“Araz Naxçıvan” Premyer Liqaya hazırlaşır: “İşıqlandırma ilə bağlı bəzi problemlər var”

“Araz Naxçıvan” klubunun İdarə Heyətinin sədr müavini Sakit Rzayevin futbolinfo.az saytına müsahibəsi

– “Araz Naxçıvan” I Divizionda kiderliyi, həmçinin Premyer Liqaya vəsiqəni təmin edib. Hansı hissləri keçirirsiniz?

– Premyer Liqanın öz sevinci, həyəcanı, həmçinin səviyyəsi var. Uzun illər Naxçıvanda futbol olmayıb. Artıq 10 ildir buradayam, Naxçıvan futbolunu dirçəltməyə çalışırıq. 10 il çəkdiyimiz əziyyətin bəhrəsini son bir ildə görməyimiz sevindiricidir. Bunun bizim dönəmimizə təsadüf etməsi xoş oldu.

– Premyer Liqaya hazırlıqlar necə gedir?

– Hazırlığa oktyabr-noyabrdan başlamışıq. Premyer Liqada oynamaq istədiyimizi bildirmək üçün müraciət etdik. Ardından lisenziyalaşdırma komitəsindən Naxçıvana səfərlər başladı. Həmçinin AFFA və PFL-lə görüşlər oldu. Tələb olunan bütün sənədləri artıq təqdim etmişik. Lisenziyalaşdırma qurumunun yekun qərarına bir həftə qalmış son məktub təqdim olunacaq. AFFA elitada iştirakımız barədə qərar qəbul etsə, buna hazır olacağıq.

– Hər hansı bir çatışmazlıq varmı?

– Lisenziyalaşdırmanın bütün tələblərini qarşılayan sənədləri, eyni zamanda görüləcək işlərlə bağlı layihələri təqdim etmişik.

– Bəs infrastruktur işləri necə gedir?

– Stadionun ot örtüyünün dəyişdirilməsi prosesi davam edir. Bir neçə şirkətlə bu barədə danışıqlar aparırıq. Ramazan bayramından sonra bu yöndə işlərə start verilməsi planlaşdırılır. Bundan başqa, skay-boksların artırılması, əlavə iki çəkiliş platformasının, media nümayəndələri üçün yerlərin hazırlanması nəzərdə tutulur. Daha əvvəl böyük monitorun quraşdırılması işlərini aparmışdıq. İşıqlandırma ilə bağlı bəzi problemlər var, bunun aradan qaldırılması üçün işlər görüləcək.

– Premyer Liqada iştirak üçün akademiyada uşaq futbol komandalarının varlığı da vacibdir. Bu tələbləri də qarşılamağa hazırsınız?

– 10 yaşdan 16 yaşadək futbol komandalarımız əvvəldən var idi. U-17, U-19 və əvəzedici komandanın yaradılması ilə bağlı işlər davam etdirilir. Naxçıvanda uzun müddət gənclərdən ibarət komandalar olmadığından, yuxarı yaş qrupları baxımından çətinlik yarana bilər. Bununla bağlı iki variantımız var. Bu komandaları Naxçıvanda yığsaq belə, onların Bakıya gəliş-gediş məsələləri var. İkinci variantımız isə növbəti mövsüm U-17, U-19 və əvəzedici komandaların Bakıda fəaliyyət göstərməsidir. Hələ tam qərarımızı verməmişik. Bunlar da maliyyə məsələsindən asılıdır. Mövsüm başlayana qədər bunların hamısını yoluna qoyacağıq.

– Dövlətdən ayrılacaq 3 milyon manatdan əlavə kluba yardım edəcək başqa sponsorlar olacaqmı?

– Premyer Liqa klublarının hamısına dövlət dəstəyi var. Eyni zamanda “Cahan Holding” bizim baş sponsorumuzdur. Həmin şirkətin rəhbəri həmçinin klubun da rəhbəridir. Əlavə sponsor görüşləri üçün hansısa addım atmamışıq. Təbii ki, böyümək, peşəkar klub olmaq istəyiriksə, maliyyəmiz də geniş olmalıdır. Çünki futbol böyük maliyyə tələb edən idman növüdür. Bu işləri Futbolun İnkişaf Fondu ilə birlikdə aparmaq istəyirik. “Araz Naxçıvan”ın inkişaf strategiyası ilə bağlı qarşılıqlı planlar hazırlanıb. Klubun özünün gəlir mənbələri olmalıdır. Bu, sponsorlardan, tərəfdaşlardan, təchizatçı firmalardan ola bilər. Artıq su təchizatçımız var. Gələcəkdə qida, tibb, nəqliyyat təchizatçılarının olması istiqamətində də işlər aparılacaq.

– Forma və bilet satışlarından gəlir əldə etmək nəzərdə tutulubmu?

– “Araz Naxçıvan” store mağazası var. Oradan qazanc əldə etməyi planlaşdırırıq. Azarkeşlər üçün formalar, şərflər, digər atributlar da hazırlanıb. 7-8 yaşdan yuxarı yaş qruplarına uyğun formalarımız var. O ki qaldı bilet satışına, həm normal satış olacaq, həm də mövsümi biletlər. Bir klubun yaşaması üçün ən vacib amillərdən biri azarkeşdir. Naxçıvanda da komandaya maraq çoxdur. Azarkeşlər oyunların əsasən həftəsonuna salınmasını istəyirlər. Naxçıvan camaatı təxminən 10 il əvvəl Premyer Liqa həyəcanı yaşayıb. Biz orada daim iştirak edə biləcək kollektiv formalaşdırmaq, dayanıqlı strategiya hazırlamaq istəyirik. Klubun təməlini yaxşı atmaq lazımdır ki, azarkeşlər də həmişə sevinsinlər.

– Stadion gələn mövsümə qədər tam hazır olacaq?

– Bunu biz də istəyirik. Hazırda danışıqlar gedir. AFFA və PFL-lə yaxın müddətdə görüş keçirilməlidir. Düşünürəm ki, Premyer Liqada iştirak üçün lisenziyanı aldıqdan sonra ot örtüyünün dəyişdirilməsi prosesinə başlayacağıq.

– Futbolçu heyətinin gücləndirilməsi yönündə çalışmalar başlanılıb?

– Hələ heç bir futbolçu ilə danışıq aparılmayıb. Baş məşqçimiz Azər Bağırov bu suala daha dolğun cavab verə bilər. Heyətin qurulması, oyunçularla danışıqların aparılması əsasən onun işidir. Əlbəttə ki, biz də bu yöndə ona hər cür dəstəyimizi verəcəyik. Hansı mövqelərə əcnəbi, hansılara yerli transfer edilməsini özü artıq müəyyənləşdirib.

– Premyer Liqada komandanı Azər Bağırovun çalışdıracağı dəqiqdir?

– Bəli, Azər müəllim komandanın “sükanı arxasında” olacaq. Onunla uzunmüddətli müqavilə imzalayacağıq. Rəhbərlik də baş məşqçinin işindən razıdır.

ABBAS