“Karvan-Yevlax”ın nigeriyalı yarımmüdafiəçisi Peter Kinqsin futbolinfo.az saytına müsahibəsi
– 31-ci turda səfərdə “Turan Tovuz”a məğlub oldunuz. Bu oyundan yaxşı nəticə ilə ayrılmağınız üçün nə çatışmadı?
– Bu məğlubiyyət bizim üçün məyusedici oldu. Düşünürəm ki, əsas çatışmayan məqam vacib anlarda daha yaxşı konsentrasiya ola və yaratdığımız fürsətlərdən səmərəli istifadə edə bilməməyimiz idi. Sona qədər mübarizə apardıq, amma kiçik səhvlər fərq yaratdı, nəticəyə təsir göstərdi.
– Artıq “Karvan-Yevlax”ın Premyer Liqanı tərk edəcəyi dəqiqləşib. Mövsümün əvvəlində sonluğun belə olacağını yəqin ki, gözləmirdiniz…
– Sezonun əvvəlində heç birimiz işlərin bu cür nəticələnəcəyini gözləmirdik. Futbolda bəzən gözlənilməz nəticələr olur. Mövsüm ərzində çətin anlar yaşadıq, amma komanda olaraq mübarizəni davam etdirdik və sona qədər peşəkar qalmağa çalışdıq.
– Füzuli Məmmədov komandanın baş məşqçi postuna daha tez gətirilsəydi, sonluq fərqli ola bilərdi?
– Füzuli Məmmədovun daha əvvəl gəldiyi halda nələrin baş verə biləcəyini demək çətindir. Bəlkə bəzi şeylər dəyişərdi, bəlkə də yox. Amma o, komandaya yeni enerji və motivasiya gətirdi. Biz onun rəhbərliyi altında inkişaf etmək üçün əlimizdən gələni əsirgəmədik.
– Son turlarda “Qəbələ”ni qəbul edib, “İmişli”nin qonağı olacaqsınız. Bu matçlardan gözləntiniz nədir?
– Hazırda əsas diqqətimiz mövsümü güclü şəkildə başa vurmaqdadır. “Qəbələ” və “İmişli” ilə oyunlar bizim üçün çox vacibdir. Azarkeşlərimizə yadda qalacaq müsbət nəticə bəxş etmək istəyirik. Hər iki görüşə yaxşı nəticə qazanmaq məqsədilə çıxacağıq.
– Cari mövsümdə ən çox hansı oyunlardakı xal itkilərinə üzüldünüz və hələ də həmin matçları yadınızdan çıxara bilmirsiniz?
– Ən məyusedici görüşlər önə keçdikdən və ya yaxşı oynadıqdan sonra xallar itirdiyimiz matçlar idi. Belə oyunları unutmaq çətindir. Eyni zamanda, komandanın güclü xarakter və birlik göstərdiyi görüşlər də oldu. Həmin xatirələr mənimlə qalacaq.
– Mövsümün sonunda karyeranızla bağlı hansı qərarı verəcəksiniz? Azərbaycanın başqa klublarından təklifləriniz varmı?
– Hazırda əsas diqqətimi mövsümü peşəkar şəkildə başa vurmağa və komandaya bacardığım köməyi etməyə yönəltmişəm. Mövsümdən sonra ailəm və nümayəndələrimlə məsləhətləşib gələcəyim barədə qərar verəcəyəm. Bəzi klublardan maraq var, amma hələlik heç nə dəqiqləşməyib.
ABBAS
