Ölkə futbolu
Oğru elə bağırdı…
Bəzilərini ciddiyə almamaq, onlara baş qoşmamaq da olar. “?…
Bəzilərini ciddiyə almamaq, onlara baş qoşmamaq da olar. “İt hürər, karvan keçər” misalı… Amma görəndə ki, həmin adamlar qədim peşə sahibləridi və öz adını sənə qoymaq istəyir, cavab verməyə bilmirsən.
“Neftçi”dəki “kubok oğurluğu” ilə bağlı yazdıqlarımızdan xəbərdarsız. “Neftçi”nin sabiq prezidenti Sadıq Sadıqovun dövründə qazanılan bütün mükafatların klubun bazasından yoxa çıxması, “Neftçi” İdman Klubu İctimai Birliyinin ofisində peyda olması haqda məlumatı “Futbolinfo” yazmışdı. Və əbədi rəisinin danışan ağzı olan birisi bu biabırçılığa haqq qazandırmaq naminə açıqlama vermək qərarına gəlib.
“Futbol+” qəzetinin bugünkü sayında bizim aşkara çıxardığımız məsələylə bağlı geniş yazı dərc olunub. Orada Sadıqovun dövründə klubda mətbuat katibi, bir müddət yoxa çıxandan sonra qayıdaraq prezidentin müşaviri kimi çalışan Elnur Əşrəfoğlu danışıb. Sadıq bəyin indi baş katib kimi çalışdığı cüdo federasiyasının da mətbuat katibi olan sabiq jurnalist şefinin müdafiəsinə qalxıb. Onun dediklərində özünüifşa məqamları da var.
Sitat: “Belə fikirlər komandanın bugünkü uğursuzluğunu ört-basdır etmək, ictimaiyyətin, azarkeşlərin fikrini yayındırmaq niyyəti güdür. Əvvəla, onu qeyd edim ki, informasiyanı yayan sayt hazırda klubla əməkdaşlıq edir və əsl oğru hansısa bir naməlum adın altında gizlənən jurnalistdi. Heç bir zaman heç kimin qabağından qaçmamışıq və qaçmarıq da. Belə ucuz işlərlə məşğul olanlar qarşısında məni görsünlər. Cavablarını da necə lazımdısa, verəcəm və bildirim ki, uduzan tərəf hazırda futbol meydanında olduğu kimi, bu məsələdə də onlar olacaqlar”.
Elnur iddia etmək istəyir ki, sayt klubla əməkdaşlıq edir və buna görə də klubdan sifariş alıb. Ay bədbəxt, hamını özün kimi bilmə. “Futbolinfo”da hazırda sənin tapşırıq verdiklərinə bənzər jurnalistlər işləyə bilməz. O sizin taktika, sizin üslub idi. Bu açıqlamanla göstərdin ki, hansısa qurumun yox, elə Sadıqovun şəxsi mətbuat katibisən.
“Neftçi”nin uğursuzluğunu gizlətmək üçün hansısa yazı gücsüzdü. Komanda elə gündədi ki, nə yazlrsan yaz, onu turnir cədvəlində yuxarı pilləyə qaldırmaq olmaz. “Neftçi” faciəvi vəziyyətdədi və eyibini örtmək mümkünsüzdü. Bu olayın üzə çıxması isə elə klubun da imicinə zərbədi. Sadıqovun kubokları kürəyinə şələləyib aparması və heç kimin bunun hesabatını istəməməsi də göstərir ki, “Neftçi”nin Müşahidə Şurasının sədri Çingiz Abdullayev və digər rəsmilər də günahkardı. Onlar Sadıqovdan klub yox, xarabalığı təhvil alıblar və hesabat istəyəcək qədər cəsarətləri yoxdu. Elə klub rəsmilərindən heç kimin bu məsələyə reaksiya verməyi bacarmaması, suallardan qaçması faktı da bu qorxaqlığın nəticəsidi.
Bu fikirləri qorxmadan yazıram, amma Sadıq bəyin vaxtı olsaydı, indi qoçuları redaksiyanın qapısını döyəcləyirdi.
Əşrəfoğlu açıqlamasında qeyd edir ki, bunu yazan sayt klubla əməkdaşlıq edir. Burada qəbahətli nə var ki? Təsdiqləyirik. Heç kimdən qorxmadan, çəkinmədən də bunu bəyan edirik. Çünki biz rüşvət almırıq, bir çox layihələrin işıqlandırılması üçün imzalanan müqavilə qarşılığında klubdan reklam alırıq. Sizin vaxtınızdakı kimi rüşvət götürmürük, 20 min dollarlıq media büdcəsini çapıb-talamırıq. O Sadıqovun vaxtında idi ki, az bir qism müqavilə ilə normal reklam pulu, əksəriyyət isə qara mühasibatlıqdan, klub rəsmilərinin şəxsi büdcəsindən rüşvət alırdı.
Burada elə Əşrəfoğlu ilə bağlı vacib bir qeyd etmək yerinə düşər. Səni ki, aləm tanıyır… AzTV-dəki özfəaliyyətin uudulmayıb, “Neftçi”nin reklam pullarından necə faydalanmağın da ən azı media əhlinə bəllidi. Adı 20 min dolların paylandığı məşhur siyahiya düşən və qara qəpik də görməyən onlarla qələm əhli var. Adlarına pul yazılır, klub büdcəsindən çıxır, amma ünvanına çatmırdı. Bəlkə bunun hesabatını verəsən? Hələ yarıbayarı, 2-3 aydan bir çatdırdıqlarını demirəm. Bəlkə bizim də adımıza nəsə etmisən, xəbərimiz yoxdu?
Elnur klub muzeyi haqda danışarkən pafoslu çıxışından qalmayıb: “Futbol klubunun muzeyi yoxdu, həm də muzeydə 66-cı ilin bürünc medalı, Kazbek Tuayevin butsları, Pançik, Bilalovun formaları olmalıdı”.
Doğru qeydlərdi, amma maraqlıdı, bunlar indimi yadınıza düşdü? Bəs, 5 il ərzində “Neftçi”də haranızı günə verirdiz? Yox idisə, niyə yaratmadız? Başınız oyun, hakim almağamı qarışmışdı? Kluba şillə-təpiklə, söyüşlə, təhqirlə, təzyiqlə qazandığınız çempionluqlardan daha çox muzey, baza, stadion lazım idi, niyə o vaxt bunu görmürdüz? Yoxsa pul o qədər çox idi ki, belə “xırda” məsələləri görməyə imkan vermirdi?
Əsl muzeyin “Neftçi” İdman Klubu İctimai Birliyinin inzibati binasında olduğunu qeyd edirsiz. Lap yaxşı, ancaq məntiqli bir cavab gözləyirik: “Neftçi” Futbol Klubunun mükafatlarının ona dəxli olmayan bir muzeydə nə işi var?
Elnur istəmədən oğurluq faktını özü də təsdiqləyir. Amma sualımıza da cavab versin: Sadıq bəy o kubokları öz cibinin pulu ilə alıb ki, hara getdisə, özü ilə aparır?
O ki qaldı xəbərin indi ortaya çıxmasına, Əşrəfoğlu hamını özü kimi bilməsin. Bu yazı hansısa uğuru gözdən salmağa hesablanmayıb, sadəcə, təsadüfən diqqət etdiyimiz foto araşdırmanı labüd etdi. Bunu niyə indiyə kimi görən olmayıb? Hə, bax, bu sualın da cavabı elə Sadıq bəyə bağlıdı. Rüşvət pulları mətbuatın böyük bir qismini elə hala salıb ki, görən də görməməzlikdən gəlib. Yazanı pulla, pula yaxın durmayanı qol gücü, müxtəlif təzyqi vasitələri ilə susdurmusuz, 5 manata mədhiyyə yazanları media kralları etmisiz. Ona görə də bu cür iyrəncliklər baş alıb-gedib, oğurluqlarınız gözdən qaçıb.
Haqqı deyənin, yazanın ağzından vurmağa çalışmayın. Sizin vaxtınızda klub kassasından oğurlanan 40 min dolların, futbolçuların müqavilələrinə aldığından çox məbləğ yazılmasının, işə gəlmədən maaş kartı sahibi olan 17 əməkdaşınızın, 80 min dollarlıq konvert alan rəislərinizin hesabatını verə bilərsizmi? Və ya mətbuat üçün nəzərdə tutulan 20 min dolların hara xərcləndiyini? Müqaviləsi olanlar bir yana, müqaviləsi olmayıb sizin vasitənizlə əlbəəl pul götürənlərin siyahısını açıqlasam, altından çıxa bilərsizmi?
Oturmuşuq yerimizdə. Oğurladığınızı oğurlamısız, yığdığınızı yığmısız, “Neftçi”yə də audit yoxlamasından sonra 3 milyon dollarlıq borc qoyub getmisiz, dövlətin pulunu talamısız. Üzünüzə vurmurlar deyə üzə durmayın. Keşmişiniz də bəllidi, bugününüz də.
VÜSAL MAHMUDOV
- Müsahibə2024-04-18 08:00
Rezabala avrokuboka vəsiqə istəyir: “Səhv etməyə ixtiyarımız yoxdur”
- Ölkə futbolu2024-04-19 21:00
“Sumqayıt” avrokubok iddiasını davam etdirir
- Ölkə futbolu2024-04-19 08:52
Yüksək əmsal “Qarabağ”a əlavə üstünlük verir
- Ölkə futbolu2024-04-18 09:45
Mirzov “Neftçi” ilə yeni müqavilə imzalamayacaq