Avropa Liqasına kim getsin: “Sumqayıt”, yoxsa “Zirə”?

“Sumqayıt” ötən mövsüm ölkə kubokunun finalına çıxmaqla avrokuboklara vəsiqəyə çox yaxın idi. Komanda son anda əldən gedən imkana görə ruhdan düşmədi, əksinə, bu mövsüm hədəfə daha ciddi motivasiya oldu. Hazırda Ayxan Abbasovun yetirmələri kubokda ¼ finalçıdı, çempionatda da 4-cü pillədə qərarlaşıb.

Vəziyyət elədi ki, çempionatın dayandırılmasına qərar verilsə, ölkəmizi Çempionlar Liqasında “Qarabağ”, Avropa Liqasında isə “Neftçi”, “Keşlə” və “Sumqayıt” təmsil etməli olacaq. Digər komandalar izləyicilərindən ciddi xal fərqi ilə öndə olduğundan, hətta mövsümün davam etdirilməsi halında da çox şeyin dəyişməyəcəyi təxmin edildiyindən, gözlər 4-cü pillədədi. Bu yerə iddia edən “Sabah”la “Zirə” mövsümün bərpasını arzulayır. “Sabah” kubokda “Qarabağ”ın qalib olacağına ümid edərək çempionatda ilk “dördlüy”ə düşməyi hədəfləyir, “Zirə” isə hər iki cəbhədə şansını sınamaq niyyətindədi.

***

Azərbaycan Premyer Liqasında mövsümün taleyi bugünlərdə bəlli olacaq. Nazirlər Kabineti yanında Operativ Qərargahın verəcəyi qərar birbaşa top oyununun ölkəmizdəki mənzərəsini də müəyyən edəcək.

Bir aydı xüsusi karantin qaydalarındakı “yumşaldılma”ya ümid edən funksionerlər günləri, həftələri ötürməklə məşğuldu. Və nəhayət, iyunun əvvəlində gözlənilən qərarın veriləcəyinə ümid edirlər. İdman qurğuları açılmasa, ən azı futbol klublarına məşqlərə başlamaq üçün icazə verilməsə, çempionatın bərpası mümkünsüzləşəcək. Daha sonra faktiki olaraq, vaxt çatmayacaq.

Bütün dünyada normal həyata doğru dönüş reallaşır, əksər ölkələrdə futbol klubları məşqlərə başlayıb. Azərbaycanda isə nəqliyyatla, iaşə obyektləri ilə müqayisədə, demək olar, risksiz olan idman təsərrüfatının “yaddan çıxması” maraqlıdı. Ümid edirik, bu həftə ən doğru qərar verilər, əks halda, cavabını gözləyən bir çox suallar beyinləri çox qarışdıracaq.

***

Mövsüm bərpa edilsə, “Qəbələ” də ümidlənəcək. Əyalət təmsilçisi kubokun yarımfinalçılarından biridi, heç nə bitməyib, qitə yarışlarına yollanmaq üçün 3 həlledici oyun var.

Amma çempionatın ləğv edilməsi, komandaların indiki durumuna görə avrokuboklara vəsiqəyə layiq bilinməsi versiyası reallaşmağa doğru getdikcə narazılıqlar özünü büruzə verir. “Qəbələ” və “Sabah” fors-major halında nəsə deməkdə acizdi, lakin “Zirə” gündəmi dəyişir.

“Qartallar”ın baş məşqçisi Zaur Həşimov ötən günlərdə mətbuata müsahibəsində Avroliqadan kənar qalmalarını haqsızlıq sayacaqlarını, bu durumdan narazı olacaqlarını dilə gətirdi. O, qitə yarışlarına daha layiq olduqlarını düşünür və eyni xal topladıqları “Sumqayıt”dan şəxsi oyunlarda üstün olmalarını əsas gətirir.

Hazırda 4-cü pillədə olan “Sumqayıt” yalnız daha yaxşı top fərqinə görə “Zirə”dən öndədi.

4. Sumqayıt      20            6             5             9             24-32       23
5. Zirə                20            6             5             9             25-37       23

Komandalar cari mövsümdə 3 dəfə qarşılaşıb, Sumqayıtdakı oyunlarda hərənin 2:1 hesablı bir qələbəsi var, Zirədə isə bərabərlik qeydə alınıb. Belədə hər iki tərəf üçün eyni rəqəm ortaya çıxır – 1 qələbə, 1 heç-heçə, 1 məğlubiyyət, top fərqi 5:5. Lakin Həşimov rəqib meydanında daha çox top vurmalarını üstünlük sayır.  Belə ki, yarışların əsasnaməsinə görə, Premyer Liqada iki və daha artıq komandanın topladığı xalların sayı bərabər olarsa, qalib şəxsi görüşlərdə üstün olan sayılır.

Zaur bəy Sumqayıtda 3:3 hesabına görə üstün olduqlarını düşünür və ilk baxışdan haqlıdı. 4-cü oyun keçirilməyəcəksə, bunun günahkarı kimsə deyil, fors-major haldı və yekunda indiki turnir cədvəli əsas sayılacaqsa, o zaman hansı meydanda neçə oyun keçirilməsi önəm daşımır. Lakin…

…Lakin iş ondadı ki, Peşəkar Futbol Liqasının hazırladığı və mövsümün əvvəlində elan etdiyi Əsasnamə “Sumqayıt”ın xeyrinədi. Rəsmi sənəddə qeyd olunur:

Premyer Liqa və I Divizion yarışında komandaların tutduqları yerlər toplanmış xallara görə müəyyən edilir. Qələbəyə görə 3, heç-heçəyə 1 xal verilir, məğlubiyyətə görə xal verilmir. Premyer Liqada iki və daha artıq komandanın topladığı xalların sayı bərabər olarsa, qalib aşağıdakı göstəricilərə müvafiq olaraq müəyyən edilir:

komandaların öz aralarında keçirdikləri oyunların nəticələrinə görə;

komandaların öz aralarında keçirdikləri oyunlarda top fərqi;

mövsüm ərzində ən çox qələbə qazanmış komanda;

bütün oyunlarda vurulmuş və buraxılmış topların fərqinə görə;

bütün görüşlərdə vurulmuş topların sayına görə;

ən az qayda pozuntularına görə (xəbərdarlıq – 1 bal, kənarlaşdırılma – 3 bal);

püşkün nəticəsinə görə.

Göründüyü kimi, Əsasnamədə səfərdə daha çox qol vurmaq üstünlük sayılmır və bütün göstəricilərdə bərabər olan cütlükdən “kimyaçılar”ın üstünlüyü 4-cü bənddə üzə çıxır (-8:-12). Təbii ki, “Zirə” bundan narazıdı və haqsızlıqdan gileylənə bilər, lakin mövsümün əvvəlində qəbul edilən Əsasnamə var.

O başqa məsələ ki, PFL Əsasnaməni hazırlayarkən şəxsi oyunlarla bağlı bölümdə səfər qoluna ehtiyac duymamaqla bəlkə də düzgün etməyib. Lakin hər ölkədə fərqli qaydalar var və daha öncədən bəlli olan şərtlərə uymaq zamanıdı.

***

Mənzərə belədi – “Zirə” narazılıq etməkdə haqsız olsa da, “mızıldanma”ya qismən haqq qazandırmaq istəyirsən. Əsanamələr ya daha yaxşı hazırlanmalı, ya da iştirakçılar onun bəndlərindəki incəlikləri vaxtında anlamalı, razı deyilsə, iş bu həddə çatmamış münasibət bildirməlidi.

Ümid edirik, Operativ Qərargah tezliklə klubların məşq etməsinə imkan yaradacaq qərarı verəcək və o zaman belə hesablamalara ehtiyac yaranmayacaq. Premyer Liqanın bərpa olunmasıyla meydanda üstünlük qazananlar avrokubok yoluna tutarsa, pandemiyanın “Sumqayıt”a xeyrindən, bu şəhərin qitə arenasında debütünə koronavirusun səbəb olmasından danışmayacağıq.

FƏRİD