Ölkə futbolu
Nərimanoğlunu “Kəpəz”dən audit yoxlamasından sonra qovublar!
Mikayıl Nərimanoğlunun “Kəpəz”dən uzaqlaşdırılmas…
Mikayıl Nərimanoğlunun “Kəpəz”dən uzaqlaşdırılması günün ən şok xəbəridi. AFFA-nın mətbuat və ictimaiyyətlə əlaqələr şöbəsinin rəhbərinin Gəncə klubunun Müşahidə Şurasının üzvlüyündən kənarlaşdırılması sıradan olay ola bilməz. Çünki o, klubun faktiki, əsas idarəçisi, assosiasiyanın kluba ayırdığı maliyyənin nəzarətçisi idi.
Futbolinfo.az xəbər verir ki, AFFA-nın rəsmi saytının bu dəyişikliklə bağlı açıqlaması da gülüncdü. Guya ki, “Kəpəz” Futbol Klubunda uşaq-gənclər komandalarının inkişafını gücləndirmək, klubda çalışan məşqçilərin təhsil səviyyəsini yüksəltmək, idarəetmə strukturunu təkmilləşdirmək məqsədilə Azərbaycan Futbol Federasiyaları Assosiasiyasının “Kəpəz” Futbol Klubunun Müşahidə Şurasındakı nümayəndəsi Mikayıl Quluyev (Nərimanoğlu) geri çağırılıb.
Təbii ki, bu, aldadıcı manevrdi. Əsl səbəb başqadı və həqiqəti öyrənmək üçün özəl mənbələrimizi işə salmalı olduq. Bəlli oldu ki, Nərimanoğlu maliyyə yeyintisinə və klubdaxili çəkişmələrə görə “Kəpəz”dən uzaqlaşdırılıb.
Belə ki, mir müddət öncə icraçı direktor Cabir İbrahimovun postundan uzaqlaşdırılması haqda informasiya yayıldı. İşindəki nöqsanlara görə o, klubun meneceri Samir Quliyevlə əvəzlənməli və sonuncuya daha böyük səlahiyyətli verilməli idi. Quliyev klubda baş direktor olmalıydı. Amma 10 gündən çox vaxt keçib, hələ də bu təyinat rrəsmiləşməyib.
Heç rəsmiləşməyəcək də. Gəncənin icra başçısı Elmar Vəliyevin kadrı kimi tanınan İbrahimov Nərimanoğlunun özbaşına islahatından sonra şikayıt edib. O, həm başçıya, həm də AFFA-ya müraciət edərək, Mikayıl bəyin maliyyə məsələlərini araşdırmağı istəyib. Ötən həftənin sonunda AFFA klubu yoxlamaq üçün audit qrupu göndərib və bəzi fırıldaqların üstü açılıb. Yekunda İbrahimov postunda qalıb, Nərimanoğlunun işinə isə xitam verilib.
AFFA-nın saytı “Kəpəz”in Müşahidə Şurasına AFFA tərəfindən təyin olunacaq nümayəndə barədə əlavə məlumat veriləcəyini yazıb. Amma nədənsə Nərimanoğlunun aqibətinin necə olacağı barədə məlumat verilmir. Axı, sırf maliyyə məsələlərindəki problemlərə görə işindən uzaqlaşdırılan birinin assosiasiyada da eyni oyunlardan çıxmadığına kim təminat verə bilər? Ləkələnmiş adamı qorumağa dəyərmi?
P.S.: Qarşı tərəfin də mövqeyini işıqlandırmağa hazırıq.