Ölkə futbolu
AFFA dövlət yardımı bəhanəsi ilə klublara adam yerləşdirir – “Qarabağ”la “Qəbələ” rədd etdi
“Qarabağ” və “Qəbələ” AFFA-nın tələbini geri çevirib. Bu klublar Müşahidə Şurası yaratmaq və ora assosiasiyadan bir nəfərin daxil edilməsi təklifindən boyun qaçırıb.
AFFA illərdi klublarda Müşahidə Şurası yaratmaq, onların idarəçiliyini ələ keçirmək cəhdlərindən əl çəkmir. Bir neçə klub istisna olmaqla, əksəriyyət bu yolu seçib. Vitse-prezident Elxan Məmmədovun ideyası ilə reallaşan şuralaşma prosesindən sonra həmin klubların hansı vəziyyətdə olması da göz önündədi. Hamı Abşeron çempionatında baş girlədiyi, Avropaya çıxan kimi biabır olduğu bir zamanda müstəqil “Qarabağ” Azərbaycan futbolunun ağırlığını çiyinlərində daşıyır.
Çata bilmədikləri “Qarabağ”ı öz səviyyələrinə endirmək üçün illərdi “şuralaşma oyunu” oynayanlar indi fürsətdən yararlanmaq istəyir. Belə ki, klublara dövlət tərəfindən ayrılacaq 3 milyonl manatlıq maliyyə yardımını vermək üçün şərt qoyulub. Yalnız Müşahidə Şurası yaradanlar və AFFA-nın bir nümayəndəsini ora daxil edənlər sözügedən vəsaiti ala biləcək.
Lakin həmin pulu özü qitə yarışlarından qazanan “Qarabağ” rəhbərliyi bu şərti rədd edib. Zatən sponsorları sayəsində uğurlu çıxışını davam etdirən klub “şuralaşmaya” getməyəcəyini, futbol qurumundan kimsənin kluba soxulmasına imkan verməyəcəyin bildirib. Bu, hətta dövlət yardımından məhrum qalmaq bahasına olsa da…
“Qəbələ” də eyni addımı atıb. Düzdü, bölgə təmsilçisinin o pula ehtiyacı var, amma yardımı AFFA-dan kimisə kluba buraxmadan, Müşahidə Şurası yaratmadan almaq istəyirlər, danışıqlar, mübarizə davam edir. Qəbələlilər dövlətin ayırdığı vəsaitin hesabına kimlərinsə şəxsi məqsədindən istifadə etdiyini ifşa etmək niyyətindədi.
AFFA-nın təklifindən itina edənlərdən biri də “Sabah”dı. Düzdü, bu klubda Müşahidə Şurası var, amma orada assosiasiyanın nümayəndəsi təmsil olunmur. Bakılılar şuranın tərkibini dəyişib “yad adam” üçün yer açılması təklifindən imtina edib.
Hələlik 3 milyon manata görə AFFA-nın təklifinə “hə” deyən sonuncu klub “Zirə”di. İllərdi şuralaşmadan boyun qaçıran qəsəbə təmsilçisi ötən həftə bu addımı atdı. “Turan Tovuz” və digər klublar da şuranın yeni tərkibini müəyyənləşdiriblər, tezliklə açıqlayacaqlar.
Ümid edirik ki, “Qarabağ”la “Qəbələ”nin müqavimətini vəsaiti ayıranlar doğru analiz edəcək və bunu şəxsi məqsədləri üçün fürsətə çevirmək istəyənlərin qulağını çəkəcək.