Ölkə futbolu
Danışır və GÖSTƏRİR “Qarabağ”!
Qurban Qurbanovun baş məşqçi kimi ilk çempionludan so…
Qurban Qurbanovun baş məşqçi kimi ilk çempionludan sonra axıtdığı göz yaşlarını unuda bilmirəm. Bu çalışdırıcı o zaman həmin nəticəyə arzuların zirvə nöqtəsi kimi baxır, hədəfə çatmağın sevincini yaşayırdı. Elə o göz yaşları ilə qələbələri su yoluna döndərdi. Zamanla təcrübə topladı, özünü, komandanı böyütdü. İndi gözlərindən yaş axmır, qəzəb qığılcımları çıxır və nadanların ürəyini yandırır.
Dünənki uğurdan sonra isə Qurban başını dost çiyninə əyib ağlamadı, yumruğunu düyünləyb, havaya qaldırdı, azarkeşlərə tərəf yönəltdi. Qaliblərə yaraşan tərzdə… Gücün birlikdə olduğunu nümayiş etdirərcəsinə… Uğura doymadığını göstərərək, davamını gətirəcəklərinə əminliklə…
“Qarabağ” futbolumuzun vizit vərəqidi, üz qabığıdı. Ardıcıl 5 il Avropa kuboklarında qrupa düşmək Azərbaycan kimi futbolu olmayan ölkələr üçün sensasiyadı. Amma bunu reallığa çevirən, adiləşdirən, gündən-günə hədəf böyüdən bir klub var. Qələbələri ilə rəqibləri əzən, ölkə klubları üçün hədəf böyüdən, onları da rəqabətə, böyüməyə səsləyən “Qarabağ” eyni zamanda müstəqil klubun necə idarə edilməli olduğunu nümayiş etdirir.
Neçə illərdi belədi və davam edir. Hər badalaqdan qaçan, hər zərbəni qəbul edib onu daxili enerjiyə çevirən və hədəfinə yönəldən “Qarabağ” çox şeyi adiləşdirib. Gecəqondudan çıxıb yaxınlıqdakı meqapolisdə kübar həyatı yaşayan yetim kimi bu komanda da xəyallar aləmini reallığa çevirib. 8 komandalı Bakı birinciliyində oynaya-oynaya qitə nəhəngləri ilə baş-başa gəlir. 5 ildi belədi…
Bu yay “Qarabağ” çox tənqid olundu. Şəxslərə yönələn qərəzli tənqidləri çıxmaq şərti ilə bütün tənqidlərə açıq olmaq, nəticə çıxarmaq lazım idi. Ağdamlılar heç vaxtdan bundan qaçmadı, qəbul edib, dəyərləndirdi, nəticə çıxardı. Hətta bəzən eyforiyaya qapılanların sərhədsiz tənqidlərinə də açıq oldular, real imkanları nəzərə almayıb möcüzə gözləyənlərə də müsbət cavab verdilər.
Bir gün qruplar olmayacaq, “Qarabağ” da dayanacaq, zəifləyəcək, büdrəyəcək. Digər komandalarımız da ilk mərhələdəcə uduzacaq və o zaman vaxtilə necə bir komandaya sahib olduğumuzun fərqinə varacağıq. Hələ şirin yuxudayıq, bu komandanın çirkab içində olan, miskin Azərbaycan futbolunun yox, bir qrup insanın bacarığının, fədakarlığının meyvəsi olduğunu unuduruq. Ağıllı rəhbərlik, bacarıqlı məşqçilər, fədakar futbolçular “Qarabağ”ı ölkə futbolundakı üfunətdə tər çiçək kimi qoruya bilir. Oksigenləri çatana kimi də edəcəklər.
Çox şeyi adiləşdirmişik, hətta möcüzələri də. Davamını istəyirik. Çox pozitivik, yersiz inadçıyıq və nə yaxşı ki, hətta xəyallarımızı da reallaşdıran “Qarabağ” var. O olmayanda, büdrəyəndə futbolumuzdakı əsl durumu görəcəyik. “Qəbələ”ni itirdiyimiz kimi, bir gün bu komanda da əzəmətli olmayacaq. Amma nə qədər ki var onun büdrəməsini yox,digərlərinin də ona yoldaş olmasını, böyüməsini istəməliyik. Səhradakı tək ağacın altında kölgələnməklə olmaz.
“Qarabağ” heç Çempionlar Liqasının qrupuna düşərkən belə sevinməmişdi. Futbolçular stadion boyu dövrə vurub bütün azarkeşlərlə qələbəni bölüşdü. Bu, havaya girib onları tənqid edən azarkeşlərlə barışıq cəhdi, böyüklük nümayişi idi. Yəni, sizdən inciməmişik, inanmaqda, dəstəkləməkdə davam edin. Amma dövrə vurmaq həm də bədxahlarına əzələ göstərmək, komandaya badalaq vurmaq, gözdən salmaq istəyənlərə jest idi. Komandanın, bütün tənqidləri üzərinə çəkən lider Rəşad Sadıqovun, məşqçilərin jesti…
Sadıqovun belə sevindiyini, Qurbanovun təmkinini pozduğunu çoxdan görməmişdik. Onlar son təzyiqlərdən sonra yığılmış yay kimi açıldılar. Çiyinlərdən ağır yük götürüldü və “Qarabağ”ın bütün oyunlarını izləyən ölkə rəhbərliyi də Azərbaycan futbolunun ağırlığını kimlərin daşıdığını gördü. AFFA, onun üzdəniraq rəhbərliyi 10 ildi futbolla oynayırsa, “Qarabağ” futbol oynayır.
Danışır və GÖSTƏRİR “Qarabağ”. Fərqi artıq hamının görməsi, nəticə çıxarması zamanı çatıb.
FƏRİD
- Premyer-liqa2024-01-30 11:17
Premyer Liqada qış bazarlığı – YENİLƏNİR
- Premyer-liqa2024-01-28 19:23
“Neftçi”dən “Qəbələ” üzərində inamlı qələbə
- Milli komanda2024-01-29 10:40
Vaqif Cavadov milli komandaya təyinat alacaq
- Ölkə futbolu2024-01-29 08:00
“Qarabağ”ın izləyicisi yenə dəyişdi, xal fərqi 15-ə çatdı