Ölkə futbolu
Baqa Azərbaycana qayıtmaqdan imtina edib
“Sumqayıt”ın baş məşqçisi Aleksey Baqa Azərbaycana qayıtmaqdan imtina edib. Vətənində istirahət edən belaruslu klubdaxili problemlər həll edilmədiyi üçün geri dönmək istəmir. O, klubun maliyyə problemlərini həll etmədiyini əsas gətirərək istirahətini pozmağı vaxt itirmək hesab edir.
AFFA-da kabinet oyunları davam edir, klublara maliyyə yardımı ayırılması məsələsi yubanır. Vitse-prezident Elxan Məmmədov ölkə futbolundakı hegemonluğundan əl çəkmək istəmir, maliyyəni təmin etməli olan qurumlar isə bu şəxsin gedişini gözləyir. Seytnot vəziyyətidi – klublar yeni mövsümün hazırlığına başlaya bilmir, kabinetlərdə isə nüfuz müharibəsi gedir. Heç kim futbolu düşünmür, hamı hakimiyyət həvəsindədi.
Bu səbəbdən “Sumqayıt”da da durğunluq yaranıb. Büdcə olmadığından klubun hazırlıq planları bəlli deyil, heyət gücləndirilmir. Bu mövsümdən legioner transferinə qadağanın götürüldüyü klubda nəinki əcnəbiləri, hətta yerli futbolçuları heyətə qatmağa imkan yoxdu. AFFA xətti ilə dövlət yardımının ayrılacağı xəbərini alan “Azərkimya” klubla bağlarını qoparıb, menecer-prezident Riad Rəfiyevi yaxına buraxmırlar.
Belə vəziyyətdə klubda durğunluq yaranması təbiidi. Və Baqa da heç nə aydınlaşmamış Azərbaycana qayıtmaq niyyətində deyil. O, legionerlərin də oynayacağı komandada çalışmaq istəyir, transferlər üçün isə imkan yoxdu. Necə olacağı həftəsonunacan dəqiqləşməlidi. Hər halda, AFFA son vədi bu tarix üçün verib.