“Təkcə Milinkoviç yox, bütün komanda günahkardı” – Nasimov

“Keşlə”nin hücumçusu Bahodir Nasimov futbolinfo.az saytına müsahibəsində komandasının son oyunlardakı uğursuz çıxışından, eləcə də baş məşqçi dəyişikliyindən danışıb:

– “Keşlə”də son zamanlar baş verənlər səni narahat etmir? Uğursuzluq və baş məşqçi dəyişikliyi…
– “Keşlə”də hər şey qaydasındadı. Məşqlərimzi davam etdiririk. Dünən yeni məşqçi təyinatı oldu. Ümid edirəm ki, yeni çalışdırıcı ilə biz bu vəziyyətdən çıxacağıq. Birlikdə situasiyanı dəyişmək üçün əlimizdən gələni edəcəyik. 

– Tərlan Əhmədovla əvvəllər işləmisən. İnanırsan ki, “Keşlə”ni bataqlıqdan xilas edəcək?
– Düzdü, onunla birlikdə işləmişəm. Xasiyyətinə yaxşı bələdəm. Nizam-intizama fikir verən məşqçidi. İnanıram ki, burda da uğurlu olacaq. Çünki Əhmədov harda işləyibsə, uğur qazanmağı bacarıb. 

– Onunla görüşünüz oldumu? Xüsusən köhnə futbolçusu kimi səninlə danışdımı?
– Xüsusi görüşüm olmayıb. Çünki dünən komandaya gəldi. Ümumi görüş keçirildi. Hamımızın fikri ancaq bugünkü oyundadı. Yəqin ki, bundan sonra hamımızla fərdi söhbətləri olacaq. 

– Düşünürsən ki, Milinkoviçdən fərqli Tərlan Əhmədov sənə daha çox şans verəcək?
– Mən hər zaman məşqlərdə 100 faiz hazırlaşıram. Baş məşqçi şans versə, onu dəyərləndirməyə çalışacam. Əlimdən gələni edəcəm ki, onun etimadını doğruldum. 

– Mladen Milinkoviç “Keşlə”də niyə uğursuz oldu?
– Burda tək Milinkoviç günahkar deyildi, bütün komanda günahkardı. Futbolda bəzən belə hallar olur. 

– Əhmədovun debütü çətin “Qarabağ”la oyun olacaq. Səncə, qalib gəlmək mümkündü?
– Futbolda məğlubedilməz komanda yoxdu. Hər cür nəticə mümkündü. Özümüz bu oyuna yüksək səviyyədə hazırlaşmışıq. İnanıram ki, çox uğurlu olacaq. Qazanmaq üçün əlimizdən gələni edəcəyik.

FƏRİD