“Neftçi”ni dağıdanlar hələ çox oyunlardan çıxacaqlar”

"Neftçi"nin sabiq vitse-prezidenti Tahir Süleymanov komandanın son zamanlar yüksəlişdə olmasına münasibət bildirib. 

Futbolinfo.az xəbər verir ki, bu barədə o, “Facebook”dakı hesabında yazı paylaşıb. Tahir bəy yazısında bir sıra məsələlərə toxunub. Həmin yazını təqdim edirik:

"4 oyun, 4 qələbə!
"Neftçi"yə yaraşan budur!
Artıq bəhanələr gətirilmir, nağıllar danışılmır. Söz meydanda deyilir…

Son 3 il idi "Neftçi" adına doğru olanı söyləyirdik, məsləhətlərimizi əsirgəmirdik. "Neftçi"nin böyüklüyünü dərk etməyən diletantlar, futbolu bilməyənlər biabırçı nəticələrə haqq qazandırmaq üçün yüz yola əl atırdılar. Ağlaşma selə dönmüşdü…

Hər altı aydan bir 5-10 transfer edib mövsümdə 15-16 legioner oynadanlar maliyyədən gileylənir, özlərinə 250 minlik xidməti maşın alır, Braziliyadan vurub Paraqvaydan çıxırdılar.

Futbolu kənara qoyub yemək davası edilirdi. Dost-tanışları klubda müxtəlif vəzifələrə yerləşdirib, yumşaq desək "xəbərçi" statusu verilmişdi. "Neftçi"nin illərlə yetişdirdiyi futbolçulara "düşmən" damğası vurub didərgin salındı. Məğlubiyyətlərə baxmayaraq, stadionlara gələn fanat, azarkeşlər "kənar şəxs" adlandırıldı, polisə verildi. Nəticədə çempionluqlar, kuboklar qazanan tarixi "Neftçi" autsayderə çevrildi. Tahir Süleymanovun haqlı fikirləri, tənqidləri ilə bağlı gecə-gündüz SOCAR, AFFA-ya şikayətlər edildi. İctimaiyyətin doğru iradları qəbul olunmadı.

Müasir dövrdə dərin təhlillərə söykənən fikirlər vəsait, gəlir deməkdir. Biz "Neftçi" sevgisini önə çəkərək təmənnasız köməyimizi edir, doğru yol göstərirdik. Bu illər ərzində söylədiklərimizə önəm verən, inanan hər kəsə dərin təşəkkürümü bildirirəm.

Psixoloji təzyiqlərə baxmayaraq "Neftçi"ni uçurumdan döndərən sizlər, haqlı fikirlər, qəti addımlar oldu. Baxmayaraq ki, nağıllara qulaq asan, bizləri düşmən obrazında görənlər də yox deyildi. "Neftçi"nin çörəyini yeyib, müxtəlif saxta profillər açan, keçmiş uğurlara kölgə salmaq istəyənlər də tapılırdı. Çox sayda veteranlar susur, jurnalistlərin həqiqətə söykənən yazıları qərəz kimi qəbul olunurdu…

Üç il ərzində komandanı özləri kimi autsayder edənlərin fonunda hər zaman böyük olan sadiq "Neftçi" fanat, azarkeşləri daha da böyüdü, mətinləşdi. "Neftçi"nin ağ-qara rəngləri kimi ağı qaradan seçməyi bacardı, komandaya sahib çıxdı. Böyük "Neftçi"ni müvəqqəti uğursuzluqlarla kiçiltməyə imkan verilmədi…

Sular tam durulubmu?! Xeyr. "Neftçi"ni dağıdanlar hələ çox oyunlardan çıxacaqlar. Müxtəlif qruplaşmalar qara buludlar kimi "Neftçi"nin üstündən çəkilməyib. Ağ buludlu şəffaf, təmiz, günəşli səmanı təmin etmək üçün "Neftçi"ni qəlblərində daşıyanlar daha diqqətli olmalı, hər sözə, yalana inanmamalıdır.

"Neftçi"nin qələbə ruhunun qayıtması çox gözəldir. Bununla yanaşı qazanılan qələbələr komanda üçün sıradan nəticələr olmalıdır. "Neftçi"ni elə günə salıblar ki, adi ola biləcək (belə də olmalıdır) qələbələr coşquyla qarşılanır. Fanat, azarkeşlərin bu sevinci başadüşüləndi. İndiki qələbələr hər zaman olduğu kimi böyük yolun kiçik cığırları olmalıdır.

"Neftçi"nin böyüklüyü heç vaxt iddiasını azalda bilməz. Dünən bəhanələr gətirib, nağıllar danışan bacarıqsızlar rəqabətsiz çempionatda 4 layiqli qələbənin arxasında gizlənməməlidir. Əks halda böyük qələbələr xəyal görünə bilər…

"Neftçi"nin iddiası 4-cülük deyil, minimum çempionluq, kubok, ölkə futbolunda lider mövqeyini qaytararaq, Avropada sözünü deməsi olmalıdır. Təbii, klub elə hala salınıb ki, bunları həyata keçirmək üçün müəyyən zamana ehtiyac duyulur. Qeyd etdiklərim əvvəlki illər kimi 7-ci yerə bəhanələr gətirib vaxtlarını uzatmaqla deyil, əməli addımlarla olmalıdır. Biabırçı nəticələr fonunda klub "strategiya"sını cızıb "yolumuzu davam edirik" deyənlər unudulmamalıdır.

Bu gün Dreksa, Mujek, Seqoviya, hətta Barqas belə ehtiyatda qala-qala "Neftçi" qələbələrini qazanır. Ehtiyatda oturan legionerlərin toplam qiymətinə Vobay, Almeyda, Ramos səviyyəsində futbolçu gətirmək olardı. Kluba gələn son futbolçular Rəşad Sadiqov, Emin Mahmudovdur. Səlahət Ağayevin zədələnməsindən sonra ümid Rəşad Əzizliyə qalıb. Bununla yanaşı, heyətdə çoxsaylı problemlərə baxmayaraq, 9-10 yaşından "Sabahın Ulduzları"nda yetişən Mirabdulla Abbasov(lar)la qələbələr qazanılır. Bəhanələr gətirilmədən…

Son dörd turda illərdi səsləndirdiyimiz doğru fikirlərimizi əyani olaraq həyata keçirən Tərlan Əhmədov, futbolçular, fanat, azarkeşlərə təşəkkür düşür.

Bu gün haqlı yolda olanlar artıq qalibdir!
Ancaq bu yolu davam etdirib çempionluqları, kubokları qaytarmaq olar.
Çətin yolda "Neftçi"yə uğurlar!
Davamı gəlsin…"