BÖLGƏ FUTBOLU: Gəncədən xoş xəbər də var

Son günlər ölkə futbolunun gündəmi “Kəpəz” və Gəncə stadionudur. Şəhər arenasının durumu üzündən komandanın ev oyunlarını Bakıda keçirməyə məcbur olmasına münasibət birmənalı deyil.

Lakin Gəncədən yaxşı xəbərlər də var. Və bu xəbərlər sabaha ümid yaradır.

Gəncə futbol akademiyasının inşasına ötən ilin sonundan start verilib. Akademiyanın iki mərtəbədən olacaq inzabi binasında işlərin bir qismi artıq yerinə yetirilib. Hazırda hörgü və suvaq işləri görülür. Növbəti mərhələdə elektrik və montaj işləri həyata keçiriləcək. Trenajor, duş, sauna, soyunub-geyinmə otaqları, anbar və çamaşırxana zirzəmidə olacaq. Birinci mərtəbədə iş, dərs və qonaq otaqları, eyni zamanda konfrans otağı və yeməkxana fəaliyyət göstərəcək. İkinci mərtəbədə akademiyada futbolun sirlərinə yiyələnən və digər rayonlardan gələn uşaqlar üçün yataq otaqları nəzərdə tutulub. Futbol məktəbinin cari ilin sonunadək fəaliyyətə verilməsi planlaşdırılır.

Futbol akademiyasında iki təbii ölçülü meydança da inşa olunur. Onlardan birində artıq işlər yekunlaşıb və yaxın zamanlarda ot örtüyünün salınmasına başlanacaq. Digər meydanda son tamamlanma işləri yerinə yetirilir. Torpaq-beton işləri yekunlaşan ikinci meydançada çəpərləmə işlərinə başlanılıb.

Ümumilikdə hər iki meydançanın oktyabr ayında təhvil verilməsi planlaşdırılır.

Futbol akademiyası ilə paralel olaraq Gəncə stadionunda da lazımı tikinti işləri davam edir. Soyunub-geyinmə otaqları yenilənib, ətrafı abadlaşıb. Stadionun ətrafında bir sıra kosmetik işlər də yerinə yetirilib. Amma şəhər stadionunun tribunaları ilə bağlı işlərə başlanılmayıb. Yaxın zamanda bununla bağlı da müəyyən addımlar atılacaq.

BƏHRUZ MUSAYEV