Ölkə futbolu
Baqa Musayevi Avropaya buraxmadı
Son tur formallığa çevrildi. Hamı bütün suallara aydınlıq gəlməsi üçün bağlanış həftəsini gözləyərkən, “Sumqayıt” sürprizlə hamını təəccübləndirdi. Avrokuboklara vəsiqənin taleyi bölgə təmsilçilərinin matçında yox, əcnəbi məşqçilərin duelində aydınlaşdı.
Artıq həm son pillənin sahibi, həm də avrokubokların bütün iştirakçıları bəllidi. Çempionluğunu daha öncə rəsmiləşdirən “Qarabağ” və “Neftçi”nin ardınca, “Zirə”ylə “Qəbələ” də Konfrans Liqasına vəsiqə qazanmağı bacardı. “Qartallar” bunu özləri qələbə qazanmaqla reallaşdırdısa, “Qəbələ” rahat nəfəs aldıqları üçün “Sumqayıt”a minnətdar olmalıdı. Bölgə təmsilçisi son turda qəbul edəcəkləri “Sabah” üçün əlçatmaza çevrildi.
Son iki dövrədə məğlub olmayan “Qarabağ” “Neftçi”ylə mövsümün son matçına yaxşı əhval-ruhiyyədə çıxacaq. Medalların təqdim olunacağı görüş ərəfəsində bakılıların ardıcıl iki məğlubiyyət alması, onların qanını qaraltsa da, minimum vəzifə yerinə yetirilib. Gümüş medalçı son matçı yola verib yenidən toparlanmaq üçün yay fasiləsinə çıxacaq.
“Zirə” ilk vəzifəni layiqli qələbə ilə yerinə yetirdi. Rəşad Sadıqovun yetirmələri son turda bürünc medal uğrunda matça çıxacaq, daha sonra kubokun finalında ilk titulunu əldə etməyə cəhd göstərəcək. “Qəbələ”nin də 3-cü pilləyə ümidi var, amma bölgə klubu əsas vəzifəni yerinə yetirdikdən sonra üzərindəki təzyiqdən qurtulub və medal indi onlar üçün bir o qədər vacib deyil.
Əslində, avrokuboklara vəsiqəyə “Qəbələ” daha çox layiq idi. Amma qışdan sonra o qədər səhvlər edildi ki, komanda bir anda özünü 5-cü pillədə tapdı. Rəhbərlik futbolçuları vaxtında toparlaya, böhrana son qoya bildi. Son turda bəlkə də fərqli ssenari yaşanacaq, avrokuboklara vəsiqə əldən çıxacaqdı. Bu baxımdan “Sumqayıt”ın hədiyyəsi yerinə düşdü.
“Sabah” qışdan sonrakı oyunu ilə rəğbət qazanmışdı. Lakin komandada sabitliyin çatmadığı, təzyiq altında tez-tez səhvlər etdiyi aşkar görünürdü. Dünən də belə oldu. Komanda məhz psixoloji baxımından rəqabətə dözmədi, rahat udmalı olduğu oyunda bağışlanmaz səhvlər buraxdı. 10 nəfər qalarkən 0:2 hesablı geriliyi aradan qaldırmaq mümkün olsa da, qələbəni təmin etmək üçün vaxt çatmadı.
İndi Murad Musayevin düşünmək üçün çox vaxtı olacaq. İnsaf naminə, o, komandanı bir üst səviyyəyə yüksəldə bildi. Lakin əldəki imkanları nəzərə alsaq, bu iş çoxdan bitməliydi. Rəhbərlik başverənləri soyuq başla analiz edib, nəticə çıxarsa, gələn mövsüm daha güclü “Sabah” görə bilərik.
“Qəbələ”nin önəmli qələbə qazandığı matç həm də “Şamaxı”nın növbəti ev məğlubiyyəti ilə yadda qaldı. “Keşlə”dən əyalət klubuna çevrilən komandanın tam yenidən yığılmasına ehtiyac var. Aparıcı oyunçularını itirəcəyi gözlənilən “Sumqayıt”, tamamilə yeniləcək “Səbail” də yayda fərqli simaya bürünməlidi.
FƏRİD
- Müsahibə2024-04-18 08:00
Rezabala avrokuboka vəsiqə istəyir: “Səhv etməyə ixtiyarımız yoxdur”
- Ölkə futbolu2024-04-19 08:52
Yüksək əmsal “Qarabağ”a əlavə üstünlük verir
- Digər idman növləri2024-04-17 21:46
“Neftçi” finalda “Xəzri”yə rəqib oldu
- Digər idman növləri2024-04-18 17:00
Şahmat Federasiyası yeni loqonun hazırlanması ilə bağlı müsabiqə elan etdi