol tək “Zirə”nin daha böyük qüvvəylə irəli atılmasını şərtləndirmədi. Zaur Svanadzenin yetirmələri də hesabı qorumağı qərara aldılar və böyük qüvvəylə müdafiəyə çəkildilər.

Topa daha çox nəzarət edən meydan sahibləri olsa da, real qol fürsəti yaxalamaqda çətinlik çəkirdilər. Xüsusilə, Adrian Skarlatakenin ikinci sarı vərəqə alaraq, meydandan qovulmasından sonra “qartallar” daha da həvəsləndi. Ancaq “İnter” inamla müdafiə olunurdu və Səlahət ancaq çıxışlarda özü haqda xatırlatmalar edirdi.

Lakin tarix təkrarlandı və ilk dövrədə olduğu kimi,  “Zirə” yenə də son saniyələrdə məğlubiyyətdən qurtula bildi. Qapıçı meydançası qarşısındakı qarışıqlıqdan istifadə edən Yovan Krneta komandasını məğlubiyyətdən xilas edən qola imza atdı.

Təbii ki, son dəqiqədə əldən verilən 3 xal “İnter” üçün üzücüdü. Ancaq komandanın lokal məqsədi baxımından səfər heç-heçəsi uğurlu nəticədi. Çünki “bankirlər” qarşısına avrokubok zonasına düşmək vəzifəsi qoyub. Bu heç-heçə isə onların 3-cü yerdəki mövqeyini bir qədər də möhkəmləndirdi.

“Zirə” isə itirə-itirə gedir.Ötən il gümüş medal qazanan komanda indi 2-ci pillədən 13 (!!!) xal geri qalır. Başqa sözlə, indidən əminliklə söyləmək olar ki, “Zirə” ötənmövsümkü nəticəni təkrarlaya bilməyəcək.

CEYHUN ƏLİYEV