Ölkə futbolu
Fanat ol, qışa kimi tamaşa izlə
“Qarabağ”ın belə günləri çox az olub. Son …
“Qarabağ”ın belə günləri çox az olub. Son illərdə avrokuboklarda qürur mənbəyimiz olan komanda bizi uğura öyrəşdirib.
Həmişə “atlılar”ın oyununa arxayın, ürək rahatlığı ilə baxmışıq. Çünki nəticədən asılı olmayaraq, ağdamlılar bizə tamaşa izlədib. Stadionda, ekran qarşısında zövq verən oyun izləmişik. “Atletiko”dan Madriddə xal alanda da, “Roma”ya səfərdə uduzanda da, “Kopenhagen”i yenəndə də. Heç vaxt nəticəyə görə qorxu, həyəcan olmayıb.
Amma bu gün fərqlidi. Respublika stadionunu dolduracaq azarkeşlər bircə matçlıq tamaşaçı olmağı unutmalıdı. Azı 6 qrup oyunu izləmək üçün hamı fanata çevrilməlidi. Qarabağ, Azərbaycan naminə…
Bu gün fərqlidi. Heyətin yenilənməsi üzündən komanda qismən zəifləyib. Bu azmış kimi, çox ciddi itkilər var – Kintana, Miçel kimi açar oyunçular zədəlidi, bəzi futbolçuların oyununda geriləmə var. Heyətə tam uyğunlaşmayan yenilər də Almeydanın, Pedronun yoxluğunu hiss etdirir.
Qurban Qurbanovun təcrübəsi, bacarığı futbolçuları oyuna kökləmək üçün yetərlidi, özləri də məsuliyyəti başa düşürlər. Lakin onlarla bütünləşmək zamanıdı. “Şerif” o qədər də güclü deyil, amma tərs rəqibdi. Belə komandaları yenmək üçün bəzən məşqçi tapşırıqları, futbolçuların bacarığı kifayət etmir. Ona görə də azarkeş dəstəyi çox vacibdi. Yalnız bütünləşməklə rəqibi darmadağın etmək olar. Emeqaranın ayağına qüvvət verəcək, Rəşadın inamını artıracaq, Qaranı daha soyuqqanlı edəcək, Zubirə ikinci nəfəs gətirəcək, Vaqneri ilhamlandıracaq dəstək gərəkdi.
0:1 əvəzinin çıxılması mümkün nəticədi. Tribunalarda tamaşaçı yox, azarkeş, fanat olsaq, hələ ilk yarıda rəqibin bütün ümidlərini puç edə bilərik. Bircə oyunluq çılğın fanat olmaq lazımdı. Ardınca “Qarabağ” minimum 6 oyunluq tamaşa vəd edir.
AĞA