Filip Ozobiç: “Kimin daha yaxşı olduğunu göstərəcəyik”

“Qarabağ”ın futbolçusu Filip Ozobiç evdə Moldova "Şerif"inə 3:0 hesabı ilə qalib gəldikləri Avropa Liqasının pley-off mərhələsinin cavab görüşündən sonra brifinq keçirib.

Futbolinfo.az xəbər verir ki, 3-cü qolun müəllifi olan xorvatiyalı yarımmüdafiəçi öncə oyunu dəyərləndirib:

– Hesab edirəm ki, iki oyuna görə, biz daha məzmunlu futbol sərgilədik və daha çox layiq olan qalib gəldi. Çox sevinirəm ki, Avropa Liqasının qrupunda oynayacağıq.

– Öz oyunun barədə nə düşünürsən: Fərqlənəcəyini düşünürdün?
– Əlbəttə, qol vurmaq istəyirdim. Sevinirəm ki, fərqlənməyi bacardım. İnanıram ki, qarşıdakı matçlarda da qol vurmağı bacaracağam.

– Bu gün oyuna sanki xüsusi motivasiya ilə çıxmışdınız. Bu, bizə elə gəlirdi, yoxsa..?
– Oyunun əhəmiyyəti çox böyük idi. Tərəzidə Avroliqanın qrupu dayanmışdı. Zənnimcə, bu axşam yaxşı oynadıq.

– Rəqib düşərgədə həmyerlilərin – baş məşqçi və bir futbolçu xorvatiyalı idi. Oyundan sonra onların əlini sıxarkən tərəddüd etmirdin?
– Xeyr. Axı, bu futboldur və hər kəs öz komandasının uğuru üçün çalışır. Bu gün “Qarabağ” qələbəyə daha layiq idi. Yeri gəlmişkən, məni qələbə münasibəti ilə təbrik etdilər və qrup mərhələsində uğurlar arzuladılar.

– Sabah qrup mərhələsinin püşkatmasıdır. Yenidən BATE-ylə qarşılaşmaq istərdinmi?
– Deyə bilmərəm, kimlərlə qarşılaşacağıq. Ancaq onlarla düşsək, kimin daha yaxşı olduğunu göstərməyə çalışacağıq.

– İki dəfə “Qəbələ”nin heyətində Avropa Liqasının qrupunda oynamısan. İndi isə “Qarabağ”la eyni həyəcanı yaşayacaqsan. Hansı komanda ilə oynamaq sənə daha maraqlı gəlir?
– Mən “Qarabağ”ın futbolçusuyam və ən yaxşı oyunumu nümayiş etdirmək istəyirəm. Ümid edirəm ki, çoxlu xal toplayacağıq. (Report)