AZAL-da Ruslan Nəsirli müəmması

AZAL-ın qış fasiləsində yollarını ayırdığı oyunçular rəsmi olaraq açıqlansa da, son günlərdə yayılan məlumatlarda daha bir futbolçunun komandadan getdiyi deyilir. Futbolinfo.az xəbər verir ki, bu, hücumçu Ruslan Nəsirlidi. 

21 yaşlı oyunçu özü də bunu təsdiqləyib: “Bəli, komandadan ayrılıram. İcarə əsasında MOİK-ə keçəcəm. Əlbəttə, AZAL Premyer Liqa klubudu, burada qalmağı istəyərdim. Tərlan müəllim də mənə uğurlar arzuladı, münasibətimizdə də heç bir problem yoxdu”.

Amma ortada müəmmalı bir durum var. Belə ki, baş məşqçi Tərlan Əhmədov fikrini dəyişərək Nəsirlini komandada saxlasa da, futbolçunun bundan xəbəri yoxdu. Ən azı “təyyarəçilər”in mətbuat xidmətinin rəhbəri Eldəniz Yusifovun dediyindən belə anlaşılır: 

“Ruslanın çempionatın sonuna kimi AZAL-la müqaviləsi var. Ola bilər, hansısa kluba icarəyə verək, amma hələ ki, belə bir söhbət yoxdu. O ki, qaldı MOİK-ə keçidi ilə bağlı söhbətlərə, bəli, belə bir variant var idi, amma Tərlan müəllim qərarını dəyişdi və onu komandada saxlayır. Hər şey yanvarın 5-də təlim-məşq toplanışı başlayanda bilinəcək”.