Roberto Bordin: “Bu nəticəyə layiq deyildik”

Moldovanın “Şerif” klubunun baş məşqçisi Roberto Bordin UEFA Çempionlar Liqasının 3-cü təsnifat mərhələsi çərçivəsində “Qarabağ”a qarşı keçirdikləri cavab oyununu şərh edib. Futbolinfo.az xəbər verir ki, italiyalı mütəxəssis komandasının 1:2 hesablı məğlubiyyətindən sonra bunları söyləyib:

“Prinsipcə, rəqibimizi yaxşı təhlil etmişdik. İlk hissədə intensiv hücumlar qurduq, çoxlu qol vəziyyətləri yaratdıq. İkinci hissədə isə bir az fərqli düşünməyə başladıq. Qol vurmalı idik, hücuma atılmağa məcbur olduq, buna görə də rəqibə daha çox boş sahə verməyə başladıq. “Qarabağ” çox yaxşı, texnikalı komandadı. Topla əla rəftar edirlər. Bununla belə düşünürəm ki, “Şerif” meydanda dominantlıq edən tərəf idi. Daha çox vəziyyət yaratdıq, təəssüf ki, bu şanslardan istifadə edə bilmədik. Oyundan sonra danışmaq çox asandı. Kimisə çıxartmaq, yerinə başqasını salmaq və s. Əgər biz ilk hissədə heç olmasa bir qol vura bilsəydik, oyun tamam fərqli məcrada davam edəcəkdi. Bu nəticəyə layiq deyildik”.