Müsahibə
“Neftçi”yə qarşı necə oynayacağımızı bilirik”
EKOL-un kapitanı Namiq Məmmədkərimov futzal üzrə Yüksə…
EKOL-un kapitanı Namiq Məmmədkərimov futzal üzrə Yüksək Liqanın növbəti turunda “Neftçi” İK-ya qarşı keçirəcəkləri oyun öncəsi Futzal Federasiyasının mətbuat xidmətinə müsahibə verib.
Futbolinfo.az həmin müsahibəni təqdim edir:
– Arxada qalan 4 turla bağlı hansı məqamları qeyd etmək istərdin?
– Turnir cədvəlinə diqqət yetirsək, çempionatın bundan sonrakı mərhələsinin daha maraqlı keçəcəyi dəqiqdir. Üç komandanın aktivindəki xallar 3-ə bərabərdir. Liderin 12, ikinci pillədə yer alan komandanın 9, bizdən öndə qərarlaşan iştirakçının isə 6 xalı var. Növbəti turda “Neftçi”ni məğlub etsək, turnir cədvəlindəki mövqeyimizi bir qədər yaxşılaşdıra bilərik. Bizim üçün üzümüzə gələn turda çox suallara aydınlıq gətiriləcək. Çox maraqlı oyunlar izləyirik, nəticələrlə qarşılaşırıq.
– EKOL əvvəlki mövsümlərə belə başlamazdı. Artıq 3 oyun keçirmisiniz və 2-də məğlub olmusunuz. Bunu nə ilə izah edərdin?
– Komandaların səviyyəsi bir-birinə yaxınlaşıb. Əvvəlki mövsümlərdə bu cür rəqabət görmürdük. Demək olar, “Araz”, “Neftçi” və EKOL arasında keçirilən oyunlar bir qədər gərgin keçirdi. Qalan matçlarımızı rahat başa vururduq. İndi mənzərə fərqlidir. “Marafon Futsal”dan bu cür oyun gözləmirdik. Bu komanda ilə duel göstərdi ki, heç bir iştirakçıya zəif deyib, keçmək olmaz.
– Emin Kürdov müsahibəsində yaradılan qol epizodlarından maksimum istifadə edə bilməməyinizi vurğulayıb.
– Bu problem hər oyunda olacaq. Çünki bizim bəzi futzalçılarımız məşqdəki fəallığını oyuna daşıya bilmir, həyəcanlı olurlar. Məncə, çatışmazlıq bundadır. Bu da nədən irəli gəlir? Çoxdan idi çempionatda bu cür rəqabət olmurdu. Hansısa zəif rəqiblə matçda beş epizodu qaçırsaq da, altıncını vururduq. Bu qədər qeyri-dəqiq oynasaq da, yekunda böyükhesablı qələbə qazanırdıq. Ona görə də qaçırdığımız epizodlar gözə görünmürdü. İndi isə ustalıq lazımdı, bu da tədricən düzələcək.
– Növbəti turda əsas rəqibiniz olan “Neftçi” İK ilə qarşılaşacaqsınız. Bu dueldən nə gözləyirsən?
– Rəqibimiz təcrübəli komandadır. Bu komandaların oyunu hər zaman derbi adlandırılıb. “Neftçi”ni analiz etmişik. Bu dəfə necə oynayacağımızı müəyyənləşdirmişik. Əks-hücumlara üstünlük verəcəyik. İlk dəqiqələrdən hücuma atılmaq haqda düşünmürük.
– “Neftçi” də hələ istənilən oyunu göstərə bilmir. Rəqibin heyətində xeyli oyunçu dəyişikliyi olub. Bu amil EKOL-un işinə yarıya bilərmi?
– Bunu nəzərə almışıq. “Neftçi” heyətinə legionerlər dəvət etsə də, hələ öz oyununu tapmayıb. Bizim heyətimizədə isə millinin futzalçıları da var. Komanda şəklində oyunu çıxara, qələbə qazana bilərik. Əsas odur ki, öz oyunumuzu göstərək, onların səhvlərindən istifadə edək.
– Üç oyun keçirmisiniz və cəmi 1 qələbə qazanmısınız. Mövsümün sonunda komandanı hansı pillədə görürsən?
– Bizim üçün yeni mərhələ başlayır. Bundan sonrası daha maraqlı olacaq. İkinci pilləyə yüksəlmək üçün şansımız var.
– Bu dəfə mərkəzi oyun canlı yayımlanacaq. Parketin mavi erkana daşınması oyunlara nə kimi təsir edir?
– Müsbət mənada təsiri çoxdur. Bizim üçün yeni stimul yaranıb. Ekranda ancaq böyük futbolu izləyirdilər. İndi futzalımız da canlı yayımlanır. Oyunlara həvəslə çıxırıq, bilirik ki, bizi həm də ekran qarşısında izləyirlər.
- Ölkə futbolu2024-04-17 10:49
12 komandalı çempionat: necə etməli?
- Ölkə futbolu2024-04-17 09:23
Mirzov “Neftçi”dən ayrılır: Premyer Liqadan təklifləri var
- Milli komanda2024-04-17 12:23
Yığmamızın baş məşqçi postuna isveçrəli namizəd
- Ölkə futbolu2024-04-16 17:02
Lunyovun meneceri: “Qarabağ”dan təklif gözləyirik”