Ölkə futbolu
AFFA-dan növbəti qanunsuzluq: hakimlər barədə raport yazılmayacaq
AFFA növbəti qanunsuzlığa əl atıb. Azərbaycan kubokunun mayın 27-də baş tutacaq final oyununa edilən təyinat belə deməyə əsas verir.
Futbolinfo.az xəbər verir ki, matçın hakim-inspektoru Frits Stuxlik olacaq. AFFA Hakimlər Komitəsinin avstriyalı sədri qurumun qanunlarını tapdalayaraq özünü mövsümün son qarşılaşmasına təyin edib.
Azərbaycan vətəndaşı olmayan birinin, xüsusi qərar olmadan hansısa matça təyinat alması qanunsuzluğun bir tərəfidi. Üstəlik, Stuxlik mövsümöncəsi daxili yarışlar üçün təsdiqlənmiş hakim-inspektorlar siyahısına düşmədən bu təyinata layiq bilinib.
İndiyədək heç bir çempionat və ya kubok matçında olmayan birinin qəflətən kubokun finalında görünməsi təsadüf deyil. Bakının MAVİ gecələrinin aşiqinin AFFA-yla müqaviləsi bitir. Çox güman, onu yenidən gündəmə gətirmək, müqavilə müddətini artırmaq istəyən himayədarları əl-ayağa düşüb, avstriyalını gündəmə gətirirlər.
AFFA bu təyinata haqq qazandırmaq üçün matçda VAR-ın tətbiq olunmasını önə çəkir. Guya ki, Stuxlik olmasa, VAR-ın tətbiqi mümkünsüzdü.
Əvvəla, bu özü absurddu. Beynəlxalq dərəcəli hakim-inspektorlarımız var və onlar VAR otağında işləyə bilmirlərsə, bu, elə Stuxlikin günahıdı. Sədr Azərbaycanda bu sistemin tətbiqini reallaşdırmaq üçün Avstriyadan gətirilib. İşi bacaran mütəxəssislər yetişdirilməyibsə, buna görə utanmalı olan Stuxlik özüdü. Hətta Stuxlik mütləq hadisə yerində olmalıdısa da, oyuna hakim-inspektor deyil, sadəcə, sədr kimi getməsi kifayət etməliydi.
Maraqlıdı ki, Stuxlik bu oyuna görə raport yazmayacaq, hakimləri qiymətləndirməyəcək və qonorar almayacaq. Bu da növbəti qanunsuzluqdu. Çünki bütün matçlarda hakim-inspektorun olması, hakimləri qiymətləndirməsi, raport yazması mütləq şərtdi. AFFA Hakimlər Komitəsinin Təyinat şöbəsindən aldığımız məlumata görə isə bu dəfə belə olmayacaq. Yəni, baş hakim Elçin Məsiyevin işi sənədləşdirilməyəcək, raport hazırlanmayacaq.
Absurd qərardı və görünür, Stuxlikin şəxsi reklamına həsr olunan təyinat qanunlardan daha üstün bilinir. Halbuki, oyuna hakim-inspektor təyin etmək, VAR-a isə Stuxlikin nəzarət etməsini reallaşdırmaq mümkün idi.
P.S.: AFFA-dan bu müəmmalara aydınlıq gətirməsini gözləyirik.
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Ölkə futbolu2024-04-23 08:00
“Səbail” “Sabah”a uduzsa…
- Ölkə futbolu2024-04-24 08:00
Musa “Yurqorden”dən ayrılır: “Heç nəyi istisna etmirəm”