Dünya futbolu
“Sabah”ın dirçəlişi, “Keşlə”nin artan iddiası
3:0 və 2:0 – meydan sahibləri və qonaqlar bu hesablı qələb…
3:0 və 2:0 – meydan sahibləri və qonaqlar bu hesablı qələbələri bərabər bölüşdü. Qarşılıqlı qollar olmadı, autsayder dəyişdi. “Qarabağ” zirvədə itkisiz qərarlaşıbsa, mükafatlar verən yerlər uğrunda mübarizə kəskinləşir. Digər 7 komandanın hamısının Avropa Liqası arzusu var və kimsəni siyahıdan silmək olmaz.
Turun ən önəmli matçları dünən reallaşdı. “Keşlə” əsas rəqiblərindən olan “Zirə”ni layiqli qələbəylə yendisə, “Sabah” da uğursuz gedişə son qoydu. Son 5 pillədəki komandanı bir-birindən 1 xal ayırırsa, digər 2 komanda 8 xal gerisində olduqları ağdamlıları şərikli təqib edir.
Yuri Vernidub ürək rahatlığı ilə müqavilə bağlaya bilər. “Sabah” onun iddialarına uyğun klubdu. Hazırkı heyət çox yaxşı seçilib, qalır futbolçuları vahid kollektiv kimi birləşdirmək.
Sadəcə, əvvəlki baş məşqçi Elşad Əhmədov və əvəzedicisi Rövşən Babayevdən fərqli olaraq, daşları yerinə düzgün oturtmaq lazımdı. Necə ki, bunu dünən İqor Ponomaryov etdi və komanda mövsümdə ilk qələbəsini qazandı. İlk yarıda bərabər oyun getsə də, fasilədən sonra futbolçuların fərdi ustalığındakı fərq üzə çıxdı, meydan sahibləri ardıcıl qollar vurub, son pilləni tərk etdi.
Ukraynalı məşqçi vaxtilə “Qəbələ”yə də gələ bilərdi. Lakin o zaman bölgə təmsilçisi Roman Qriqorçuku Vernidubla əvəzləmək planını təxirə saldı. O isə məhz indi ölkəmizdə görünəcək. Vətənində yaxşı işi ilə tanınan Vernidubla uğurlu gələcək vəd edən “Sabah”ın planları üst-üstə düşür. Tezliklə müqavilə bağlanacaq və o, dünən tribunadan izlədiyi komandanı avrokuboklara aparmaq üçün işə başlayacaq.
“Sabah” bu mövsüm 4-cü məşqçisinə qovuşmamış ilk qələbəsini qazandı. 2-ci pillədəki “Səbail”in məğlub edilməsi xüsusilə önəmlidi. Əks halda xal fərqi xeyli böyük olar, yüksək yerlərlə bağlı ümidlər xəyala dönərdi. Lakin kritik məqamda toparlanan futbolçular rəhbərliyin qayğısına biganə qalmadıqlarını nümayiş etdirdilər.
İnsafən bu işdə “Səbail” də onlara kömək etdi. Klubdaxili problemlərə də sinə gərən futbolçuların müqaviməti fasilədən sonra qırıldı. Turan Manafovun ötürmə səhvlərindən sonra meydan sahibləri qol vura bilməsə də, təzyiqi artırmalarına yardım etdi. Müqaviməti bitirən səhvi isə Kamal Bayramov etdi. Təcrübəli qapıçı topu meydanın mərkəzindəki rəqib oyunçuya ötürdü, Coşqun Diniyevin zərbəsindən sonra isə torunun silkələnməsini seyr etdi. Ardınca müdafiənin mərkəzində Cavid İmamverdiyev unuduldu, daha sonra Şakir Seyidov rəqib cərimə meydançasında maneə görmədən dəqiq zərbə vurdu. Hakim “Səbail”in qapısına aşkar penaltini təyin etsəydi, bəlkə də darmadağın daha acınacaqlı olardı.
Daha 2 qarşılaşmada olduğu kimi “Keşlə” – “Zirə” matçında da ilk yarıda bərabər mübarizə, fasilədən sonra bir tərəfin darmadağınını gördük. Düzdü, nominal meydan sahibləri ilk 45 dəqiqədə də daha üstün idi, lakin fasilədən sonra “qartallar”ın oyun nizamı tamamilə pozuldu. Samir Abasovun taktiki savaşda Tərlan Əhmədova uduzdu və “Keşlə” vacib 2 qolla 2-ci pilləyə şərik oldu.
Oyunçu arsenalı baxımından “Zirə”nin daha geniş heyəti var. Amma Abasov bu zənginlikdən istifadə etməyi bacarmır. Daim legioner oyunçu arzusunu dilə gətirən məşqçi indi yaradılan imkandan yararlanmağı bacarmır. “Keşlə” faktiki dəyişməz heyətə, bəlli oyun üslubuna sadiqdi və rəqib buna qarşı heç nə ortaya qoymadı.
Hələ ilk dövrə bitməyib, kimisə siyahıdan silmək olmur. Lakin yavaş-yavaş komandalar güclərinə görə sıralanmağa başlayır. Yəqin ki, qarşıdakı turlarda “Səbail”in enişini, “Sabah”ın yüksəlişini müşahidə edəcəyik. Digər komandalar isə qışa kimi yıxıla-dura çıxışını davam etdirəcək. Əsl mübarizə isə qışdan sonra başlayacaq.
FƏRİD
- Müsahibə2024-04-18 08:00
Rezabala avrokuboka vəsiqə istəyir: “Səhv etməyə ixtiyarımız yoxdur”
- Ölkə futbolu2024-04-19 08:52
Yüksək əmsal “Qarabağ”a əlavə üstünlük verir
- Ölkə futbolu2024-04-19 08:00
Juninyoya Niderlanddan da müştəri çıxdı
- Digər idman növləri2024-04-18 17:00
Şahmat Federasiyası yeni loqonun hazırlanması ilə bağlı müsabiqə elan etdi